ᤕᤢᤜᤢᤴᤏᤠ 19
19
ᤕᤧᤛᤢᤴ ᤛᤡᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤢ᤹
(ᤔᤳᤋᤡ ᥈᥍:᥇᥋-᥉᥇; ᤔᤷᤁᤢ ᥇᥋:᥌-᥈᥆; ᤗᤢᤁᤠ ᥈᥉:᥇᥉-᥈᥋)
1ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤕᤧᤛᤢᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤛᤡᤖᤥ॥ 2ᤌᤰᤛᤢᤒᤠᤜᤠ᤹ᤖᤧ ᤋᤡᤱᤃᤪᤣᤰᤗᤧᤴ ᤋᤡᤆ᤺ ᤔᤧᤓᤕᤢᤀᤠᤱ ᤕᤧᤛᤢᤴ ᤔᤧᤄᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤖᤠᤴᤗᤠ ᤜᤠᤱᤋᤣᤳᤋᤡᤴ ᤔᤧᤈᤠᤰᤋᤢᤖ 3ᤁᤢᤍᤃᤡ ᤔᤧᤒᤣᤀᤠᤱ ᤀᤧᤳᤗᤧᤱ ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄ ᤗ᤹ᤖᤡᤰ ᤔᤧᤔᤧᤳᤋᤢᤖ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢ ᤔᤧᤒᤡᤖᤢᤖᤥ॥
4ᤐᤡᤗᤠᤋᤛᤧᤴ ᤕᤠᤶᤔᤥ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤱᤗ ᤐᤳᤋᤠᤖᤥ॥” 5ᤜᤧᤰᤁᤩᤠᤱ ᤋᤡᤱᤃᤪᤣᤰ ᤋᤡᤆ᤺ᤴ ᤔᤧᤄᤢ᤺ᤰᤋᤢᤒᤠ ᤏᤢ ᤐᤖᤠᤴᤗᤠ ᤜᤠᤱᤋᤣᤳᤋᤡᤴ ᤔᤧᤈᤠᤰᤋᤢᤒᤠ ᤕᤧᤛᤢᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤔᤧᤳᤋᤢᤛᤡ. “ᤂᤠ. ᤁᤴ ᤔᤏᤠᤴ ᤀᤥᤔᤧᤳᤋᤧᤶᤔᤧ᤹᥄”
6ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤏᤠᤔᤧ᤺ᤴᤏᤣ “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ. ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ” ᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤴ ᤔᤏᤠᤴ ᤋᤣ᤹ᤖᤧᤶᤔᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧᤶᤔᤧ᤹ᤀᤥ. ᤁᤖ ᤀᤡᤱᤃᤠ᤹ᤃ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥᤒᤠᤴᤗᤥ॥”
7ᤁᤖ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤁᤳᤋᤢᤶᤒᤧᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤃ ᤂᤧᤴ ᤛᤡᤔᤠᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤛᤠᤀᤠ ᤑᤠ᤹ᤀᤠᤱ ᤔᤧᤳᤇᤡᤱᤅᤠᤱ ᤘᤠ᤹ᤖᤥ॥”
