MIKA 1
1
1Methimbo ndyoka Jotam, Ahas naHiskia ya li aakwaniilwa yaJuda, Omuwa okwa pe Mika gwokuMoreshet elaka memoniko kombinga yaSamaria naJerusalem.
Okuyematela Samaria naJerusalem
2Uvii ko shika, ne iigwana;
pulakeneni, ne aakwambandayevi amuhe!
Omuwa Omupangeliawike
ote ke shi mu tompela.
Pulakeneni! Ote shi popi motempeli ye ondjapuki.
3Omuwa ote ya ta ziilile kehala lye eyapuki;
ota ka kuluka e te ende koondundu.
4Kohi yoompadhi dhe
oondundu otadhi hemuka dha fa ezi momulilo;
otadhi ka kungulukila momasilu,
ngaashi omeya taga kunguluka kondundu.
5Ayihe mbika otayi ka ningwa, oshoka oshigwana shaIsrael osha yono nosha tsa ondumbo naKalunga. Olye ta pewa uusama molwokwaavulika kwaIsrael? OSamaria, oshilandopangelo! Olye e na ondjo yiimenka muJuda? OJerusalem! 6Omuwa ota ti ngeyi: “Samaria otandi shi ningi ondumba yomakulukuma meyalala, ehala lyokutsika omiviinu. Otandi ke ekelahi omamanya gasho molusilu, notandi ka holola omukanka gwoshilando puuyelele. 7Iimenka yasho ayihe ya hambulikika otayi ka tatagulwa miitandu noshaa shoka sha pelwe oohonda dhomootempeli dhasho, otashi ka lungunithwa po nomulilo. Iiyelekela yasho ayihe otayi ka ninga ondumba ye ekelwahi. Samaria osha pula iinima mbika yokweetitha oluvalo, nongashingeyi aatondi yasho otaa yi nayo, yi ka simanekwe palwe.”
8Nena Mika okwa ti: “Shika osho tashi lilitha ndje e te hekumuna. Ote holola oluhodhi lwandje mokweenda oompadhi dhowala nokukala omudhu. Ote kugu nda fa ombandje note pumbu nda fa ompo. 9Samaria iilalo ye itayi vulu okwaaludhwa, naJuda ota ka adhika komahepeko tuu ngoka; eyonuko olya adha omiyelo dhaJerusalem, moka aantu yandje ya kala.”
Omunandumbo oti ikokele muJerusalem
10Aatondi yetu muGat inamu ya hokololela okusindika kwetu; inamu ya talitha omayeme geni. Aantu yomuBet Leafra, hololeni etekomukumo lyeni mokugalangata montsi! 11Ne aantu yomuShafir, indeni muupika mu li omudhu nomwa sa ohoni. Mboka ya kala muZaanan, itaa yelekele nando okuza mo moshilando shawo. Uuna tamu uvu aantu yomuBetezel taa lili, otamu ka tseya kutya kaku na nando egameno. 12Aantu yomuMarot oya tegelela nehalo enene epupaleko, oshoka Omuwa okwe etele Jerusalem oshiponga she mu kundukidha. 13One mboka mwa kala muLakish, kutileni uukambe komatembakwiita. One mwa holele uulunde waIsrael nomwa fala Jerusalem muulunde. 14Shigwana shaJuda, laleka oshilando Moreshet Gat. Aakwaniilwa yaIsrael itaa ka mona nando ekwatho tali zi kuAksib.
15Aantu yomuMaresha, Omuwa ote mu gandja kaatondi, mboka taa ka kwata po oshilando sheni. Aawiliki aasimanekwa yaIsrael otaa ka holama mekololo lyaAdullam. 16Shigwana shaJuda, kulula ko omafufu goye mokulilila aamwoye aaholike. Ningeni oongwala mwa fa oontsa, oshoka aamwoye otaa ka falwa muupongekwa.
Currently Selected:
MIKA 1: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.