ᤕᤢᤜᤢᤴᤏᤠ 2
2
ᤁᤠᤏᤠ ᤐᤠᤱᤈᤢᤶᤔᤥ ᤔᤣ᤺ᤰᤂᤡᤶ ᤛᤠᤓᤠᤱᤈᤠ
1ᤜᤧᤰᤁᤩᤠᤱ ᤏᤡᤕᤧᤴ ᤀᤣᤃᤠᤱ ᤃᤠᤗᤡᤗ ᤌᤢᤶᤔᤥᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤥ ᤕᤧᤛᤢᤖᤧ ᤁᤢᤶᤔᤠ ᤔᤖᤡᤕᤶᤔᤡᤴ ᤋᤖᤣ ᤘᤕᤧᤖᤥ॥ 2ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤔᤧᤀᤢ᤺ᤳᤋᤢᤛᤡᤀᤠᤱ ᤂᤧᤵᤔᤥ ᤔᤧᤒᤣᤀᤠᤱ ᤔᤧᤘᤕᤧ॥ 3ᤂᤧᤴ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤥ ᤆᤧᤸᤗᤧᤰᤛᤣ᤹ ᤌᤡᤴ ᤔᤠ᤺ᤖᤧᤸᤗᤧ ᤕᤧᤛᤢᤖᤧ ᤁᤢᤶᤔᤠ ᤐᤣᤀᤠᤱ ᤕᤧᤛᤢᤴ ᤔᤧᤳᤋᤢ. “ᤀᤠᤸᤗ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡᤴ ᤔᤡ᤺ᤛᤠᤰᤁᤠᤱ ᤔᤧᤱᤃᤳᤋᤢᤴᤗᤥ॥”
4ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤌᤠᤔᤧᤖᤠ ᤔᤧᤴᤇᤢᤔᤠᤀᤣ. ᤌᤣᤀᤠᤱ ᤁᤴ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤁᤧᤔᤧᤳᤋᤠᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶᤔᤡᤴ ᤀᤠᤸᤗ ᤌᤠᤖᤡᤰ ᤔᤧᤴᤍᤠᤀᤣ ᤘᤠ᤹ᤖᤥ॥”
5ᤁᤖ ᤁᤢᤶᤔᤠ ᤐᤣᤀᤠᤱ ᤂᤧᤵᤔᤥᤒᤠ ᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹ᤀᤥ॥”
6ᤂᤧᤵᤔᤥ ᤕᤜᤢᤍᤡ ᤛᤣᤛᤣ ᤆᤥ᤺ᤰᤛᤡᤱᤔᤠ ᤌᤡᤶᤔᤥ ᤀᤥᤃᤵ ᤆᤥ᤺ᤰᤔᤏᤠᤒᤠ ᤆᤫᤠ᤺ᤳ ᤕᤠᤱᤔᤠ ᤋᤢᤰᤛᤡ (᥌) ᤕᤶᤒᤠ ᤂᤥ᤺ᤶᤔᤏᤠᤒᤠ ᤗᤢᤱ ᤁᤢ᤺ᤴᤍᤠᤜᤠ᤹#᥈:᥌ ᤂᤥ᤺ᤶᤔᤏᤠᤒᤠ ᤗᤢᤱ ᤁᤢ᤺ᤴᤍᤠᤜᤠ᤹—ᤂᤧᤱᤜᤠ᤹ ᤗᤢᤱᤅᤥ ᤂᤥ᤺ᤶᤔᤏᤠᤒᤠ ᤛᤢᤶᤍᤠᤱ ᤜᤧᤰᤋᤱᤒᤠ ᤆᤫᤠ᤺ᤳ ᤕᤠᤱᤏᤠᤜᤠ᤹ ᤔᤧᤘᤕᤧ॥ ᤔᤧᤕᤢᤅᤧ॥ ᤂᤧᤴ ᤌᤡᤰᤁᤥ ᤛᤢᤶᤒᤥᤱ (᥉᥆) ᤐᤠᤌᤡ ᤌᤠᤖᤡᤰ ᤆᤫᤠ᤺ᤳ ᤁᤧᤜᤵᤐᤠ ᤆᤥᤃᤧᤖᤥ॥ 7ᤕᤧᤛᤢᤖᤧ ᤂᤧᤴ ᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤢ᤺ᤴᤍᤠᤜᤠ᤹ ᤆᤫᤠ᤺ᤳᤋᤡᤸᤗᤧ ᤁᤢᤗᤧᤶ ᤌᤡᤶᤛᤧᤶᤛᤡᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤁᤢ᤺ᤴᤍᤠᤜᤠ᤹ ᤁᤢᤗᤧ᤺ᤶ ᤁᤢᤗᤧ᤺ᤶ ᤔᤧᤎᤡᤶᤛᤢᤛᤡᤖᤥ॥
8ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤡᤛᤠᤰ ᤘᤣᤃᤧᤶᤔᤧ᤹ᤀᤠᤱ ᤔᤣ᤺ᤰᤂᤡᤶᤔᤥ ᤆᤠᤔᤢᤰ ᤌᤡᤔᤢᤰ ᤀᤥᤃᤧᤔᤧᤵᤐᤧᤴ ᤐᤡᤖᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤔᤧᤈᤥᤃᤢ॥ 9ᤜᤧᤰᤁᤩᤠᤱ ᤂᤧᤴ ᤔᤣ᤺ᤰᤂᤡᤶᤔᤥᤒᤠ ᤆᤠᤔᤢᤰ ᤌᤡᤔᤢᤰ ᤀᤥᤃᤧᤔᤧᤵᤐᤠᤸᤗᤧ ᤆᤫᤠ᤺ᤳᤗᤠᤶ ᤁᤧᤒᤥᤱᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤛᤠ᤹ᤖᤢ॥ ᤂᤧᤴ ᤀᤠᤳᤋᤥᤗᤠᤶ ᤋᤩᤧᤒᤠ ᤂᤧᤸᤗᤧ ᤌᤣᤀᤠᤱ ᤔᤧᤏᤡᤛᤢᤴᤗᤥ. ᤁᤖ ᤂᤧᤴ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤛᤣᤘᤠᤖᤥᤒᤠᤜᤠ᤹ᤖᤧᤖᤰ ᤔᤧᤏᤡᤛᤢᤖᤥ॥ ᤂᤧᤸᤗᤧ ᤔᤣ᤺ᤰᤂᤡᤶᤛᤠᤒᤠᤴ ᤌᤡᤰᤗᤧᤵᤔᤠᤱ ᤀᤢ᤺ᤳᤋᤢ ᤋᤣ᤹ᤖᤢᤀᤠᤱ ᤔᤧᤳᤋᤢ. 10“ᤘᤣ᤹ ᤔᤏᤠᤜᤠ᤹ᤖᤧᤃ ᤁᤠᤰᤏᤢ᤺ᤸᤗᤧ ᤋᤃᤡ ᤁᤢᤈᤠ ᤁᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤜᤠᤛᤢ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤔᤧᤎᤢᤅᤢᤀᤠᤱ ᤔᤕᤢᤛᤡ᤹ ᤜᤧᤰᤁᤩᤠᤱᤗᤰ ᤘᤠᤈᤣᤖᤣᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤜᤠᤛᤢᤖᤥ ᤁᤖ ᤂᤧᤏᤧ᤹ᤃ ᤀᤠᤸᤗᤥ ᤌᤠᤖᤡᤰ ᤛᤠ᤹ᤖᤡᤰ ᤁᤢᤈᤠ ᤁᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤣ ᤁᤧᤍᤠᤱᤄᤢᤀᤠᤱ ᤁᤧᤘᤠ᤹ᤖᤥ॥”
11ᤕᤧᤛᤢᤖᤧ ᤁᤠᤰᤏᤢ᤺ᤸᤗᤧ ᤋᤃᤡᤒᤠ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤃᤠᤗᤡᤗ ᤌᤢᤶᤔᤥᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤆᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤀᤠᤸᤗᤛᤠᤱ ᤆᤠ᤹ᤖᤡᤰ ᤏᤛᤠᤴ ᤔᤧᤈᤥᤃᤢᤖᤥ॥ 12ᤂᤧᤴ ᤁᤠᤏᤠᤒᤠ ᤔᤣ᤺ᤰᤂᤡᤶ ᤀᤣᤃᤠᤱ ᤂᤢᤏᤧ᤹ ᤁᤢᤶᤔᤠ ᤁᤢᤴᤛᤠ᤹ᤛᤡ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤁᤢᤓᤠ ᤕᤧᤴ ᤔᤧᤕᤠ᤺ᤰᤋᤧᤖᤥ॥
ᤕᤧᤛᤢᤖᤧ ᤔᤠᤱᤜᤡᤶᤔᤥᤗᤠᤶᤒᤠ ᤗᤧᤱᤜᤱᤒᤠᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡ᤹
(ᤔᤳᤋᤡ ᥈᥇:᥇᥈-᥇᥉; ᤔᤷᤁᤢ ᥇᥇:᥇᥋-᥇᥍; ᤗᤢᤁᤠ ᥇᥏:᥊᥋-᥊᥌)
13ᤁᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖ ᤐᤳᤇᤧᤸᤗᤧ ᤕᤧᤛᤢᤴ ᤌᤥ ᤕᤖᤢᤛᤗᤧᤶᤔᤥ ᤐᤣ॥ 14ᤜᤧᤰᤁᤩᤠᤱ ᤔᤠᤱᤜᤡᤶ ᤗᤰᤂᤢᤶᤔᤥ ᤗᤧᤱᤜᤱᤒᤠᤜᤠ᤹ᤖᤧ ᤐᤡᤳᤜᤠ᤹. ᤔᤧᤸᤗᤢᤰᤜᤠ᤹. ᤐᤢᤳᤋᤢ᤺ᤰᤁᤣᤜᤠ᤹ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤠᤜᤠ᤹ᤖᤥ ᤔᤧᤛᤱᤄᤢᤒᤠ ᤏᤢ ᤂᤧᤵᤔᤥ ᤕᤠᤱ ᤁᤧᤗᤧᤰᤐᤠᤜᤠ᤹ᤀᤠᤱ ᤕᤠᤱ ᤗᤧᤰᤏᤢ ᤔᤧᤕᤢᤅᤧᤒᤠ ᤂᤢᤏᤧ᤹ ᤏᤡᤛᤢᤛᤡ॥#᥈:᥇᥊ ᤔᤠᤱᤜᤡᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤡᤳᤇᤠᤵ ᤔᤣ᤺ᤴᤏᤣᤒᤠ ᤕᤠᤱᤗᤰ ᤔᤧᤍᤠ᤺ᤰᤋᤢ᤹॥ ᤜᤧᤰᤁᤣ᤺ᤸᤗᤧ ᤜᤢᤱᤔᤠ ᤁᤧᤒᤥᤱᤒᤠ ᤕᤠᤱᤀᤣᤱ ᤀᤡᤃᤪ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤌᤰᤛᤠᤐᤢᤛᤠ ᤀᤡᤱᤔᤠ ᤘᤣ᤹ ᤗᤠᤈᤣ᤹ᤒᤠ ᤕᤠᤱᤅᤡᤴ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤔᤧᤗᤧᤰᤋᤢᤖᤥ॥ 15ᤕᤧᤛᤢᤖᤧ ᤀᤡᤍᤠ᤺ᤰᤁᤡᤸᤗᤧᤴ ᤋᤧ᤺ᤶᤓᤢᤰ ᤆᤥᤃᤢᤀᤠᤱ ᤂᤧᤴ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤜᤧᤰᤁᤩᤠᤱ ᤐᤡᤳᤜᤠ᤹ᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤔᤏᤠᤜᤠ᤹ ᤔᤠᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤏᤠ᤺ᤳᤋᤢᤍᤣᤛᤢᤛᤡ ᤜᤧᤰᤁᤩᤠᤱ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤀᤡᤳᤇᤡᤜᤠ᤹ᤀᤠᤱ ᤛᤧᤛᤢ ᤐᤡᤖᤢᤛᤡᤖ ᤂᤢᤏᤡ᤹ ᤛᤠᤵᤏᤧᤳᤜᤠ᤹ᤀᤠᤱ ᤗᤧᤰᤂᤢ ᤐᤡᤖᤢᤛᤡᤖᤥ॥#᥈:᥇᥋ ᤕᤧᤛᤢᤖᤧ ᤜᤧᤰᤁᤣ ᤆᤥᤃᤢᤸᤗᤧ ᤈᤁᤖᤡᤕᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤁᤧᤖᤧᤒᤠᤖᤥ (ᤈᤁ ᥇᥊:᥈᥇)॥ 16ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ ᤔᤧᤳᤋᤢᤛᤡ. “ᤁᤱᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤶ ᤐᤣᤃᤧᤶᤔᤧ᤹᥄ ᤂᤡᤏᤡ᤹ ᤌᤣᤀᤠᤱ ᤀᤠᤶᤒᤠᤖᤧ ᤁᤢᤜᤡᤶᤔᤡᤴ ᤛᤱᤀᤡᤱᤍᤧᤴ ᤁᤧᤈᤥᤃᤢᤶᤒᤠᤒᤣ᥅”
17ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤜᤡᤶᤔᤡᤸᤗᤧ ᤗᤠᤃᤡ ᤔᤡ᤺ᤶᤈᤡ᤺ᤸᤗᤧ ᤀᤡᤱᤃᤠ᤹ ᤌᤢᤰᤁᤠᤖᤥ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥#ᤏᤡᤱ ᤛᤢᤶ ᥌᥏:᥏
18ᤜᤧᤰᤁᤣ᤺ᤸᤗᤧ ᤁᤢᤓᤠ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ “ᤌᤧᤔᤠ ᤕᤢᤰᤁᤡᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤈᤥᤃᤢᤒᤠᤒᤣ᥅ ᤁᤴ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹॥”#᥈:᥇᥎ ᤕᤧᤛᤢᤖᤧ ᤁᤢᤕᤠ᤺ᤶᤒᤰᤁᤡᤴ ᤔᤠᤱᤜᤡᤶᤔᤥ ᤕᤢᤰ ᤁᤧᤃᤵᤐᤠ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤘᤕᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤥ॥ 19ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤥᤱ. ᤁᤴ ᤔᤠᤱᤜᤡᤶᤔᤡᤴ ᤕ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤢᤶᤕᤧᤴᤏᤥ ᤕᤠᤶᤔᤥ ᤆᤥᤃᤢᤱ॥”