8ᤐᤡᤗᤠᤋᤛᤖᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤡᤛᤧᤖᤥ॥ 9ᤂᤢᤏᤧ᤹ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠᤛᤧᤀᤠᤱ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤥᤗᤠᤶ ᤁᤧᤍᤩᤧᤒᤠᤒᤣ᥅” ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤗᤥ॥ 10ᤐᤡᤗᤠᤋᤛᤖᤧ ᤕᤧᤛᤢᤴ ᤔᤧᤳᤋᤢ. “ᤀᤡᤱᤃᤠ᤹ᤏᤢ ᤌᤣᤀᤠᤱ ᤁᤧᤶᤒᤠ᤺ᤳᤏᤧᤶᤒᤠ᥅ ᤂᤧᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤏᤢ ᤗᤧᤵᤔᤠᤍᤣᤔᤠ ᤕᤢᤰ ᤁᤳᤋᤢᤱᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤒᤡ᥅”
11ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤶᤒᤡᤖᤧᤴᤏᤡᤸᤗᤧᤃ ᤀᤡᤱᤃᤠ᤹ ᤛᤶᤍᤠᤱ ᤕᤢᤰ ᤁᤧᤱᤃᤳᤋᤢᤴᤒᤠᤖᤥ॥ ᤁᤖ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤕᤠᤵᤔᤡ ᤜᤢᤰ ᤁᤧᤛᤢᤵᤐᤠᤸᤗᤧ ᤁᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤗᤠᤕᤥᤖᤧᤴ ᤀᤠᤵᤋᤡᤰ ᤂᤥᤛᤢ᤹ᤖᤥ॥”
12ᤜᤧᤰᤁᤣ᤺ᤸᤗᤧᤃ ᤐᤡᤗᤠᤋᤛᤖᤧ ᤕᤧᤛᤢᤴ ᤗᤧᤵᤔᤠᤍᤣᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤕᤜᤢᤍᤡᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧᤖᤥ. “ᤁᤴ ᤔᤏᤠᤴ ᤁᤧᤗᤧᤖᤢ ᤁᤧᤍᤣ᤺ᤛᤢᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤛᤡᤈᤖᤗᤧ#᥇᥏:᥇᥈ ᤖᤥᤔᤡ ᤛᤢᤜᤠᤱᤕᤢᤰᤐᤠᤀᤥ ᤁᤠᤰᤏᤢ᤺ᤸᤗᤧ ᤕᤶᤒᤠ ᤔᤏᤠᤴ ᤛᤢᤜᤠᤱ (ᤐᤕᤶ ᤜᤠᤱ) ᤘᤕᤧ॥ ᤂᤢᤏᤧ᤹ ᤛᤡᤈᤖ ᤔᤧᤔᤧᤳᤋᤢ॥ ᤁᤢᤴᤍᤣ᤺ᤱᤒᤠ ᤁᤧᤶᤒᤥᤱᤏᤧᤴᤗᤥ॥ ᤀᤠᤳᤋᤡᤸᤗᤧ ᤀᤠᤒᤠᤅᤣ ᤜᤠᤱ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤛᤡᤈᤖᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”
13ᤐᤡᤗᤠᤋᤛᤖᤧ ᤂᤧᤴ ᤂᤧᤵᤛᤢᤀᤠᤱ ᤕᤧᤛᤢᤴ ᤗᤠ᤺ᤰᤁᤠᤳ ᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱ ᤑᤧ᤺ᤔᤏᤠᤒᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥ (ᤂᤧᤴ ᤋᤧᤴᤏᤡᤴ ᤜᤡᤒᤪᤢ ᤐᤠ᤺ᤴᤏᤥ ᤃᤒ᤻ᤒᤌᤠ ᤔᤧᤔᤧᤳᤋᤢᤖᤥ॥) 14ᤜᤧᤰᤁᤩᤠᤱ ᤁᤱᤃ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤌᤡᤰᤕᤧᤴ ᤋᤃᤡ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ॥
ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤁᤵᤔᤥ ᤘᤠ᤹ᤖᤥ॥”
15ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤂᤧᤴ ᤋᤣ᤹ᤖᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”
ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤢᤱᤒᤠᤒᤡ᥅”
ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤜᤠᤱᤅᤡᤱᤃ ᤛᤡᤈᤖᤧᤴᤗᤰᤗᤥ॥” 16ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖ ᤑᤠ᤹ᤀᤠᤱ ᤜᤢᤰᤛᤢᤵᤋᤢᤛᤡᤖᤥ॥
ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ᤹
(ᤔᤳᤋᤡ ᥈᥍:᥉᥈-᥊᥊; ᤔᤷᤁᤢ ᥇᥋:᥈᥇-᥉᥈; ᤗᤢᤁᤠ ᥈᥉:᥈᥌-᥊᥉)
ᤂᤧᤸᤗᤧᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢᤴ ᤂᤧᤵᤔᤥᤗᤠᤶ ᤔᤧᤍᤣ᤹ᤖᤢᤖᤥ॥ 17ᤂᤧᤱᤜᤠ᤹ᤖᤧ ᤕᤧᤛᤢᤴ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤧᤃᤢ᤺ᤳᤋᤢᤀᤠᤱ ᤔᤡᤰᤂᤥ᤺ᤰᤐᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢᤖᤥ॥ (ᤂᤧᤴ ᤁᤥ᤺ᤰᤔᤠᤴ ᤜᤡᤒᤪᤢ ᤐᤠ᤺ᤴᤏᤥ ᤃᤗᤃᤌᤠ ᤔᤧᤔᤧᤳᤋᤢᤖᤥ॥) 18ᤂᤧᤵᤔᤥ ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥᤴᤍᤢ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤔᤏᤠᤜᤠ᤹ᤀᤠᤱ ᤔᤧᤓᤥ᤺ᤴᤍᤢᤛᤡᤖᤥ॥
19ᤐᤡᤗᤠᤋᤛᤖᤧ ᤏᤠᤛᤖᤋᤒᤠ ᤕᤧᤛᤢ ᤕᤜᤢᤍᤡ ᤜᤠᤱ ᤗ᤹ᤖᤡᤰ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤁᤡᤴ ᤛᤠᤵᤋᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤶᤔᤠ ᤐᤠᤱᤄᤢᤛᤡᤖᤥ॥ 20ᤂᤧᤴ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤔᤧᤏᤡᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱᤅᤣ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤃ ᤜᤡᤒᤪᤢ. ᤗᤩᤠᤋᤡᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤛᤠᤵᤋᤧᤀᤠᤱ ᤐᤳᤇᤧ॥ 21ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤐᤡᤗᤠᤋᤛᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤀᤳᤋᤢᤖᤥ. “ᤂᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤔᤧᤛᤠᤵᤋᤧᤴᤏᤧ᤹ᤀᤥ. ᤁᤖ ᤁᤴ ᤔᤏᤠ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤀᤠ ᤗ᤹ᤖᤡᤰ ᤐᤠ᤺ᤳᤋᤢᤖᤥ ᤗ᤹ᤖᤡᤰ ᤛᤠᤵᤋᤧ᤹ᤀᤥ॥”
