2 Pedro 1
1
Pedro itijwile papo Sinia' jilis
1Asampey japo i'lijwas, ya'am Simón Pedrok'i'm, Sijwajieti Jesús jikawo, jla'yi ti jijliujwanik'i'm. Atajiet'ase siu'nie ip'isinik, asa'am ti po' siunie astankiujnieye ti ijiate ti 'es jla'yi ti ijiate ti laja po', iyoye'ate pet siu'nie sitienkiujnieye ti po', ka lajak'i ki iyo pi Sinia' ti Sijwajieti Jesús,#Tit 2.13 ti ijiate jla'am ti tijnajyi ni iyoyi. 2Siuti intant'iejayi ni Sinia', jla'yi ni Saka'niona Jesús, 'esiji ka wujwa ka imp'elisina', siu'neje ka akamajape.
Ji'niayi iyo ni i'nio' ti iyo ka 'esie jitieyi'i pi Sinia'
3Pa Sinia', ka lajak'i ki iyo ni jijweye, 'yina iwints'e'm wikie'eyi siunie iyo ni asetiana, jana si'wasankiye ti t'o'n ti kasjwesiejenk'iye, siu'neje ni siunie aniwonaja ti awunitie ti jla'am. Jlampa kastant'iejayiji pet, siunie tants'e a'wena ki iyo ni jijweye, siu'neje ni iyo ti taka'manisie'n ti ijwiejiete'n japo i'nio' ti je isis, Sijwajieti Jesús Sinia' jijweye yiyi. 4'Yina niwaka'ne ti it'imina ti po' siuniwa ijwilts'e'm ti janwents'e'm niwaka niwa ti wuj ti isis, ti ijiate ti laja po'. Siuti iwi'nase'm niwaka, sekyi'i jikajlajyi ka kiak aniwonayi 'ate iyo ni Sinia',#Ef 4.24 jla'yi ti jijwayejyi siuniwa inkeyis ti wuj ti je isis yi'ne ajnat'e ti tajle ni jitienkiujnieye ni i'nio', ti itiliaja ka woyi.
5Ijiatjliyi, siuti kia'iyo astankiujnieye po', 'esiji ka ani'netie'yi ape'e siunie ti janilesanayiji. Siuti kiak jawoyeyi ti ja akajlajyi ka anilesanayiji, sekjane'yi ka ajalasanie'eje ape'e naka ka intant'iejayi ni iyo ni Sinia' iyo ka woyi. 6'Yina siuti ja akajlajyi naka ka intant'iejayi ni iyo ni Sinia', sekjane'yi ka ajalasanie'eje ape'e ka akajlajyi ka atoma'yi ilia'm siuniwa je isis tajle pit ni iyo niwa 'asienis. Siuti ja akajlajyi naka ka atoma'yi ilia'm siuniwa je isis tajle ni iyo niwa 'asienis, sekjane'yi ka ajalasanie'eje ape'e ka akajlajyi ka anilayitieyi siunie asjlak'ali sek jane'yi jakamajayepe. Siuti ja akajlajyi ka anilayitieyi pi iyo pi asjlak'ali, 'yina ja akamaja, sekjane'yi ka ajalasanie'eje ape'e ka akajlajyi ka 'wena je anoye'yi siunie iniu'we ni Sinia' ji'niayi ti tijnajyi. 7Siuti ja akajlajyi ka noyets'i ni Sinia' ji'niayi ni tijnajyi, sekjane'yi ka ajalasanie'eje ape'e siunie ti jawoye as'lejwasa'. Siuti ja akajlajyi ka woye as'lejwasa', sekjane'yi ka ajalasanie'eje ape'e ka akajlajyi ka asemijnaye poye.
8Siuti jane'yase niwaka, 'yina ti jajlasatajyimpe, 'yina jlajma ka anilana'yi wek, kajeyepa ti ja 'esieyi napo i'nio' siunie jiwoyeyi, 'yina je tak'emisie'n siunie ti intant'iejayi ni Saka'niona Jesús. 9Jlampet siunie je yiyi niwaka, ajwel'ni iyoye pet 'ate siunie i'nio' jitiej je tojk'i, ni'ne ka ijniejietk'i siunie talok, ti isiwaliyi'i ti pajk'i ti tinitiajnata k'iye kiwa jikeyis.
