SAKARIA 1
1
Omuwa ti ithana aantu ye, ya galukile kuye
1Momwedhi omutihetatu gwomumvo omutiyali Darius sho a li omukwaniilwa gwaPersia, Omuwa okwa gandja elaka komuhunganeki Sakaria yaBerekia, omutekulu gwaIddo. 2Omuwa Omunankondoawike okwa lombwele Sakaria, a lombwele iigwana a tye: “Ngame, Omuwa, onda li nda geele oohokulu, 3ihe ngashingeyi otandi mu lombwele: ‘Galukileni kungame, nangame otandi galukile kune.’ 4Inamu fa oohokulu. Aahunganeki oye ya lombwele nale oohapu dhandje, ye ethe oondjila dhawo oombwinayi niilonga yawo yaa fele. Ihe inaa pulakena ndje yo inaa vulika kungame. 5Oohokulu naahunganeki mboka kaye ko we. 6Aamati yandje aahunganeki oya gandja koohokulu omalombwelo nomalondodho gandje, ihe oye ga dhini noya monithwa iihuna. Nena oyi itedhulula noya tseya kutya ngame, Omuwa Omunankondoawike, onda li nde ya geele, ngaashi yi ilongele nonde shi utha, shi tye ngaaka.” 7Momumvo omutiheyali sho Darius a li omukwaniilwa, mesiku etimilongo mbali netine lyomwedhi omutimulongo nogwotango (omwedhi Shebat) Omuwa okwa lombwele ndje memoniko uusiku. 8Onda mono omuyengeli gwOmuwa a londa okakambe okatiligane. Okwa thikama mokati komiti omimirte molusilu, nokonima ye kwa li uukambe uukwawo — uutiligane, uukanga nuutokele. 9Onde mu pula: “Tatekulu, uukambe mbuka otau holola shike?”
Okwa yamukula a ti: “Otandi ku ulukile shoka tau holola. 10Omuwa okwe u tumu u ye u ka ndaadhe evi.” 11Uukambe owa hokololele omuyengeli tau ti: “Otwe endagula akuhe notwa dhimbulula uuyuni auhe owa mwena nou na ombili.”
12Nena omuyengeli okwa ti: “Omuwa Omunankondoawike, ongoye wa geele Jerusalem niilando yaJuda omimvo omilongo heyali ngashingeyi. Sigo uunake tashi kala ngawo inoo yi hololela esilohenda lyoye?”
13Omuwa okwa hekeleke omuyengeli noohapu dho opala, 14nomuyengeli okwa lombwele ndje, ndi uvithe shoka Omuwa Omunankondoawike a ti: “Ondi na ohole yomuule noshimpwiyu molwaJerusalem, oshilando shandje oshiyapuki, 15nokandi na ombili nande niigwana mbyoka tayi nyanyukwa ya thuwa yi na ombili. Oshoka sho nda li nda geele aantu yandje, iigwana mbyoka oya gwedhele ko kuuwehame waantu yandje. 16Onkee onda galukile kuJerusalem, ndi hololele oshilando esilohenda. Otempeli yandje otayi ka thikamekululwa, noshilando otashi ka tungululwa?”
17Omuyengeli okwa lombwele ndje wo, ndi uvithe te ti: “Omuwa Omunankondoawike, ota ti kutya iilando ye otayi ka ninga iinelago ishewe noye ta ka kwatha natango Jerusalem notashi ka kala oshilando she mwene.”
Emoniko lyooniga
18Memoniko ekwawo onda mono ooniga ne dhoondumetana. 19Onda pula omuyengeli ngoka a li ta popitha ndje: “Ooniga ndhoka otadhi holola shike?”
20Oye a yamukula: “Otadhi holola oonkondo dhuuyuni ndhoka dha halakanitha aantu yaJuda, Israel naJerusalem.”
21Onda pula e te ti: “Aantu mbaka oye ya okuninga shike?”
Okwa yamukula a ti: “Oye ya okuhalutha nokudhenga iigwana mbyoka ya lyatagula evi lyaJuda noya halakanitha aantu yalyo.”
Currently Selected:
SAKARIA 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.