Isaías 1
1
Judá, mulawil lum
1Te j'alwanej Isaías, snich'an Amoz, ac'bot sna' stojol te bit'il ay sc'oplal yu'un Dios te Judá soc Jerusalén, te c'alal ayic ta muc' ajwalil yu'un Judá#Mi 1.1. a te Uzías,#2 R 15.1-7; 2 Cr 26.1-23. Jotam,#2 R 15.32-38; 2 Cr 27.1-9. Acaz#2 R 16.1-20; 2 Cr 28.1-27. soc Ezequías.#2 R 18.1—20.21; 2 Cr 29.1—32.33.
2Ch'ulchan soc balumilal,
aiya awaiyic stojol te bila ya yal te Cajwaltique:
—La jmuc'tes te jnich'nab ja' to c'alal la sta yipic;
ja'uc me to, caj stoy sbaic ta jtojol.
3Te j'at'el-wacaxe ya sna'bey sba te yajwale,
te burro ya sna'bey sba te yawil swe'el yu'un yajwale.
Yan te Israel te lum cu'une, ma sna'bonic jba,
ni ma'yuc bi ya sna'ic —xi'.#Jer 8.7.
4¡Obol abaic ja'ex, lum te jmulawilexe,
te nojel mulil ta awo'tanic;
sts'umbalex te mach'a amen yat'elique,
snich'nabex jmulawil!
C'ubul ayexix ta stojol te Cajwaltique,
la aq'uej abaic loq'uel ta stojol te Ch'ul Dios yu'un Israel,
la awijq'uitayix ta awo'tanic.
5Te ja'exe ya awat'elinic spasel te toybail,
ta abaq'uetal ma'yuquix bay jochol te ya awich' xan castigo.
Ta swolol ajol ejch'enajem,
jc'axel ch'ayem te awip ta jyalele.
6Jajch'em ta awacan c'alal ta ajol,
ma'yuc bay xujt'uc lec tey a;
ta scojt'ol abaq'uetal ay ta ejch'en,
sijt'emiquix, jamajtiquix ta c'a'el.
Ma'yuc mach'a xpoxtayej, ni ma'yuc mach'a spotsojbat,
ma'yuc mach'a la slamantesbeyex xc'uxul ta aceite.#Jer 30.12-15.
7Te alumale jochol taquin q'uinal jilel,
yaquix ta tilel ta c'ajq'uel te lumetic awu'unique.
Ta mero asit-awelawic te ja'exe
ya swe'elinbat acontroic te bitic ats'unojique.
Spisil c'atp'ujix jilel ta jochol taquin q'uinal,
jich bit'il lum Sodoma te c'alal la yich' jinele.
8Ja' nax sepel jilel stuquel te lum Sión,
jich jil te bit'il ch'in lejch'patna ta yolilal te ts'usubiltique,
stuquel jil jichuc na ta yolilal ta bay ts'unul melonetic,
stuquel sepel jilel jichuc jpam lum te joytaybil yu'un yajcontro.
9Te Cajwaltic te Spisil ya xju' yu'une,
te manchuc lajuc scoltayotic,
jich c'oemotic te bit'il te lum Sodoma soc Gomorra#Gn 19.1-29; Ro 9.29. te jichuque.
Bit'il ay ta ch'uunel ta melel te Diose
10Jtsobwanejetic yu'un Sodoma c'oemex,
aiybeya awaiyic stojol sc'op te Cajwaltique;
lum Gomorra,#Jer 23.14. aiya awaiy stojol ta lec te bitic ya yac'bat anop te Dios cu'untique.
11Te Cajwaltic ya yal:
—¿Bistuc ya awac'bonic bayal milbil majt'anil?
Tic'onix a te chic'bil tat chijetic
soc te xepuil wacaxetic te buen mac'linbilique;
ma smulanix co'tan xch'ich'el te wacaxetic, chijetic soc te tentsunetique.
12Te ja'ex ya xtalex yu'un te ya atejc'an abaic ta jtojole;
ja'uc me to, ¿mach'a la yalbeyex te ya xtal atec'bonic te amaq'uetic cu'une?
13Ma me x'awac'bonic majt'anil te ma'yuc sc'oplal cu'une;
ma xcujch'ix cu'un te xch'ailele.
Te ja'ex ya awiq'uic te alumal
te ya apasic q'uin yu'un te yach'il u soc te sc'aalelal cux-o'tan;
te jo'one ma jmulan te q'uinetic yu'un te alumal
te bit'il yacalic ta spasel te bitic amene.
14Ya quilay te q'uinetic yu'un te yach'il u soc te ya atsobilay abaique;
ma sc'anix co'tan,
ma xcujch'ix cu'un ta jyalel.#Jer 6.20; Am 5.21-22.
