1 Timoteo 1
1
Patub o'ntonal
1Vu'un Pabloun, vu'un yajtacbolalun li Jesucristoe, ja' ta smantal li Diose, ja' li Jcoltavanej cu'untique, xchi'uc li Cajvaltic Jesucristoe, ja' ti jpatoj co'ntontic oy c'usi ta jmalatic ta sventae. 2Chabanucot chacalbot tal, Timoteo,#Hch 16.1-3. vo'ot li mero jnich'onot ta sventa ti laj ach'un li sc'op Dios laj calbote. Ac'o yac'bot bendición li Jtotic Diose xchi'uc li Cajvaltic Jesucristoe; ac'o xc'uxubinot, ac'o spasbot ta jun avo'nton.
Bijubtasel ta sventa jlo'lavanej jchanubtasvanejetic
3C'alal chibat xa'ox ta Macedonia banamile, laj calbot ti vo'ot te chacom ta Éfeso sventa ac'o avalbe mantal li boch'otic ta xchanubtasvanique ti mu me c'usiuc no'ox xaq'uic ta chanele, 4xchi'uc ti mu me stuc'ulanic li c'usiticuc no'ox lo'ilale, xchi'uc li sc'oplal smoltot syame'ic ta vo'one ti mu xlaj ta alel o yu'unique. Le'e ja' no'ox xu' chlic jtsaquilan jbatic o ta c'op yu'un. Mu xiscoltautic ta xch'unel li c'usi oy ta yo'nton Diose.
5Ti jech chacalbote, ja' sventa ac'o jc'anan jbatic, yu'un jech chvinaj ti lecuben xa co'ntontic ta melele, xchi'uc ti tuc' c'usi oy ta jol ta co'ntontique, ti muc nacauc no'ox ta jcuy jbatic ti jch'unojtique. 6Oy xa boch'o la scomtsanic xch'unel jech chac le'e, jech te ich'ay o batel xchi'uquic li c'usitic chalilanic ti mu'yuc stue. 7Tsc'an chc'otic ta banquilal jchanubtasvanejetic ta smantal Dios, pero mu xa'ibeic smelol li c'usi ta xalique, xchi'uc mu xa'ibeic smelol li c'usi ta xchanubtasvanic ti melel xa scuyojique.
8Pero li vu'utique ta jna'tic ti oy lec stu li smantaltac Dios me jna'tic stunesel jech chac c'u cha'al tsc'ane. 9Tsc'an ta jna'tic, li mantaletique ma'uc ac'bil ta sventa li boch'o lequique. Ja' ac'bil ta sventa li jtoybaetique, li jbajmantaletique, li boch'otic ven chopolique, li jpasmuliletique, li boch'o mu xich'ic ta muc' Diose, li boch'otic tsbajic c'usitic voc'bil ta sventa Diose, li jmilvanejetique, xchi'uc boch'o ta smil stot, o me sme'ique, 10xchi'uc li boch'o ta xmulivajique, xchi'uc ti chmulivajic ta xchi'il no'ox sbaic ta vinicale, xchi'uc li boch'o ta xchonvanic ta mozoile, xchi'uc li j'epalc'opetique, xchi'uc li boch'o tst'abbeic sbi Dios ta sventa yepalc'opique, xchi'uc li boch'otic ta scontrainic li lequil chanubtasele. 11Ja' li Lequil A'yej ti toj jun yutsile, ti laj yac'bun jventain li Dios ti ech'em slequile.
“Coliyalbun Cajvaltic ti la xc'uxubinune”, xi Pablo
12Coliyalbun Cajvaltic Jesucristo ti laj yac'bun jtsatsale. Yu'un la spat yo'nton cu'un, jech laj yic'un ta yajtunel. 13Ac'o me ep to'ox c'usi yan xquich' xcal ta stojol, laj to'ox jcontrain#Hch 8.3; 9.4-5. xchi'uc la jchopolc'opta. Pero la xc'uxubinun, yu'un mu to'ox jna'be smelol, yu'un mu'yuc to'ox jch'unojbe li sc'ope. 14Toj ech'em la xc'uxubinun li Cajvaltique. Laj yac'bun xch'unojel co'nton, xchi'uc laj yac' ti chic'anvane; ja' jech ta jtatic ta sventa li Jesucristoe.
15Ja' melel li c'op li'i; ja' tsc'an ac'o yich' ch'unel. Li Jesucristoe i'ay ta banamil, ay scolta jpasmuliletic. Vu'une ech'em la jsa' li jmule; ja' mu sta jech li yantique. 16Pero la xc'uxubinun li Jesuse, yu'un jech laj yac' ta ilel ta jventa ti toj muc' yo'ntone, yu'un jech ac'o yilic ti xu' tsta xcuxlejalic sbatel osil ec li boch'otic ta xch'unique. 17Ja' yu'un ja' ac'o quich'tic ta muc', ja' ac'o calbetic slequilal stuc li Muc'ta Ajvalil cu'untic ta sbatel osile. Ja' li Dios ti mu sna' xcham oe, ti mu xquiltique, ti ja' no'ox stuc Dios cu'untique. Jechuc.
18Timoteo, vo'ot ti xco'laj xchi'uc jnich'onote, ja' jech li bijubtasel chacac'bote. Ja' co'ol jech chac c'u cha'al i'ac'bat sna'ic yu'un Dios ti laj yalic ta aventae, jech ac'o me persa scontrainel li c'usi chopole. 19J'ech'el me oyuc o xch'unojel avo'nton, xchi'uc staojuc o me yav tuc' c'usi oy ta ajol ta avo'nton. Oy boch'o la sbajic c'usi i'ac'bat sna'ic yu'un li sjol yo'ntonique, ja' yu'un ich'ay li xch'unojel yo'ntonique. 20Ja' jech ic'ot ta pasel ta stojol li Himeneo xchi'uc Alejandroe. Le'e laj caq'uic ta sc'ob banquilal pucuj, yu'un jech ac'o xchanic ti mu me xchopolc'optaic li Diose.
Currently Selected:
1 Timoteo 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.