22ᤁᤖ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤆᤩᤠ ᤛᤠᤵᤋᤢᤱ. ᤂᤧᤴ ᤛᤠᤵᤋᤢᤱ ᤛᤠᤵᤋᤢᤱ॥”
23ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢᤴ ᤔᤧᤓᤥᤴᤍᤢ ᤔᤧᤛᤢᤖᤢᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤗᤡᤛᤡ ᤗᤰᤁᤥ ᤔᤧᤜᤠ᤺ᤳᤇᤡᤱᤗᤥ॥ ᤁᤖ ᤁᤢᤗᤃᤣ᤺ᤳᤋᤡᤴ ᤁᤢᤍᤢᤶᤒᤣ ᤔᤣ᤺ᤴᤏᤣᤒᤠ ᤛᤷᤎᤰ ᤑ᤺ᤔᤏᤠᤒᤠ ᤆᤥᤃᤧ. 24ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤏᤡ᤹ ᤌᤧ᤺ᤰᤂᤢᤶ ᤔᤣ᤺ᤴᤗᤥ. ᤁᤖ ᤋ᤹ᤕᤠ᤺ᤴᤛᤥᤴ ᤁᤧᤛᤢᤶᤗᤥ॥ ᤀᤠᤳᤋᤡᤸᤗᤧ ᤁᤢᤗᤰᤁᤥ ᤌᤠ᤹᤺. ᤜᤠᤖᤠ᤹ ᤂᤧᤸᤗᤧᤀᤣ ᤂᤧᤴ ᤋᤣ᤹ᤖᤢᤏᤡᤖᤥ॥” ᤁᤴ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤈᤠᤱᤜᤠ᤹ ᤔᤧᤜᤠ᤺ᤳᤇᤡᤱᤗᤥ. ᤜᤧᤰᤁᤩᤠᤱ ᤀᤠᤍᤣ᤺ᤳᤋᤡᤴ ᤋ᤹ᤕᤠᤴᤛᤥ᤺ᤴ ᤔᤧᤃᤧᤛᤢ᤹ᤖᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤁᤧᤖᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤈᤥᤃᤢᤖᤥ॥#ᤏᤡᤱ ᤛᤢᤶ ᥈᥈:᥇᥎
25ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠᤸᤗᤧ ᤁᤢᤒᤣᤛᤠᤱ ᤁᤢᤶᤔᤠ. ᤁᤢᤴᤇᤢᤔᤠ᤹. ᤰᤗᤥᤐᤠᤛᤖᤧ ᤁᤢᤔᤣᤳ ᤔᤖᤡᤕᤔ. ᤜᤧᤰᤁᤩᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡᤛᤡ ᤔᤧᤕᤧᤒᤧᤖᤥ॥ 26ᤕᤧᤛᤢᤖᤧ ᤁᤢᤶᤔᤠ ᤜᤧᤰᤁᤩᤠᤱ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤴᤏᤠᤱ ᤂᤧᤵᤔᤥ ᤏᤡ᤺ᤳᤋᤠᤱ ᤕᤧᤒᤧᤳᤇᤡᤒᤠ ᤏᤡᤛᤢᤛᤡᤸᤗᤧ ᤁᤢᤶᤔᤠ ᤔᤧᤳᤋᤢ. “ᤂᤢᤏᤧ᤹ᤃ ᤁᤧᤛ᤻ᤛᤠᤖᤥ॥” 27ᤜᤧᤰᤁᤩᤠᤱ ᤂᤧᤴ ᤜᤢ᤹ᤛᤠᤶᤒᤠᤴ ᤔᤧᤳᤋᤢ. “ᤂᤢᤏᤧ᤹ᤃ ᤌᤠᤔᤧᤴᤍᤡᤱ ᤁᤧᤶᤔᤠᤖᤥ॥” ᤂᤧᤴ ᤕᤧᤶᤔᤠᤱᤎᤥᤃ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤔᤖᤡᤕᤶᤔᤡᤴ ᤁᤢᤜᤡᤶᤔᤥ ᤋᤣ᤹ᤖᤢᤖᤥ॥
ᤕᤧᤛᤢᤖᤧ ᤁᤢᤛᤡᤔᤧᤴ
(ᤔᤳᤋᤡ ᥈᥍:᥊᥋-᥋᥌; ᤔᤷᤁᤢ ᥇᥋:᥉᥉-᥊᥇; ᤗᤢᤁᤠ ᥈᥉:᥊᥊-᥊᥏)
28ᤕᤠᤱᤛᤡ ᤕᤧᤛᤢᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤒᤠ ᤏᤡᤛᤢᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤘᤠᤔᤡᤛᤧᤖᤥ॥”#ᤏᤡᤱ ᤛᤢᤶ ᥈᥈:᥇᥋. ᥌᥏:᥈᥇ 29ᤂᤧᤵᤔᤥ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ#᥇᥏:᥈᥏ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤴᤈᤥ ᤘᤠᤔᤡ᤺ᤔᤠ ᤁᤧᤈᤡ᤺ᤶᤒᤠ ᤌᤡ᤺ ᤘᤕᤧ॥ ᤁᤴ ᤌᤡᤴ ᤌᤰᤛᤢᤒᤠᤜᤠ᤹ ᤏᤢ ᤘᤣ᤹ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤔᤧᤎᤢᤅᤢ॥ ᤁᤧᤕᤠᤰᤐᤠ ᤐᤷᤕᤠᤔᤠᤎᤡᤰ ᤕᤢᤅᤧ॥ ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤡᤃᤠᤰᤔᤠ᤺ᤴ ᤆᤧᤸᤗᤧᤰᤛᤣ᤹ ᤌᤡᤀᤥ ᤔᤧᤏᤡ᤺ᤵᤛᤢᤀᤠᤱ ᤜᤡᤛᤐ ᤛᤡᤱᤅᤡᤸᤗᤧ ᤁᤢᤒᤥᤖᤠᤰᤁᤥ ᤔᤧᤓᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤔᤢᤖᤠᤀᤥ ᤂᤧᤴ ᤔᤧᤎᤢᤵᤋᤢ ᤔᤧᤒᤡᤖᤢᤖᤥ॥ 30ᤕᤧᤛᤢᤖᤧ ᤂᤧᤴ ᤐᤡ᤺ᤳᤋᤢᤀᤠᤱ ᤐᤠ᤺ᤳᤋᤢ. “ᤀᤠᤸᤗ ᤆᤢᤖᤧᤖᤥ॥” ᤜᤧᤰᤁᤣ ᤐᤠ᤺ᤳᤋᤢᤖ ᤁᤢᤎᤣᤃᤣ᤺ᤰᤐᤧᤴ ᤋᤷᤄᤢ᤹ ᤌᤠ᤺ᤛᤢ ᤜᤧᤰᤁᤩᤠᤱ ᤁᤢᤛᤰᤔᤠᤴ ᤗᤧᤖᤢᤍᤣᤛᤢᤀᤠᤱ ᤛᤩᤧᤖᤥ॥
31ᤁᤱᤃ ᤋᤱᤒᤣᤒᤠ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤠ ᤜᤧᤰᤁᤩᤠᤱ ᤕᤶᤒᤠ ᤏᤠ᤺ᤶᤛᤡᤱ ᤕᤧᤴᤏᤡᤴᤏᤢ᤺ᤸᤗᤧ ᤌᤡᤰᤕᤧᤴ ᤋᤃᤡ ᤘᤕᤧᤖᤥ॥ ᤕᤜᤢᤍᤡᤜᤠ᤹ᤖᤧ ᤏᤠ᤺ᤶᤛᤡᤱ ᤕᤧᤴᤏᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ#᥇᥏:᥉᥇ ᤗᤠᤱ ᤀᤧᤱᤔᤠᤸᤗᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤏᤠᤒᤠ ᤔᤏᤠᤜᤠ᤹ ᤜᤠᤖᤠ ᤔᤧᤛᤡ᤺॥ ᤆᤣᤜᤠ᤹ ᤔᤧᤒᤵᤐᤠ ᤂᤢᤏᤡ᤹ ᤛᤡᤖᤠ᤹ ᤔᤧᤎᤠᤱᤅᤡᤴᤒᤠᤸᤗᤧ ᤆᤥᤃᤢᤸᤗᤧ ᤜᤠᤖᤠ ᤔᤧᤛᤡᤖ ᤑᤠ᤹ᤀᤠᤱ ᤂᤢᤏᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤀᤠᤱ ᤔᤧᤎᤠ᤺ᤛᤢᤛᤡᤖ ᤑᤠ᤹ᤀᤠᤱ ᤐᤡᤗᤠᤋᤛᤧᤴ ᤐᤣᤗᤡ ᤔᤧᤓᤠᤰᤋᤢᤖᤥ॥ 32ᤂᤧᤸᤗᤧᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢᤴ ᤏᤢ ᤔᤧᤓᤥ᤺ᤴᤍᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤖᤥ॥ 33ᤁᤖ ᤂᤧᤱᤜᤠ᤹ ᤕᤧᤛᤢᤖᤥ ᤔᤧᤓᤧᤖᤧᤸᤗᤧ ᤕᤧᤛᤢ᤺ᤴᤃ ᤋᤃᤡᤀᤣ ᤛᤩᤧᤒᤠ ᤔᤧᤏᤡᤛᤢᤀᤠᤱ ᤂᤢᤏᤧ᤹ ᤁᤢᤗᤠᤱᤜᤠ᤹ ᤔᤧᤴᤀᤧᤰᤂᤢᤴᤗᤥ॥ 34ᤜᤧᤰᤁᤣᤛᤠᤱ ᤌᤡᤰ ᤌᤰᤛᤢᤒᤠᤸᤗᤧ ᤕᤧᤛᤢᤖᤧ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤌᤢᤒᤢᤸᤗᤧ ᤂᤡᤔᤥ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤏᤢ ᤆᤫᤠ᤺ᤳ ᤗ᤺ᤴᤍᤧᤖᤥ॥ 