Lamentaciones 1
1
Yoc'tael lum Sión ta sventa ti chucbil ibat li yajvaltaque
1C'uxi ti xch'ijan xa icom li lum ti noj to'ox ta cristianoetique.
Toj muc' to'ox ta scotol yantic lumetic, pero ja' xa jech icom jech chac cha'al jun me'on ants.
Ajvalil to'ox yu'un yantic lum, pero ochem xa ta mozoil.
2Toj ep ta smil sba ta oq'uel ta ac'ubaltic; li ya'lel sate belijemic yalel ta xocon sat.
Li boch'o lec to'ox sc'anojan sba xchi'uque me junuc mu'yuc chtal patbatuc yo'nton.#Sal 69.20; Jer 9.17-19; 13.17.
Li boch'otic lec to'ox sc'opan sbaic xchi'uque ja' xa ch-ac'vanic ta c'abal ta mucul;
ipas ta yajcontra scotol.#Jer 30.13-14.
3Li Judae laj yich' chuquel batel ta yan banamil; te laj yich' vocol xchi'uc mozoinel.
Te xa oyic ta yantic lumetic; mu'yuc bu xu' chcux yo'nton o.
Itaat yu'un li jnutsvanejetique, te macal ic'ot ta be.
4Xch'ijan icom ta jyalel li sbelal Sione, yu'un mu'yuc xa boch'o chtal ta q'uel q'uin.
Ta ti'coraltonetique mu xa junuc boch'o chjelov te;
li paleetique xvicte-victeic ta oq'uel;
li tsebetique toj abul sbaic ta at-o'nton;
li lum Jerusalene toj ven tsots svocol cha'ay.#Is 3.26; Jer 14.2.
5Li yajcontrataque ja' xa jpasmantaletic ic'otic;
li boch'otic chopol yo'ntonic ta stojole toj jun xa yo'ntonic.
Yu'un i'ac'bat svocol yu'un Muc'ul Dios ta scoj ti ep la stoy sbae.
Li xnich'nabe chucbil ibatic; i'ic'bat batel yu'un li yajcontrataque.
6Ich'ay st'ujumal li Sión ti lec to'ox c'upil sbae.
Li banquilaletic yu'unique ja' xa jechic jech chac c'u cha'al te'tical chijetic ti xjotetic ta sa'el sve'elique.
Jeche' xa no'ox xjochoj sbaic ta anil ta scoj li jnutsvanejetic yu'unique.
7C'alal ja'o te chich' vocol ta yan banamil li Jerusalene,
it'ab ta yo'nton ti c'u x'elan to'ox oy ta vo'onee, yu'un ep to'ox c'usi oy yu'un.
C'alal i'och ta sc'ob yajcontrae, mu'yuc boch'o xtal coltaatuc yu'un.
C'alal i'ilat yu'un yajcontrataque, ilabanat ta scoj ti jinesbil xae.
8Li Jerusalene mu'yuc xa stu ch-ilat ta scoj ti la sa' tsots smule.
Li boch'otic yich'ojic to'ox ta muq'ue mu'yuc xa lec chilic, yu'un laj yilic ti yalem o ta q'uexlale.
Ja' yu'un li Jerusalene solel joybijem xa no'ox choc'ta sba.#Ez 16.35-37.
9Li sc'u' spoq'ue solel bonol ta xchopolil; muc snop li c'usi tsta ta ts'acale.
Toj labal sba ti iyal ta lume; mu'yuc boch'o chtal patbatuc yo'nton.
Muc'ul Dios, q'uelavil li jvocole; solel toj muc' xa yac'oj sbaic ta jtojol li cajcontrae.
10Li sc'ulejal lum Jerusalene i'ich'bat scotol yu'un li yajcontrae;#2 R 24.13; 25.13-17.
te sq'ueloj i'och yan lumetic ta ch'ulna yu'un.
Ja' i'och li cristianoetic ti avaloj mu xu' ch-ochic yo' bu chatsobvane.
11Scotol li jnaclumetic tee x'oc'olet ta sc'anel sve'elic;
solel la sjelic ta sc'ulejalic li sve'elique yu'un jech xu' to chcuxiic o.
Muc'ul Dios, q'uelavil li jvocole, yu'un yalemun ta lum ta j'ech'el.
