Mahlu 1
1
Chisʋs Klaist a̱ haknip imma isht ai in tikba ʋhleha, 1, 18 Shilom bish Holitopa yak osh ik yohmi ai ahni pulla na, Chisʋs ʋt ohoyo himita hatak haleli keyu Meli hohchifo mako̱ im ai ʋtta.
1Eblaham isht ai unchululi, Lewi a̱ Ushi, Chisʋs Klaist ʋtta tok isht annoa holisso hoke.
2Eblaham ʋt Aisaak a̱ tobachi tok; atuk o̱ Aisaak ʋt Chekob a̱ tobachi tok; atuk o̱ Chekob ʋt Chutas micha itibapishi ʋhleha aiena ka tobachi tok;
3Atuk o̱ Chutas ʋt Fales, micha Sala aiena ka Tama ya̱ a tobachi tok; atuk o̱ Fales ʋt Eslom a̱ tobachi tok; atuk o̱ Eslom ʋt Elam a̱ tobachi tok;
4Atuk o̱ Elam ʋt Aminatab a̱ tobachi tok; atuk o̱ Aminatab ʋt Naason a̱ tobachi tok; atuk o̱ Naason ʋt Salmon a̱ tobachi tok;
5Atuk o̱ Salmon ʋt Boas a̱ Lakab a̱ a tobachi tok; atuk o̱ Boas ʋt Obet a̱ Luti a̱ a tobachi tok; atuk o̱ Obet ʋt Chessi a̱ tobachi tok;
6Atuk o̱ Chessi ʋt mi̱ko Lewi a̱ tobachi tok; atuk o̱ mi̱ko Lewi ʋt Solomon a̱ Ulias tekchi atok a̱ a tobachi tok;
7Atuk o̱ Solomon ʋt Loboam a̱ tobachi tok; atuk o̱ Loboam ʋt Abia ya̱ tobachi tok; atuk o̱ Abia ʋt Esa ya̱ tobachi tok;
8Atuk o̱ Esa ʋt Chosafat a̱ tobachi tok; atuk o̱ Chosafat ʋt Cholam a̱ tobachi tok; atuk o̱ Cholam ʋt Osias a̱ tobachi tok;
9Atuk o̱ Osias ʋt Choahlam a̱ tobachi tok; atuk o̱ Choahlam ʋt Akas a̱ tobachi tok; atuk o̱ Akas ʋt Esekias a̱ tobachi tok;
10Atuk o̱ Esekias ʋt Manasses a̱ tobachi tok; atuk o̱ Manasses ʋt Amon a̱ tobachi tok; atuk o̱ Amon ʋt Chosaias a̱ tobachi tok;
11Atuk o̱ okla ha̱ Babulon ishtia̱ hosi foka ma, Chosaias ʋt Chekonias micha itibapishi ʋhleha aiena ka tobachi tok;
12Atuk o̱ okla ha̱ Babulon ishtona haya, Chekonias ʋt Salahliel a̱ tobachi tok; atuk o̱ Salahliel ʋt Solobabel a̱ tobachi tok.
13Atuk o̱ Solobabel ʋt Abiʋt a̱ tobachi tok; atuk o̱ Abiʋt ʋt Eliakim a̱ tobachi tok; atuk o̱ Eliakim ʋt Aso ya̱ tobachi tok;
14Atuk o̱ Aso ʋt Satok a̱ tobachi tok; atuk o̱ Satok ʋt Akim a̱ tobachi tok; atuk o̱ Akim ʋt Eliʋt a̱ tobachi tok;
15Atuk o̱ Eliʋt ʋt Eleasa ya̱ tobachi tok; atuk o̱ Eleasa ʋt Mattan a̱ tobachi tok; atuk o̱ Mattan ʋt Chekob a̱ tobachi tok;
16Atuk o̱ Chekob ʋt Meli, yʋmmak o̱ Chisʋs ʋt a tobʋt ʋtta tuk osh Klaist hohchifo ka, i̱ hatak Chosef a̱ tobachi tok.
17Yohmi hatok o̱ Eblaham a̱ ai ʋhlit it ai unchululit mihinti kʋt Lewi a̱ ant ai ʋhli kʋt moma kʋt it ai unchululi auah ushta hoke: yohmikma Lewi a̱ ai ʋhlit mihinti kʋt okla ha̱ Babulon ishtia tok a̱ ant ai ʋhli kʋt it ai unchululi auah ushta hoke; yohmikma okla ha̱ Babulon ishtona tok a̱ ai ʋhlit mihinti kʋt Klaist a̱ ant ai ʋhli kʋt it ai unchululi auah ushta hoke.
18Chisʋs Klaist ʋttahpi ka ilʋppak osh a yakohmi tok; ishki Meli ʋt Chosef a̱ im ʋlhpoa tok ʋt, ik it im ono ki̱sha ho̱, Shilombish Holitopa ya̱ ʋlla i̱ shali tuk osh otʋni tok.
19Yohmi ma i̱ hatak Chosef ʋt hatak achukma hatuk osh, nana ʋlhpisa ʋt onʋtula hi a̱ ik ahno mʋt, lumʋt kancha hi ʋt im anukfila tok.
20Yohmi kia ilʋppa puta ka anukfihinli tuk osh holhpokuna ma, Chihowa im enchil ʋt ant i̱ haiaka cha, Chosef Lewi ushi chia ma! chi tekchi Meli a̱ ishi ik chi nukwiyo kashke; Shilombish Holitopa ak atuk mak o̱ yʋmmak okʋt toba hosh afoyuka hoka.
21Yohmi ka ʋlla‐nakni o̱ sholikma, hohchifo ha̱ Chisʋs ish hochifa hi oke; yʋmmak osh im okla talaia ai im ashʋ chika puta ma ai i̱ hlakoficha hi oka, achi tok.
22-23Chihowa hʋt hopaii ya̱ isht ai anumpulit, Ohoyo himita hatak haleli keyu hosh chakalit ʋlla nakni o̱ shola he; mikma hohchifo ha̱ Immanuel, yʋmmʋt toshowak mʋt, Chihowa hʋt piba fo̱ka, achi mak o̱ okla hochifa hi oke, achi tok mak o̱ ont ai a̱hla chi̱ ho̱, ilʋppa moma kʋt yʋmmohmi tok.
24Yohmi ma Chosef ʋt nusi tuk ʋt okcha mʋt, Chihowa im enchil ʋt ai i̱ miha tuk mak o̱ yʋmohmi mʋt, tekchi a̱ ilaueli tok.
25Yohmi kia ik it apoto ki̱sha ho̱, ʋlla‐nakni ishi ahpi kʋt sholi tok: mihma hohchifo ha̱ Chisʋs hochifo tok.
Currently Selected:
Mahlu 1: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913