Baruc 1
1
La stsob sbaic ta sc'opanel Dios ta Babilonia li judioetique
1Li'i ja' svun Baruc ti la sts'iba ta Babiloniae. Li Baruque ja' xnich'on Nerías,#1.1 Ta sventa li Baruque chalic ti ja' la sts'iba li vun li'i. Q'uelo sliquebal svun Baruc. li Neriase ja' xnich'on Maasías, li Maasiase ja' xnich'on Sedequías, li Sedequiase ja' xnich'on Asadías, xnich'on Jilquías. 2Ja'o la sts'iba ta svucubal yual ta yo'obal jabil#1.2 Svucubal c'ac'al yual yo'obal jabil - Ja' van smelol ta yo'obal u, yu'un te chal ta 2 R 25.8 ti laj yich' jinesel li ch'ulna xchi'uc li muc'ta lum Jerusalén ta vucub c'ac'al yochel ta yo'obal u ta sbalunlajunebal jabil yochel ta ajvalilal li Nabucodonosore. Ja' ta vo'ob ciento xchi'uc vaquib yo'vinic (586) jabil sc'an xtal ta banamil li Cristoe. Li jabil chalic li'i ja' vo'ob ciento xchi'uc chib yo'vinic (582) jabil sc'an xtal li Cristoe. ti c'alal la stsalic xchi'uc la xchiq'uic Jerusalén li caldeaetique.
3Li Baruque laj yapta c'usi chal li vun te ta stojol Jeconías,#2 R 24.8-17; Jer 24.1. ja' li xnich'on Joaquín, ja' li muc'ta ajvalil ta Judae, xchi'uc ta stojol scotol li cristianoetic ti jayib te talemic ta ya'yele. 4Xchi'uc te oyic ec li yan banquilaletic xchi'iltac ta abtel li muc'ta ajvalile. Te oyic scotol cristianoetic c'alal ta muc' ta biq'uit ti jayib te nacalic ta Babilonia ta noch' uc'um Sude. 5C'alal laj ya'yique, scotolic i'oq'uic, xchi'uc laj yictaic ixim, xchi'uc la sc'opanic Muc'ul Dios. 6La stsob staq'uinic ti c'u yepal xu' yu'un chaq'uic jujunique. 7La staquic batel li taq'uin ta Jerusalene, ja' bat yac'beic li banquilal pale Joaquín, xnich'on Jilquías smomnich'on Salune, xchi'uc li yan paleetique xchi'uc ta scotol jteclum ti te xchi'uquic ta Jerusalene.#1.7 Ac'o me laj xa yich' jinesel li ch'ulnae, te to ta xich'ilanic ta muc' jutuc li Muc'ul Diose (Jer 41.5). 8C'alal iloc' batel li Baruque, ja' ta slajunebal c'ac'al yochel u Sivan#1.8 Sivan - Q'uelo Yotol Israeletic. ja'o la stsob scotol li c'usitic ts'u'iltasbil ta ch'ulna yu'un Muc'ul Diose, ja' ti elc'anbil ono'ox batele. Yu'un jech yo'nton tsc'an chich' sutel ta yosilal Judá li c'usitic pasbilic ta saquil taq'uin ti yac'ojbe spas li Sedecías#2 R 24.18—25.7. xnich'on Josías, ja' li muc'ta ajvalil ta Judae.#1.8 Te chal ta Esd 1.7-11 ti ja' muc'ta ajvalil te ta Persia banamil li Ciroe, ja' li boch'o la sutes c'usitic chtun te ta ch'ulna ta Jerusalene. 9Yu'un li Nabucodonosor, ja' li muc'ta ajvalil ta Babiloniae, la xchucan batel li Jeconías, xchi'uc banquilal jpasmantaletic, xchi'uc li j'abtel viniquetic ta Jerusalene;#2 R 24.14; Jer 24.1. te yic'anoj batel ta Babilonia.