10Ijiatjliyi 'napo i'lijwas, ti asa'am ti Sinia' ta'nase jla'yi ti isi'mase, 'esiji ka katatayi niwaka, lesanayiji. Siuti kiak jawoyeyi, je pajna'a ka leyeyi ti janoyik'i ni Sinia' ji'niayi. 11Sekjane'yi ka ijiatayijna'a ka 'ajla ask'ioye yi'i ni Saka'niona Jesús ti Sijwajieti, ti iyo anechiyasa', ti laj jlaja ti iyo anechiyasa'.
12Jak je iyoyiji ka liyi ti ekiajle'e ni ask'ioye ka je inkiwaliyeyi'i, ijiate 'najanayetaja siunie 'eyasanayijpe ni siunie i'netieyi pijia'm. 13-14'Yina ts'ajane pi awone ti ja ke pajayi wata'a ja sinitia'n, iyonk'i ja Saka'niona Jesús ti Sijwajieti ti ijwilk'i'm.#Jn 21.18-19 'Yina ti si'wasanjli kiu', naka isimet ti jayoyi ka 'yiyasanajyi'n ka je inkiwaliyeyi'i siu'niwa ajwe'el. 15'Yina ja 'yakatate jak je iyoyi, 'wanjliyijna'ape ka sinitia'n, ja ke inkiwaliyeyi'i niwaka.
Siupapo i'winaja jla'yi ipi'yayeje pa Sijwajieti ti tekiajlaja pi jijweye iyo
16Siuti 'eyasanayiji ki iyo pi Saka'niona jit'iuni, siu'neje ni jawo ka napitiemet, je ka intajle siupapo paj t'ipi ti yamtiyi napo, jla'yi ti tajle ni jitienkiujnieye ni i'nio'. 'Yina ijiate jla'am ti sitiete i'wi'in, ki iyopi ja Saka'niona ja jijweye iyo. 17-18Kajeyepa ti sampe ti awakiap ti ijio ape'e jlajak tikijnaki ti toj pijia'm, jlaja Sinia' 'yotat. A'wenajaja ti Sinia' yikiajlayi ni iyo ni jijweye, ape'yak 'neje pi Sinia' jla'lap ti tojma'm ni poli, ti je kia'iyo paka tipe'yak ti wuj ti 'es, ti iyo'ate, “'Nak yas ti ts'amaja. Wuj ti ajonit.”#Mt 17.1-5
19Naka'ne siunie ti je takakiunieje, ti ijiatk'i siunie iyot'iyipi papo injwejlanawos t'ipi, ti ijwilis kiaka, 'yina wuj ti 'es ti kia'iyo ti jik'iuyeyi. Naka siunie inka'niye iyo'ate jana kates ti 'yakaja pet ilia'm siojona kates jloma jla'yiki, ti 'yakajanitk'i ape'e niwa iyo niwa asosikis. Naka pet ni Sijwajieti ti ajwe'el ti kia'iyo. 20'Yina 'esiji ka ina'an ka 'najanayi siu'nie: wuj ti je 'esiji ka ne'yi pa ka injwel ka intajlat jiwa'm niwa Sinia' jlamtis ti yi'i ni ji'wet, ka jlama ka jilisajnaye siuniwa ilisant'iyijpe papo injwejlanawos t'ipi. 21Tepa jawo ka kiak je iwo ti siupa injwejlanik jiwo je jla'am ka jlamtisie' siupuwa ijwile pijia'm ti ijwijla'm papo i'nio', 'wenajliyi ti Sinia' tajle siupi iyo. Sinia' jikimet ti 'es japaka ti iyo ji'lijaye papo injwejlanawos t'ipi.#2 Ti 3.16
Currently Selected:
2 Pedro 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.