2 Crónicas 1
1
Li Salomone la sc'an sbijil ta stojol Dios
(1 R 3.3-15)
1Li Salomón xnich'on Davide toj lec ibat li yabtel ta ajvalilale, yu'un icoltaat yu'un li Muc'ul Dios yu'une. Ech'em i'ac'at ta ich'el ta muc'. 2Li Salomone lic stac ta iq'uel scotol li israeletique, li banquilaletic yu'un jmil, li banquilaletic yu'un vo'vinic (100) soldadoetique, li jchapanvanejetique, xchi'uc scotol li banquilaletic yu'un israeletique, ja' li banquilaletic ta jujuchop sbiique. 3Laj yic' batel scotol ta Gabaón, yu'un ja' te oy li ch'ulna pasbil ta nucul ti la spas ono'ox te ta xocol banamile li Moisese, ja' li yajtunel Muc'ul Diose. 4Yu'un li Davide laj ono'ox yich' jelovel ta snail li xcaxail smantal Dios ti te to'ox oy ta Quiriat-jearime, yu'un la spasbe jun scarpanail te ta Jerusalén.#2 S 6.1-17; 1 Cr 13.5-14; 15.25—16.1. 5Jech noxtoc li scajleb smoton Muc'ul Dios pasbil ta bronce ti la spas li Bezaleel#Ex 38.1-7. xnich'on Uri, smomnich'on Hure, te oy ta stuq'uil li ch'ulna pasbil ta nucul te ta Gabaone. Ja' te bat sjac' ta stojol Dios c'usi tspas xchi'uc xchi'iltac li Salomone.
6Li Salomone imuy batel ta stuq'uil li scajleb smoton Muc'ul Dios te ta stuq'uil ch'ulna pasbil ta nucule. Te la xchic' jmil (1,000) ta cot smoton Dios.
7Te no'ox ta yac'ubalil laj yac' sba ta ilel ta stojol Salomón li Diose, jech i'albat: “C'anbun li c'usi chac'ane, vu'un chacac'bot”, x'utat.
8Li Salomone jech laj yalbe li Diose: “Li jtot Davide toj lec laj ac'uxubin. Ta sventa ti vu'un laj atic'un ta xq'uexole, 9ja' yu'un Muc'ul Dios, c'otuc me ta pasel avu'un c'usi laj avalbe li jtote, yu'un vo'ot laj atic'un ta ajvalilal ta sventa li epal cristianoetic ti ja' jech yepalic jech chac c'u cha'al pucuc ta banamile.#Gn 13.16; 28.14. 10Ja' yu'un ac'bun lec jbijil; ac'bun lec jna' c'u x'elan ta jcolta li jchi'iltac li'i. ¿Boch'o xu' yu'un tsventain li ateclumal li'i ti yan to sba yepale?”, xut.
11Li Diose jech laj yalbe li Salomone: “Ta sventa ti toj lec c'usi oy ta avo'ntone, yu'un muc ja'uc xac'anbun ac'ulejal, xchi'uc c'usitic oy avu'un, xchi'uc muc xac'an ich'el ta muc', muc xac'anbun xchamel avajcontratac, muc xac'anbun ti jal ac'o cuxiane; ja' no'ox laj ac'anbun abijil, xchi'uc ti ac'o ana' lec c'u x'elan chaventain li jteclum cu'une, yu'un vo'ot la jtic'ot ta ajvalilal, 12ja' yu'un chacac'bot li abijile, xchi'uc ti ac'o ana' lec c'usi chapase. Chacac'bot noxtoc ac'ulejal xchi'uc c'usitic oy avu'un, xchi'uc chacac'ot ta ich'el ta muc'. Mu'yuc ono'ox jech staojic li yantic ajvaliletic ti ba'yuc ijelovique, xchi'uc mu'yuc jech tstaic li yantic ajvaliletic ti ta to xtalique”, x'utat.
13Li Salomone iloc' batel ta ch'ulna pasbil ta nucul te ta Gabaón; isut batel ta Jerusalén. Jech lic sventain o scotol li israeletique.
Li Salomone la sman, la xchon ep caretaetic xchi'uc ca'etic
(1 R 10.26-29; 2 Cr 9.25-28)
14Li Salomone lic stsob li caretaetic xchi'uc cajlebal ca'etic sventa pleitoe. Ja' jmil xchi'uc chanib ciento (1,400) caretaetic, xchi'uc lajcha'mil (12,000) cajlebal ca'etic.#1 R 4.26. Laj yac' tunuc ta sventa pleito, xchi'uc te icom ta Jerusalén sventa ajvalil. 15Li ajvalile solel i'epaj yu'un c'anal taq'uin, saquil taq'uin te ta Jerusalén, busul no'ox jech chac c'u cha'al ton.#Dt 17.17. Xchi'uc la sboles ep ch'ut te'etic jech chac c'u cha'al te'tical higoetic ta stenlejaltic. 16Li jmanulajeletic yu'un ajvalile la smanic tal ep ca'etic xchi'uc lequil poq'uetic te ta Egipto sventa li ajvalil Salomone.#Dt 17.16. 17Li stojol jcot careta chlic tal ta Egipto yu'unique ja' vaquib ciento (600) ta sep saquil taq'uin. Li jcot ca'e ja' o'lol xchibal cien (150) ta sep saquil taq'uin. Li ajvaliletic yu'un hetetic xchi'uc siriaetique ja' xa te la smanbeic batel ec li svinictac Salomone.
Currently Selected:
2 Crónicas 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.