Zacarías 1
1
Iq'uel yu'un Dios ta sventa ac'o suticuc tal ta stojol li steclumale
1C'alal xvaxquibal u stsacoj xchibal jabil yochel ta ajvalilal li Darioe, ital c'opanatuc yu'un Muc'ul Dios li j'alc'op Zacarías#Esd 4.24—5.1; 6.14; Neh 12.16. xnich'on Berequías, smomnich'on Iddoe. Jech i'albat:
2-3“Vu'un li Muc'ul Diosun ti ta jpas ta mantal scotol te ta vinajele, tsots li'ilin ta stojol li amoltot ayame'ique. Ja' yu'un jech xavalbe li achi'iltac li' ta orae: ‘Sutanic tal ta jtojol, jech chisut tal ta atojolic ec,#Is 55.7; Mal 3.7. vu'un chcal jtuc, vu'un li Muc'ul Diosune. 4Mu me ja'uc xachanic jech chac c'u cha'al la spasic li amoltot ayame'ique, ja' li boch'otic jech i'albatic yu'un li ba'yuc j'alc'opetique: Jech chal li Muc'ul Dios ti tspas ta mantal scotol te ta vinajele: Comtsanic li chopol be atamojique xchi'uc ti chopol c'usi chapasique, x'utatic. Pero muc xch'unic, muc xich'icun ta muc' vu'un li Muc'ul Diosune. 5Li' ta orae ¿bu oyic li amoltot ayame'ique? ¿Me sbatel osil cuxulic noxtoc li j'alc'opetique? 6Pero li jc'op xchi'uc li jmantaltac laj calbeic li cajtuneltac, ja' li j'alc'opetique, ic'ot ono'ox ta stojol li amoltot ayame'ique, jech isutic tal ta jtojol. La sna'ic ti vu'un Muc'ul Diosune, ti ja' jech la jpasbeic jech chac c'u cha'al stojol tsc'an li yabtelique xchi'uc li c'usitic la spasique’, uto”, xi li Muc'ul Diose.
Li Zacariase laj yil ta xch'ulel oy boch'o cajal ta ca'
7Ta chanib xcha'vinic (24) c'ac'al yochel xbuluchibal u Sebat ta xchibal jabil yochel ta ajvalilal li Darioe, oy c'usi laj yac'bun quil Muc'ul Dios, vu'un li j'alc'op Zacariasune, vu'un li xnich'onun Berequiase, vu'un li smomnich'onun Iddoe. 8Oy jun ac'ubal laj quil ta jch'ulel jun soldado cajal ta tsajal ca'. Te oy ta stenlejaltic ta o'lol bic'tal te'etic. Te ta spate te oy yan ca'etic, ja' tsojic, ic'ic'tic sba stsajal, xchi'uc saquic.#Zac 6.2-3; Ap 6.2-4. 9Ja' yu'un jech la jac': “Cajval, ¿boch'otic li soldadoetic cajajtic ta ca'e?”, xcut. Jech laj yalbun li boch'o te ta jchi'in ta lo'ile: “Vu'un ta xcalbot ava'ay boch'otic”, xiyutun. 10Li boch'o te oy ta o'lol bic'tal te'etique jech laj yalbun: “Le'e ja' tacbilic tal yu'un Muc'ul Dios, ja' tal xanic scotol li banamile”, xiyutun.
11Li soldadoetique jech laj yalbeic li yaj'almantal Dios te oy ta o'lol bic'tal te'etique: “Laj xa jxancutic scotol li banamile; mu'yuc c'op, lec jun yo'ntonic laj quilcutic”, xiic. 12Li yaj'almantal Diose jech laj yal: “Muc'ul Dios, vo'ot ti chapas ta mantal scotol te ta vinajele, ¿baq'uin to chlecub avo'nton ta stojol? ¿Baq'uin to chlic ac'uxubin li Jerusalén xchi'uc li lumetic ta Judá ti oy xa lajuneb xchanvinic (70)#Jer 25.11; 29.10; Zac 7.5. jabil la'ilin tal ta stojole?, xut.
13Li Muc'ul Diose ta lequil c'op ta sventa patub o'ntonal la stac'be tal li j'almantal te ta jchi'in ta lo'ile. 14Jech laj yalbun li j'almantale: “Jech xaval batel: ‘Li Muc'ul Dios ti tspas ta mantal scotol te ta vinajele jech chal: Toj ep c'ux ta co'nton li Jerusalene xchi'uc li Sione. 15Ja' yu'un ep chi'ilin ta stojol li yantic banamil ti mu c'usi xtal ta yo'ntonique. Yu'un c'alal ja'o ilinemun jutuc ta stojol li jteclumale, ja' ech'em laj yac'beic svocol. 16Ja' yu'un jech chcal vu'un li Muc'ul Diosune: Ta xlic jc'uxubin li Jerusalene, ta xcac' ta cha'pasel li ch'ulna cu'une xchi'uc li lumetique’, xi li Diose”, uto xiyutun.
17Jech to laj yalbun li j'almantale: “Jech xaval noxtoc: ‘Jech chal li Muc'ul Dios ti tspas ta mantal scotol te ta vinajele: Li lumetic cu'une ta to jbusanbe ep slequilalic. Li Sione ta jmuq'uibtasbe yo'nton; li Jerusalene ja' jt'ujbil lum ta xc'ot cu'un yan velta’,#Is 44.26; 51.3; 61.4; Zac 2.12. xi li Muc'ul Diose, uto”, xiyutun.
Li Zacariase i'ac'bat yil ta xch'ulel cachuetic xchi'uc jtentaq'uinetic
18Ts'acal lic jtoy jsat noxtoc; laj quil chanib cachuetic. 19Jech la jac'be li j'almantal te ta jchi'in ta lo'ile: “¿C'usi smelol le'e?”, xcut. Jech laj yalbun: “Li cachuetic le'e ja' stsatsalic li boch'otic la spuquic batel li Judá, li Israel, xchi'uc li Jerusalene”, xiyutun.
20Li Muc'ul Diose laj yac'bun quil noxtoc chanib jtentaq'uinetic. 21Jech la jac'be: “¿C'usi tal spasic li jtentaq'uinetique?”, xcut. Jech laj yalbun: “Ja' talem sniquesic li chanib cachuetic ti la spuquic batel li Judae ti mu junuc boch'o ivu' yu'un la snet'be batel li sjolique. Pero li jtentaq'uinetic le'e ja' talem sc'ocbeic xulub li yantic banamil ti la xulic li Judae xchi'uc ti la spuc sba batel yu'unic li jnaclumetique”, xi li Diose.
Currently Selected:
Zacarías 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.