RUT 1
1
Elimelek naangandjawo taa tembukile kuMoab
1-2Konalenale manga muIsrael kaamwa li omukwaniilwa, oshilongo osha adhika kondjala. MuBetlehem shaJuda omwa li omusamane Omuefrata, edhina lye Elimelek. Pamwe nomukadhi Naemi noyanamati Maklon naKilion Elimelek okwa tembukile kuMoab, ya kale ko. Manga nee ya li ko, 3Elimelek okwa mana oondjenda, Naemi e ta kala noyana, 4mboka ya li ya hokana aakadhona Aamoabi, Orpa naRut. Sho pwa piti omimvo omulongo, 5Maklon naKilion oya mana wo oondjenda, Naemi e ta kala po kee na omulumentu noyana.
Naemi naRut taa yi kuBetlehem
6Konima yethimbo Naemi okwa kundana kutya Omuwa okwa yambeke aantu ye muJuda e ya pe eloolo. Osho ngaaka okwa thigi po Moab e ta yi niitenya ye. 7Oyi idhenge mela lyondjila, opo ya shune kuJuda, ihe mondjila 8Naemi okwa ti kiitenya ye: “Shuneni kaandjeni. Omuwa ne mu pe uuwanawa, ngaashi mwa kala nawa nangame nonaasi yandje. 9Omuwa na pe kehe gumwe ompolo yokuhokanwa, a mone egumbo.”
Osho ngaaka Naemi okwe ya laleke nohole. Ihe oya tameke okulila 10taa ti kuye: “Aawe, kuku. Otatu yi nangoye koyaandjeni.”
11Naemi okwe ya yamukula ta ti: “Shuneni, aamwandje. Omolwashike mwa hala okuya nangame? Omu shi, otandi mono we aamati, ye mu hokane? 12Indeni kaandjeni, oshoka ngame onda kulupa, ite hokanwa we. Nonando nee ndi tye, ondi na etegameno lyehokano ongulohi ndjika, ndi mone aamati, 13otamu ya tegelele tuu, ye mu adhe ye mu hokane? Aawe, aamwandje, omu shi shi kutya itashi vulika. Omuwa okwa fupipike ndje, ngame nondi na shili ohenda nane.”
14Iitenya ye oya tameke okulila ishewe. Opo ihe Orpa a hupita yinamweno e ta shuna koyaandjawo, ihe Rut okwa tindile po puye. 15Naemi okwa ti kuye: “Uutenyuukweni okwa yi koyaandjawo nokookalunga ke. Inda naye.”
16Ndele Rut okwa yamukula: “Ino tya, nii ku thige po. Pitika ndje, ndi ye nangoye. Nankoka to yi, oko te yi wo, naankoka to kala, oko nda hala okukala wo. Aangandjoye otaa ka ninga aangandjetu, ngaashika Kalunga koye ota ka kala Kalunga kandje wo. 17Mpoka to sile, nangame wo opo tii ka sila nopo wo pombila yandje. Omuwa na geele ndje nayi, ngele tandi ku etha, shila eso tali tu topola.”
18Ano Naemi sho a mono kutya Rut a tindile metokolo lye okuya pamwe naye, okwa ti ashike thilu.
19Oya yi sigo okuBetlehem. Sho ya thiki ko, omukunda aguhe ogwa tukuluka, aakulukadhi e taa igidha taa ti: “ONaemi tuu shili nguno?”
20Nguka okwa yamukula: “Inamu tya ndje we Naemi, tyeni shila Mara, oshoka Kalunga Omunankondoawike okwa monitha ndje uululu. 21Sho nda zile mpaka, onda li omuyamba, ihe Omuwa a galula ndje ndaa na noluthipathipa. Oshike tamu ithana ndje Naemi, Omuwa sho a pangula ndje, nOmunankondoawike sho u unzile ndje momupya?”
22Osho ano ngaaka Naemi a zile kuMoab pamwe naRut, oshitenya she Oshimoabi. Sho ya thiki muBetlehem, eteyo lyiishokelya olya li opo lya tameke.
Currently Selected:
RUT 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.