15Te c'alal ya atoy ac'abic ta ac'oponbelone,
ya jq'uej bael jsit ta atojolic;
manchuc me bayal ya xc'opojex,
ma ba ya caiybeyex stojol.
Ts'ilajem ac'abic yu'un ch'ich'.
16Poca abaic, sapa abaic.
Q'uejbonic bael ta jsit te amulique;
ijq'uitayaic ta spasel te bila ma lecuque.
17Nopaic spasel te bila leque;
pasaic tulan ta spasel te bila toje.
Coltayaic te mach'a tenbil ta uts'inele,
lecuc me te bila ya apasbey te me'ba alale,
c'opojanic yu'un te me'ba antse#Ex 22.21-22; Dt 24.17-21; 27.19. —xi' te Cajwaltique.
18Te Cajwaltic la yal:
—La'ic, ya jchaptic te aiyeje:
Manchuc me jich amulic te bit'il mero tsaje,
ya jc'atp'unbeyex ta sac, jichuc saquil toib;
manchuc me jich te bit'il pac' ts'ajbil ta tsaj,
sac ya xc'ot cu'un, jichuc saquil stsotsil chij.
19Teme ya xc'ot ta awo'tanic xch'uunel te jmandale,
ya me awe'elinic te bi slequil ya yac' te lumq'uinale.
20Yan teme ja' nax ya awat'elinic spasel toybail,
ma me ayuc xpoxil, ora me ya xlajex ta guerra —xi'.
Ja' nix te Cajwaltic te la yal loq'uel ta ye.
Cajwaltic ya spocbey loq'uel spisil sbolil Jerusalén
21Ja'at lum te jun nax awo'tan ta neelale,
¿bit'il ay a te pajal c'oat soc te jmulawil antse?#Jer 3.6-10; Ez 16.15-36; 23.1-49.
Ta neelal, toj at'ejic ta spisilic te ants-winiquetique,
toj nax ainic ta jujun c'aal;
yan ta ora to, ma'yuc bi ay ta awo'tanic,
ja' xanix te milawe.
22Jichat te bit'il saquil taq'uin ta neelal,
yo'tic c'atp'ujatix ta c'a'pal;
mero lequil vinoat ta neelal,
yo'tic c'atp'ujatix ta tojol ja'.
23Toybaetic te ajwaliletic awu'unique,
ja' sjoy sbaic soc te j'eleq'uetique.
Spisilic ya spasic chajbanwanej ta puro taq'uin,
ya sleic te yacuc ac'botuc majt'aniletique.
Ma ba lec ya xchajbanic te me'ba alaletique,
ni ma'yuc sc'oplal ta yo'tanic te bitic ay ta swentaic te me'ba antsetique.
24Jich yu'un te Cajwaltic te Spisil ya xju' yu'une,
ja' te mach'a ay bayal yu'el ta lum Israel, ya yal:
—Tiq'uix a. Jo'on ya cac'bey stoj te mach'atic ya scontroinone.
Ya quich'bey spacol ta stojolic.
25Ya me jach xan jc'ab ta atojol;
ya jchic'bat ta jc'axel te bila amene;
jich ya jpocbat loq'uel spisil te amule.
26Ya me cac' te ayuc xan jchajbanwanejetic awu'unic
jich bit'il ta neelale,
soc jtojteswanejetic awu'unic jich bit'il ta xjajch'ibale.
C'alal ya xlaj co'tan ta spasel, ya me jcha'albeyex ac'oplalic:
“Lum te toj yat'ele, lum te jun yo'tane”,#Zac 8.3. xi' me ac'oplalic.
27Te toj-o'tanil cu'une ja' ya caiy coltaywanej a;
ya cac' ta libre a te yajwal lum Sión te ya sujt'ic xan ta jtojole.
28Ja'uc me to, ya jwuy te jtoyba-mulawiletique;
te mach'atic ya yijq'uitayonique, ya me xlajic.
29Ya me xq'uexawex ja'ex yu'un te jijte'etic soc te yawil nichimetic
te toyol ya amulanic
te banti ya ach'uunic te loc'ombaetique.
30Te ja'exe jich ya xc'oex te bit'il yabenal jijte' te c'anubenique;
soc ja' pajal ya xc'oat soc te yawil nichim te xujt' ma'yuc ya'lele.
31Te tulanil winic jich ya xc'ot te bit'il taquin ac,
te yat'ele, jich bit'il snichc'ajc':
ta xchebalic pajal nax ya xc'ajq'uic
soc ma me ayuc mach'a ya stup' —xi' te Cajwaltique.
Currently Selected:
Isaías 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.