12Vo'oxuc ti chajelovic li' ta bee,
¿me oy bu yan jech vocol chavilic jech chac c'u cha'al li jvocole?
Yu'un li Muc'ul Diose laj yac'bun tsots jvocol, yu'un ilic sc'ac'al yo'nton ta jtojol.
13Ta toyol to la stacbun yalel tal c'oc' ta jtojol, jech ic'unib c'alal ta jbaquil yu'un.
Laj yac'bun ch'ojon ta jbe jxaneb, jech lisut batel ta jva'lupat yu'un.
Toj abul jba licom yu'un, scotol c'ac'al oy jvocol o.
14Li jtoyobbaile chucul lec ta jnuc' jech chac c'u cha'al yabtejeb vacax,
pero ja' xchucoj ta sc'ob stuc li Cajvaltic Diose, jech mu'yuc xa jtsatsal o.
Li Cajvaltic Diose yac'ojun ta sc'ob cristianoetic, jech mu xu' ta jcolta jba o.
15Li Muc'ul Diose la sloq'uesbun batel ta jtojol li tsatsal viniquetic cu'un ti ja' chiscoltaicune.
La stacbun tal jtsob soldadoetic, yu'un tal smilbicun li soldadoetic cu'une.
Li Muc'ul Diose la xpech'bun ta teq'uel li jnaclumetic cu'un ti ja' jechic jech chac c'u cha'al tojol tsebetique,
ja' jech la spasbe jech chac c'u cha'al chich' pech'el ta teq'uel sat ts'usub sventa chich' pits'bel ya'lele.#Is 63.3; Jl 3.13; Ap 14.20; 19.15.
16Ja' ta scoj ti ep chi'oq'ue ti ep ta xloc' ya'lel jsate,
yu'un inamaj xa loq'uel ta jtojol li boch'o chispatbun co'ntone,
li boch'o chiyac'bun jcux co'ntone.
Li jnich'nabtaque muc xvinaj c'uxi ibatic,
yu'un ja' toj ech'em xu' yu'unic li cajcontracutique.
17Li Sione xbechet to sc'ob tsc'an coltael, pero mu'yuc boch'o chtal patbatuc yo'nton.
Yu'un li Muc'ul Diose laj yal mantal ti ac'o pasuc ta yajcontra Jacob li boch'otic nopol nacal xchi'uque.
Ja' yu'un li Jerusalene toj i'lal sba ta satic o.
18Li Muc'ul Diose tuc' c'usi tspas.
Yan li vu'une la jtoy jba ta sventa li mantaletic yu'une.
Lumetic, a'yo ava'yic ta acotolic, q'uelavilic c'u x'elan li jvocole.
Li querem tsebetic cu'une chucbil ibatic ta yan banamil.
19La jc'anbe vocol li boch'otic lec jc'anoj jba jchi'uque,
pero ja' no'ox laj yaq'uicun ta c'abal ta mucul.
Li paleetic xchi'uc li banquilaletic cu'une te isacch'ayic ta yut lum
ti c'alal te sbats'il sa'el sve'elic sventa chcuxiique.
20Muc'ul Dios, q'uelavil toj ep li jvocole;
ta xa stselub chca'ay li co'ntone.
Chc'unib co'nton chca'ay ti c'alal cht'ab ta co'nton ti toj ep la jtoy jbae.
Ta xoraltique oy milel ta espada;
ta yut nae oy milel noxtoc.#Jer 4.19; 9.21.
21Laj ya'yic ti xi'avet ta oq'uele,
pero mu'yuc boch'o tal spatbun co'nton.
Scotol li cajcontrataque laj ya'yic ti oy jvocole,
pero xcuxet xa yo'ntonic c'alal laj ya'yic ti vo'ot laj avac'bune.
Ac'o xa c'otuc ta pasel li c'usi avaloj ono'ox ta sventaique
yu'un jech ac'o staic ec jech chac c'u cha'al vu'une.
22Ac'o c'otuc ta atojol scotol li c'usitic chopol spasojique;
pasbo jech ec jech chac c'u cha'al laj apasbun ta scoj jtoyobbaile.
Toj ep ta jic' co'nton, solel ch-alub xa ya'yel li co'ntone.
Currently Selected:
Lamentaciones 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.