10Jech laj yalic batel ta carta: “Li' ta jtacbotcutic tal taq'uin sventa chamanic matanal sventa chachiq'uic, xchi'uc matanaletic sventa chamilic sventa ch'ayubil mulil, xchi'uc pom, xchi'uc yantic matanaletic sventa chavaq'uic ta scajleb smoton li Muc'ul Dios cu'untique. 11C'anbeic vocol Dios ta stojol li muc'ta ajvalil Nabucodonosor li' ta Babiloniae xchi'uc li xnich'on Baltasar#Jer 29.7. ti c'u cha'al jaluc xcuxiic li' ta banamile jech c'u cha'al vinajel ti te oy oe. 12Ja' Cajvaltic chiyac'buncutic jtsatsalcutic, xchi'uc ja' chistojobtasuncutic. Ta xcac' jbacutic ta stojol li Nabucodonosor li muc'ta ajvalil ta Babiloniae, xchi'uc ta stojol li xnich'on ja' li Baltasar c'u cha'al ta spojuncutique. Te chituncutic yu'un ep c'ac'al, yu'un jech xu' chiyich'uncutic ta c'ux. 13C'opanbuncutic li Dios cu'untique, yu'un la jta jmulcutic ta stojol, jech yu'un yoquel mu'yuc lajem li sc'ac'al yo'nton ta jtojolcutic li Cajvaltique.
14“Ja' yu'un la jtacboxuc tal li jpoc vun li'i sventa chavaptaic ta tsoblebal te ta xch'ulna li Cajvaltique, me ta jun q'uin,#1.14 Q'uelo q'uin Yaxanetic ta st'unubil jujubel c'op. me ta jun c'ac'al baq'uin lec ta pasel chavilique. 15Jech xavalbeic:#1.15 Li sc'opanel Dios li'i voc'bil ta cha'voc': Ta sbae ja' ta l.15—2.10. Ja' sventa chalic ta jamal ti oy smulic li israeletique; Ta xchibale ta xlic ta 2.10—3.8. Ja' sc'oplal ta sc'anbeic vocol Dios ti ac'o sta scolelique, yu'un spatoj yo'ntonic ta sventa li c'usi i'albatic comel yu'un Dios li smoltot syame'ique. Ja' xco'olaj xchi'uc sc'opanel Dios ta Dn 9.4-19.
‘Li Dios cu'untique lec tuc' c'usi spasoj, yanuc li vu'utique lijyal ta q'uexlal jech chac c'u cha'al chc'otan ta pasel yu'unic li' ta ora li cristianoetic ta Judá xchi'uc li jnaclumetic ta Jerusalene, 16xchi'uc ajvaliletic cu'untic, xchi'uc jpasmantaletic, paleetic, j'alc'opetic, xchi'uc li jtot jme'tique.#Dn 9.7-10; Dn (dc) 3.29-31. 17Yu'un la jta jmultic ta stojol li Cajvaltique. 18Yu'un mu'yuc la jch'unbetic, mu'yuc la jchiquintabetic li smantal yac'ojbutic comel li Cajvaltique, ja' li Dios cu'untique. 19Yu'un ti c'alal iloq'uesatic ta mozoil yu'un Dios li jmoltot jyame'tic ta vo'one te ta lum Egipto xchi'uc c'alal to tanae, laj ono'ox jtoy jbatic ta stojol, mu'yuc la jch'unbetic li smantaltaque. 20Ja' yu'un la jta ep jvocoltic, jech ta chopol lijcom o, jech ono'ox laj yalbe Moisés li Cajvaltic c'alal iloq'uesatic tal ta Egipto li jmoltot jyame'tic c'alal i'ac'batic li banamil ti bu chloc' lec ya'lel xchu' vacax xchi'uc pome jech chac c'u cha'al chc'ot ta pasel li' ta orae.#Dt 28. 21Li vu'utique mu'yuc la jch'unbetic li smantal Dios cu'untic ti laj yalbutic li j'alc'opetic ti la stacbutic tale. 22Jujuntal la jpastic c'usi chopol tsc'an co'nton jtuctic, ja' laj quich'betic ta muc' sdiosic li yantic lumetique, jech la jpastic c'usi chopol chil li Dios cu'untique.
Currently Selected:
Baruc 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.