35ᤂᤡᤏᤡ᤹ᤀᤠᤱ ᤏᤛᤠᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤂᤧᤴ ᤐᤥ᤺ᤰᤂᤧᤒᤠ ᤐᤠᤴ ᤁᤧᤏᤡ᤺ᤒᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥ 36“ᤂᤢᤏᤧ᤹ ᤁᤢᤕᤧ᤺ᤵᤐᤠᤜᤠ᤹ ᤗᤳᤌᤡᤰᤁᤠᤱ ᤔᤧᤀᤧᤰᤏᤧᤴᤗᤥ”#ᤗᤠ ᥇᥈:᥊᥌; ᤏᤡᤱ ᤛᤢᤶ ᥉᥊:᥈᥆; ᤂᤠᤏᤡ᤺ᤳ ᥏:᥇᥈ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤛᤠᤶᤕᤥᤛᤠᤵᤗᤠᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ. 37ᤜᤧᤰᤁᤩᤠᤱ ᤘᤣ᤹ ᤋᤧᤴᤏᤥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ. “ᤁᤧᤎᤢᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤔᤧᤎᤢᤒᤢᤒᤠᤴ ᤀᤥᤔᤧᤔᤧᤳᤋᤢᤖᤥ॥”#ᤈᤁ ᥇᥈:᥇᥆
ᤕᤧᤛᤢᤴ ᤀᤡ᤺ᤵᤐᤢᤱᤅᤥ ᤔᤧᤈᤡᤰᤂᤢ᤹
(ᤔᤳᤋᤡ ᥈᥍:᥋᥍-᥌᥇; ᤔᤷᤁᤢ ᥇᥋:᥊᥈-᥊᥍; ᤗᤢᤁᤠ ᥈᥉:᥋᥆-᥋᥌)
38ᤂᤧᤴ ᤀᤣᤃᤠᤱ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥ ᤂᤢᤏᤧ᤹ ᤕᤜᤢᤍᤡᤜᤠ᤹ ᤁᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤐᤡᤗᤠᤋᤛᤖᤧ ᤀᤡᤱᤈᤠᤱ ᤐᤡᤖᤢᤀᤠᤱ ᤂᤧᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤌᤠ᤺ᤛᤢᤀᤠᤱ ᤋᤣ᤹ᤖᤢ॥ 39ᤋᤃᤡ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤍᤠᤒᤠ ᤏᤡᤁᤥᤍᤣᤔᤛᤖᤧ ᤕᤢᤛᤢᤑᤧᤴ ᤋᤣ᤺ᤱ ᤔᤧᤳᤋᤢᤀᤠᤱ ᤘᤕᤧ॥ ᤏᤡᤁᤥᤍᤣᤔᤛᤖᤧ ᤔᤢᤷᤖ ᤏᤢ ᤂᤠᤶᤍᤥᤗᤡ ᤑ᤺ᤶᤔᤏᤠᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤶᤛᤢᤶ (᥉᥉) ᤁᤡᤗᤥ ᤔᤠᤖᤢᤰᤁᤡᤴ ᤋᤠᤖᤢᤀᤠᤱ ᤘᤕᤧᤖᤥ॥ 40ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤕᤜᤢᤍᤡ ᤆᤣ ᤗᤢᤵᤔᤠ ᤌᤡᤶ ᤁᤢᤀᤡᤛᤡᤰ ᤔᤠᤖᤢᤰᤁᤡᤴ ᤜᤢ᤺ᤳᤋᤧᤳᤇᤢᤀᤠᤱ ᤏᤢᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤧᤳᤇᤢᤖᤥ॥ 41ᤀᤠᤸᤗ ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠ ᤋᤧᤴᤏᤥ ᤑᤢᤱᤀᤡᤰ ᤌᤡᤰ ᤏᤧᤛ᤻ᤛᤧ॥ ᤂᤧᤴ ᤑᤢᤱᤀᤡᤰᤁᤥ ᤀᤠᤸᤗᤥ ᤌᤠᤖᤡᤰ ᤔᤏᤠ ᤔᤧᤴᤏᤧᤀᤣ ᤁᤧᤘᤠ᤹ᤒᤠ ᤀᤡ᤺ᤵᤐᤢᤱᤎᤡᤰ ᤏᤧᤛ᤻ᤛᤧᤖᤥ॥ 42ᤁᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤴ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡ᤺ᤵᤐᤢᤱᤅᤡᤴ ᤏᤡ᤺ᤳᤋᤠᤱ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤏᤧᤛ᤻ᤛᤧᤳᤇᤢᤖᤥ॥
Currently Selected:
ᤕᤢᤜᤢᤴᤏᤠ 19: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.