Levítico 1
1
Sc'oplal c'u x'elan chchic'beic smoton Dios
1Li Muc'ul Diose la sc'opan li Moisés te ta ch'ulna pasbil ta nucule. Jech laj yalbe:
2“Albo scotol li achi'iltac ta israelale, c'alal me oy boch'o chtal yac'bun jmotone, ja' ac'o yich'bicun tal li xvacaxique xchi'uc li xchijique.
3“Me vacax chaq'uic sventa chixchic'bicun jmotonine, ja' ac'o yaq'uic li stot ti bu ven leque.#Lv 22.18-20. Ti c'u cha'al xu' chquich'beique, te ac'o tal yaq'uic ta ti'ch'ulna pasbil ta nucul ta jtojol, vu'un li Muc'ul Diosune. 4Ac'o yac' sc'obic ta sjol li xvacaxique. Jech xu' chquich'beic sventa ta jch'aybeic o li smulique. 5Te ac'o yich' milel ta jtojol li vacaxe. Li paleetique, ja' li xnich'nabtac Aarone, ac'o yaq'uic ta jtojol li xch'ich'ale. Ts'acal ac'o svijic ta scajleb jmoton xchi'uc ta spat xocon te ta ti'ch'ulna pasbil ta nucule. 6Li boch'o chac' ta jtojol li vacax sventa chich' chiq'uele, ac'o xchobe loq'uel li snuculile, xchi'uc ac'o sbic'tal bojilan. 7Li paleetique ac'o spasic c'oc' te ta scajleb jmoton; ac'o yac'beic lec si'il. 8Ts'acal te ac'o scajanic li vacax ti bic'tal bojilanbile, xchi'uc li sjole, xchi'uc li xepualtac sbiquile. 9Ts'acal ac'o sapbeic lec li sbiquile xchi'uc li yacane. Li palee ac'o xchic' te ta scajleb jmoton, yu'un ja' chic'bil matanal ti lec mu yic' chc'ot ta jtojol, vu'un li Muc'ul Diosune.
10“Me chij, o me tentsun chaq'uic sventa chixchic'bicun jmotonine, ja' ac'o yaq'uic li stot ti bu ven leque. 11Te ac'o yich' milel ta jtojol ta jot xocon scajleb jmoton ta stuq'uil norte. Li paleetique, ja' li xnich'nabtac Aarone, ac'o svijic ta spat xocon scajleb jmoton li xch'ich'ale. 12Ts'acal ac'o sbic'tal bojilanic. Li palee ac'o bat scajan ta c'oc' te yo' bu tsanbil ta scajleb jmotone. Te ac'o scajan xchi'uc li sjole xchi'uc li xepualtac sbiquile. 13Ts'acal ac'o sapbeic lec ta vo' li sbiquile xchi'uc li yacane. Li palee ac'o xchic' scotol te ta scajleb jmoton yu'un ja' chic'bil matanal ti lec mu yic' chc'ot ta jtojol, vu'un li Muc'ul Diosune.
14“Yan me mutetic chich'ic tal sventa chachic'bicun jmotonin, vu'un li Muc'ul Diosune, ja' ac'o yich'ic tal jcotuc puruvoc stsu, o me stsumut. 15Li palee te ac'o xchic' ta scajleb li jmotone. Ac'o sc'ocbe sjol; ac'o spits'be yalel xch'ich'al ta jot xocon li scajleb jmotone. 16Ac'o sloq'uesbe li xchupanvo'e xchi'uc li sc'uc'umale. Ac'o yac' te ta sbusanbil tan ta xocon scajleb jmoton ta stuq'uil sloq'ueb c'ac'al.#1.16 C'ac'al - Oy boch'o chalic jtotic. 17Ac'o xlich'beic li xiq'ue, ac'o sjavic ta o'lol, pero mu me xtuch'ic o ta j'ech'el. Ts'acal ac'o xchic' te ta scajleb jmoton li palee yu'un ja' chic'bil matanal ti lec mu yic' chc'ot ta jtojol, vu'un li Muc'ul Diosune.
Currently Selected:
Levítico 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.