Matius 4
4
Puang Yesus nasudi ponggawana setang
Mrk. 1:12-13; Luk. 4:1-13
1Mangkai too, natettemi Penawa Masero Puang Yesus lako padang alla' annu la nasudi ponggawana setang. 2Ma'puasami#4:2 puasa: Kalembasanna diangga'i tae' ummande sola ummiru'. Angga disatutui memala' langngan Puang Allata'alla. Puang Yesus appa' tapulo allona appa' tapulo bonginna napolalan tadea'. 3Saemi ponggawana setang#4:3 ponggawana setang illalan basa Yunani ke dipalinni tama basa Mamasa: to massudi. ussudii nakua: “Ianna Anakna tongangko Puang Allata'alla, popendadi rotii inde mai batue.”
4Sapo natimba' Puang Yesus nakua: “Dengan tiuki' illalan Buku Masero nakua:
‘Tangngia angga roti la napotuo ma'rupa tau, sapo angganna battakadanna Puang Allata'alla.’ ”#4:4 Ul. 8:3; Luk. 4:4.
5Mangkaii, ussolammi Puang Yesus lako Yerusalem, kota masero, anna payaoi bubungan Banua Ada'na Puang Allata'alla 6anna ma'kada lako nakua: “Ianna Anakna tongangko Puang Allata'alla, dondonangko kalemu rokko annu dengan tiuki' illalan Buku Masero nakua:
‘La ussua malaeka'na Puang Allata'alla umpesangkaiko,
anna timangko
indana titumbu lentekmu lako batu.’ ”#4:6 Mzm. 91:11-12.
7Natimba' Puang Yesus nakua: “Dengan duka' tiuki' illalan Buku Masero nakua:
‘Dau ussandak-sandak Puang Allata'alla Dewatammu.’ ”#4:7 Ul. 6:16.
8Ussolaan pole omi Puang Yesus langngan tanete malangka' anna paitaii angganna kaparentaan illalan lino sitonda kamalekeanna 9anna ma'kada nakua: “Angganna tende lakoe la kupalulako asan kalemu ke malimuntu'ko dio oloku umpenombaina'.”
10Ma'kada Puang Yesus lako nakua: “Pallaiko lao Setang! Annu dengan tiuki' illalan Buku Masero nakua: ‘Penombaiko Puang Allata'alla Dewatammu, anna angga lako kalena la muola memala'.’ ”#4:10 Ul. 6:13.
11Le'ba siami ponggawana setang umpellei Puang Yesus. Saemi malaeka'na Puang Allata'alla ussaraii.
Puang Yesus umparanduk pengkaranganna dio Galilea
Mrk. 1:14-15; Luk. 4:14-15
12Tappana naissanan Puang Yesus kumua ditarungkun Yohanes to simantedok,#4:12 ditarungkun Yohanes to simantedok: Tomaraya Herodes Antipas untarungkun Yohanes annu nakambaroan ummala bainena sirondongna. Kara-kara iatee natula' Matius illalan 14:3-12. mengkalaomi dio Yudea lu lako lembangna Galilea. 13Untampemi Nazaret lu lako tondok Kapernaum anna torro dio. Inde Kapernaum-e dio biring Tasik Galilea illalan lili'na litak katawaanna Zebulon anna Naftali. 14Ia nangei lu lako Kapernaum Puang Yesus anna malara lemba' battakadanna Dewata napalanda' nabi Yesaya nakua:
15“Litak katawaanna Zebulon anna Naftali,
lalan lako Tasik Galilea, tandai lianna Salu Yordan illalan lembangna Galilea,
litakna tau senga' salianna to Yahudi.
16Ummitami kamasiangan passassang
to nakala' kamalillinan,
anna to illalan lembangna kamatean,
naarrangmi kamasiangan.”#4:15-16 Yes. 9:1-2.
17Saena Puang Yesus dio Kapernaum, naparandukmi napa'peassakan lako tau buda kumua: “Mengkatoba'mokoa' annu madappi'mi kasaeanna kaparentaanna Puang Allata'alla.”
Appa' to madala naala passikola Puang Yesus
Mrk. 1:16-20; Luk. 5:1-11
18Pissan attu ummundu' biring Tasik Galilea Puang Yesus. Ummitami dua to sirondong disanga Simon (sidikuaan toi Petrus) anna disanga Andreas marassan madala, annu innang to simadala. 19Napa'kadaimi Puang Yesus nakua: “Maikoa' ammu turu'na' annu la kupatudukoa' undala ma'rupa tau.” 20Mengkalao siami untampe dalana anna le'ba unturu' Puang Yesus.
21Umpatarru'mi penonosanna, ummita pole omi to sirondong disanga Yakobus anna Yohanes, anakna Zebedeus, marassan umpapia dalana sola ambena illalan lopinna. Natambaimi duka' Puang Yesus, 22napolalan bassi umpellei lopinna sola ambena, anna le'ba unturu' Puang Yesus.
Puang Yesus ma'patudu anna umpomalapu' buda to masaki
Luk. 6:17-19
23Ulleleammi banua pa'sambayanganna to Yahudi Puang Yesus illalan lili'na Galilea ma'patudu anna umpalanda' Kareba Kadoresan kumua madappi'mi kasaeanna kaparentaanna Puang Allata'alla. Anna umpomalapu' to masaki dio mai ma'rupa-rupa saki anna rammun. 24Tappa silelemi karebana Puang Yesus dio lembangna Siria, napolalan buda tau sae umpellambi'i pantan umbaa to masakinna. Inde mai to masakie narua ma'rupa-rupa saki, to ussa'dingan kamapa'disan, to natamai setang, to lintu manukan, anna to balimbingan. Napomalapu' asammi Puang Yesus, 25napolalan buda tau ma'karompo' ummula'i, dengan to lu dio mai lembangna Galilea, dengan to lu dio mai lembangna Dekapolis, dengan to lu dio mai Yerusalem, dengan to lu dio mai lembangna Yudea, anna dengan to lu sambali' mai lamban lianna Salu Yordan.
Currently Selected:
Matius 4: mqj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.