#᥈:᥇᥏ ᤁᤱᤃ ᤕᤧᤛᤢᤖᤧ ᤁᤢᤛᤡᤔᤧᤴ ᤀᤣᤃᤠᤱ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤔᤠ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤢᤰᤁᤡᤸᤗᤧᤴ ᤁᤢᤔᤡᤰᤛᤣᤴ ᤐᤥᤱᤗᤥ ᤑᤠ᤹ᤀᤠᤱ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤒᤠᤖᤥ॥
20ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤰᤂᤣᤔᤢ᥅ ᤁᤴ ᤔᤠᤱᤜᤡᤶᤔᤡᤴ ᤋᤱᤒᤣ ᤗᤡ-ᤋᤢᤰᤁᤥᤖᤰ (᥊᥌) ᤆᤥ᤺ᤰᤔᤠ ᤆᤢᤖᤧᤸᤗᤧ ᤂᤧᤏᤧ᤹ ᤛᤢᤶᤕᤧᤴᤏᤥᤀᤣ ᤁᤧᤈᤥᤃᤢ᤹ᤔᤢ᥄” 21ᤁᤖ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤔᤠᤱᤜᤡᤶᤔᤡᤱᤃ ᤀᤠᤒᤠᤅᤣ ᤁᤢᤎᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤀᤠᤱ ᤘᤕᤧᤒᤠᤖᤥ॥ 22ᤋᤠ᤺ᤴᤍᤡ ᤂᤢᤏᤧ᤹ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱᤗᤰ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤂᤧᤴ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤈᤠᤰᤜᤠ᤹ ᤏᤢ ᤛᤠᤶᤕᤥᤛᤠᤵᤗᤠᤴ ᤏᤛᤠᤴ ᤔᤧᤈᤥᤃᤢᤖᤥ॥
23ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤘᤕᤧᤸᤗᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤀᤠᤱ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢᤖᤥ॥ 24ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤋᤠ᤺ᤰᤐᤥ ᤔᤧᤈᤥᤃᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤁᤠᤰ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥᤰ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤛᤡᤀᤠᤱ ᤘᤕᤧᤖᤥ॥ 25ᤀᤠᤳᤋᤡᤸᤗᤧᤀᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤂᤢᤏᤧ᤹ ᤔᤧᤵᤔᤠ ᤔᤧᤒᤥ᤺ᤰᤂᤧᤴᤗᤥ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥᤰ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤛᤢᤀᤠᤱ ᤘᤕᤧᤖᤥ॥
Currently Selected:
ᤕᤢᤜᤢᤴᤏᤠ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.