Nahúm 3
3
1Ay, toj abul aba, jmilvanej lum.
Nojemot ta puru epalc'op xchi'uc ta uts'intavanej;
me jutuc mu'yuc spajeb li c'usitic chata ta pojele.
2Xlach'lun no'ox li nucule;
squits'lajet no'ox li yacan caretaetique.
Xvil no'ox tal ta anil li ca'etique;
toyolic no'ox xbit tal li caretae.
3Xyolobaj no'ox tal ta anil li ca'etique;
sts'aylajet no'ox tal li espadae;
xjaplajet no'ox tal li lanzae.
Bats'i ep boch'o yayijem chcom;
bats'i ep animaetic, mu xlaj ta atel.
Ta smilbil viniquic xa no'ox te tsbosi yacanic o.
4Ja' ta scoj smul li Nínive ti xco'laj xchi'uc jmulavil antse
ti toj c'upil sbae, ti stuc xa no'ox jeche,
ti lec chanem ta ac'chamel, xchi'uc c'usitic yan xu' yu'un tspase,
ti la slo'la yantic banamil, yantic lumetic
ta scoj li mulil tspase, xchi'uc ta scoj li c'usi sna' spasele.
5Li Muc'ul Dios ti tspas ta mantal scotol te ta vinajele jech chal:
“Vu'un li' oyun sventa chtal jcontrainot.
Ta jvalc'un muyel c'alal ta asat li atseque,
yu'un ta xcac'ot ta ilel ta stojol yantic banamil;
ta xcac'be yilic ajvaliletic li abec'tal ti bu q'uexlal sba chava'ye.
6Ta xcac' tal ic'ubal ta sba avac'ol;
ta jsoques ac'oplal;
ta jcomtsanot jech chac c'u cha'al c'a'ep.
7Scotol li boch'o ta xilote
ta xjatovic batel ta anil, jech chalic:
‘¡Li Ninivee ta xyavnaij o!
¿Boch'o to xu' chc'uxubin?
¿Bu ta jtatic boch'o chtal spatbe yo'nton?’, xiic.
8¿Me vo'ot xjelov to alequil jech chac c'u cha'al li lum Tebas
te oy ta ti' uc'um Niloe?
Yu'un setubil lec ta vo', ja' xa snacleb c'otem li vo'e,
xchi'uc ja' xa coralton c'otem yu'un li nabe.
9Li Etiopía xchi'uc Egiptoe ja' stsatsal yo'nton cha'ay,
yu'un mu'yuc spajebal c'usi xu' yu'un;
li Fut xchi'uc Libiae ja' spasoj ta co'ol yo'ntonic xchi'uc.
10Pero laj ono'ox yich' chuquel batel ta yan banamil.
Li ololetic yu'une laj yich' t'omesbel xch'utic ta chiquin xoraltic.
Li viniquetic ti ich'bilic ta muq'ue la spasic canal tajimol xchi'uquic.
Li jpasmantaletic yu'unique chucbil ibatic ta cadena.
11Ja' no'ox jech ec li vo'ote chavich' yacubtasel;
ta xch'ay o avo'nton.
Ta xlic anac' aba ta scoj li avajcontrae;
chlic asa' boch'o chascoltaot.
12Li tsatsal coraltonetic avu'une
ja' jech chc'ot jech chac c'u cha'al yunin sat higo;
ti xlilet no'ox yalel me laj yich' lilinele.
13Li avajsoldadotaque xco'laj xa xchi'uc antsetic chc'ot.
Li sti' avosilale chjaman scotol sventa ch-och tal li avajcontrae.
Li sbajubiltac ti lec tsotsique chc'ac' ta c'oc' scotol.
14Lupo me ep ava'al ta sventa chacuxi ti c'alal te xa setubilote;
chapano me lec apojobbail.
Meltsano me lec li coralton avu'une;
vots'o me lec, teq'uilano me lec li ach'ele;
tsaco li smorteal ladrilloe.
15Pero ta ono'ox xavich' chiq'uel ta c'oc';
te chayulesot o li espadae.
Ac'o me bats'i epoxuc jech chac c'u cha'al c'ulub,
ac'o me solel bolemoxuc jech chac c'u cha'al bilixetic,
ta xculesot o ta j'ech'el jech chac c'u cha'al xve' c'ulubetic.
16Solel laj avepajes li jchonolajeletic avu'une,
xjelov to yepal jech chac c'u cha'al c'analetic ta vinajel.
Co'olic jech chac c'u cha'al li c'ulubetic
ti tstsac batel sve'elic, ti chvil batel xchi'uquique.
17Li banquilaletic avu'une
ja' jechic jech chac c'u cha'al c'ulubetic.
Li banquilal soldadoetic avu'une
ja' jechic jech chac c'u cha'al epal c'ulubetic,
ti jun yo'nton te bo'olic ta coralton c'alal oy sique.
Me iloc' li c'ac'ale,#3.17 C'ac'ale - Oy boch'o chalic jtotique. ta xvilic batel;
mu boch'o sna' bu chbat.
18“Ajvalil ta Asiria, ivayic li jchabichijetic avu'une;
ibat xa ta ip li banquilaletic avu'une.
Li ateclumale ta spuc sbaic batel ta vitsetic;
mu'yuc xa boch'o tstsob sutel tal.
19Mu'yuc bu xtaaj xpoxil o li atuch'emale;
mu stac' poxtael o li ac'a'emale.
Scotol li boch'o cha'yic c'u x'elan avocole
xcuxet xa yo'ntonic, ta spac' sc'obic.
Yu'un scotol laj yich' svocolic yu'un li achopolil ti mu'yuc spajebale”, xi li Muc'ul Diose.
Currently Selected:
Nahúm 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.