San Juan 2
2
Nujbinel ta lum Caná ay ta sq'uinal Galilea
1Yoxebalix c'aal ta patil a te la spasic q'uin nujbinel ta banti lum Caná te ay ta sq'uinal Galilea. Tey ay uuc a te sme' te Jesuse, 2soc ic'otic tel ta yilel nujbinel uuc te Jesús soc te jnopojeletic yu'une. 3Ja'uc me to, laj yu'unic te vinoe. Jich tal ta stojol Jesús te sme'e, soc la yal:
—Ma'yuquix vino yu'unic —xi'.
4La yal te Jesuse:
—Me'tic, ¿bistuc ya awalbon jich? Melel ma to sta yorail cu'un —la yut.
5Ja'uc me to, te sme' te Jesuse ba yalbey yaiyic te abatetique:
—Ya me apasic spisil te bi ya yalbeyexe —xi'.
6Ay waqueb tinaja tey a te spulil ja'e, yu'un te judioetique c'aemic te ya spoquilay sc'abic swenta xch'uunel Dios ta sc'opic. Ay che'oxeb muc'ul q'uib sbaalic te jujune. 7Te Jesús la yalbey te abatetique:
—Nojesaic ta ja' in tinajaetic to —xi'.
Jich la snojesic moel c'alal ta sti'il. 8La yal ts'iin te Jesuse:
—Lupaic, loq'uesaic jtebuc. Baan, ac'beyaic te jwolwanej yu'un te q'uine —la yut.
Jich la yich'beyic bael, la yac'beyic. 9Te jwolwanej yu'un te q'uine, la yuch' yaiy te ja' c'atp'ujem ta vinoe. Xujt' ma la sna' stojol te banti tale. Yan te abatetique, la sna'ic stojol stuquelic te banti la slupic tel te ja'e. Te jwolwanej la yic' tel te winic ya xnujbine. 10Jich la yalbey:
—Spisil ants-winiquetic c'aemic a te ja' neel ya yich' puquel te lequil vinoe. Te c'alal la yuch'iquix bayal a te mach'atic ic'bilique, patil ya yich' puquel ts'iin te ma'yuc sbujts'e. Yan te ja'ate aq'uejoj te lequil vinoe. Ja' to nax la awac' ta ilel ta ora to —la yut.
11Ja' in to, ja' sbabial yu'un spisil te señailetic te la yac' ta ilel yutsilal a te Jesuse. Tey c'ot ta pasel ta lum Caná te ay ta sq'uinal Galilea. Te bit'il la yilbeyic seña yu'el Jesús te jnopojeletique, jich la xch'uun yo'tanic te mach'a a.
12Patil co bael ta Capernaúm#Mt 4.13. te Jesuse. Joinot bael yu'un te sme'e soc te yijts'inabe soc uuc te jnopojeletic yu'une. Ma ba bayal c'aal jalajic tey a.
Jesús la yac' ta utstesel te temploe
(Mt 21.12-13; Mr 11.15-18; Lc 19.45-46)
13Nopolix yorail q'uin Pascua#Ex 12.1-27; Dt 16.1-8. yu'un te judioetique. Jich te Jesuse mo bael ta Jerusalén. 14Tey ta templo la sta te jchon-wacaxetic soc te jchon-chijetic soc te jchon-palomaetique soc te jel-taq'uinetic te najc'ajtic tey a. 15Te Jesús la spas ta chicote te ch'ajane. La sten loq'uel ta templo spisil te chijetique soc te wacaxetique, soc la sbusq'uinbey staq'uinic te jel-taq'uinetique, soc la scotp'inbey bael te smesaique. 16La yalbey te jchon-palomaetique:
—Loq'uesaic bael spisil in to. Ma me xac'atp'unic ta ch'iwich te sna te Jtate —xi'.
17Te jnopojeletique jul ta yo'tanic te bit'il jich ts'ibubil jilele: “Mero ya xlajon ya caiy yu'un te bayal sc'oplal ta co'tan te anae”,#Sal 69.9. te xie. 18Te jwolwanej-judioetique tal sjojc'obeyic te Jesuse:
—¿Bi seña ya apasbotic quiltic yu'un te bila yacat ta spasele? —xiic.
19La yal te Jesuse:
—Jinaic in templo to. Ta oxeb nax c'aal ya jcha'pas xan ta yach'il#Mt 26.61; 27.40; Mr 14.58; 15.29. —xi'.
20La yalic te jwolwanej-judioetique:
—Waqueb yoxwinic (46) ja'wil meltsaj in templo to. Yan te ja'ate ¿bit'il ya xju' awu'un te oxeb nax c'aal ya acha'pas xan ta yach'ile? —xiic.
21Te templo la yale, ja' la yalbey sc'oplal te sbaq'uetale. 22Jich yu'un te c'alal cha'cux tel ta bay animaetic te Jesuse, jich jul ta yo'tanic te jnopojeletic yu'un te bit'il jich yaloje. Jich la xch'uunic te bila ts'ibubil ta Sjun te Diose soc te bila la yal te Jesuse.
Jesús ya sna'bey yo'tan spisil te ants-winiquetique
23Te bit'il ay ta Jerusalén ta yorail q'uin Pascua te Jesuse, bayal mach'a la xch'uun yo'tanic ta swenta yu'un la yilic te señaetic te yac ta spasele. 24Te Jesús ma la yac' sba ta na'el ta stojolic, yu'un sna'ojbey te bi yilel yo'tanic spisil te ants-winiquetique. 25Ma yejt'aluc te ay mach'a ya yalbey yaiy te bi yilel yo'tanique, melel ya sna' stuquel te bi yilel co'tantic juju-jtulotique.
Currently Selected:
San Juan 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.