PAUNAK 1
1
Paunak A Manphatna
1David’ tapa, Israel kumpi Solomon’ paunakte:#1Kum 4:32.
2Mite in pilna le thuhoihte
a phawk theih nading,
khiatna thuk a nei kammalte
a theih theih nading.
3A hoihin a pil gamtat theih nading,
thuman, thutang, a kilawmin
a gamtat theih nading.
4Thuthei nai lote in a theih nading,
khangnote in
pilna le thu ngaihsut theihna
a ngahna ding.
5Mi ciimsate ciimsak semsemin,
mi pilsate pilsak semsemin,
6paunakte le thugentehnate
hoihtakin thei-in,
mipilte’ kampau leh
a thugente uh a theih nading ahi hi.
Hanthotna le Hilhkholhna
7 Topa zahtakna in pilna kipatna hi a,
mihaite in pilna le thuhilhna
don lo uh hi.#Job 28:28; La 111:10; Pau 9:10.
8Ka ta aw, na pa’ hong thuhilhna
hoihtakin zui inla,
na nu’ hong thugente ngai in.
9Tua thuhilhnate in
na gamtat hong hoihsak ding a,
kizepna lukhu le kizepna khi bangin
hong etlawmsak ding hi.
10Ka ta aw, mi hoih lote in
nang hong zol ciangin,
amau’ zolna zui kei in.
11Amaute in, “Hong pai in,
mi khatpeuh va that ni!
Mi ommuang khat va muansuam ni!
12I muh tungin a cidam,
a hing kimlai hinapi,
i suk khit ciangin a sisa hi ding!
13Na a manpha a namkimin i sut ding a,
tua bang nate i inn dimin i nei ding hi.
14Kote tawh hong kipawl lecin,
i ngah khempeuh
i hawm ding hi,”
hong cih uh hangin ut kei in.
15Ka ta aw,
tua bang mite tawh kikhawl kei inla,
amaute kiang panin kihemkhia in.
16Amaute a sia-in gamta nuam vanvan uh a,
mi thah ding lamsang
haksa sa het lo uh hi.
17I matnop vasate’ muhtangpi-in,
i siahna ngenthang zaak leeng
a mawkna ahi hi.
18Ahi zongin mite in
amau’ awkna ding mah thang siah uh a,
kuamah dang awk loin,
amau mah hai awk uh hi.
19Zawhthawh thu tawh
mi’ na a sutte in sihlawh tawntung zaw a,
hih bangin a gamtate in
tua bangmah tuak ngitnget hi.
Pilna’ Hong Thumna
20Ngai in! Kongzing lampi le
van kizuakna phualpi-ah
pilna hong kiko hi.
21Khuapi kulhkongpi tual le
mi a kikhopna mun khempeuhah
nakpitakin hong awngkhia a,#Pau 8:1-3.
22“Mihaite aw, bang tanvei
hai omom nuam na hi uh hiam?
Bang tanvei pilna thudon loin
om ding na hi uh hiam?
Pilna ngaihsutin
nei ngei lo ding na hi uh hiam?
23Kong thuhilhna hong ngai un;
ka ngaihsutna kong gen ding a,
ka theihna kong zasak ding hi.
24Keimah in note hong samsam napi-in
nong ngai nuam kei uh a,
ka khut hong vanvan napi-in
kuamah in nong thudon kei uh hi.
25Ka thugente khempeuh
hong thudon loin,
kong tainate khempeuh
hong mang nuam lo na hih manun,
26lungkhamna na tuah uh ciangin
kong nuihsan lel ding a,
launa na tuah uh ciangin
kong thusim kei ding hi.
27Lungkhamna in
huihpi’ nawk bangin
note hong nawkgawpin,
pingpei’ pei bangin
note hong peigawpin,
lungkhamna le sinkhamna
na tuah uh ciangin kong don kei ding hi.
28Tua bang hun ciangin
kei nong sam ding uh a,
ahi zongin kong dawng kei ding hi.
Limtakin kei nong zong ding uh a,
ahi zongin koimahah
nong mu kei ding uh hi.
29Note in pilna na deih kei uh a,
Topa na zahtak nuam kei uh hi.
30Ka thugente na deih kei uh a,
kong thuhilhna
ngai nuam lo na hih manun,
31na gamtatna bangun na thuak ding uh a,
nomau’ gamtatna mah in
note hong gimsak ding hi.
32Bang hang hiam cih leh thu thei lote in
pilna a don loh manun sihlawh uh a,
mihaite in lunghihmawhna
a neih loh manun siatlawh uh hi.
33Ahi zongin ka thugenna a ngaite in
lungnopna ngah ding uh a,
launa nei loin nuamtakin
om hithiat ding uh hi,”
a ci hi.
Currently Selected:
PAUNAK 1: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.