2 Reyes 7
7
1La sjac' te Eliseo:
—Aiybeya awaiy te sc'op te Cajwaltique. Jich la yal: “Pajel ta jichilan ora, ta yochibal lum Samaria ya me xju' ta manel juqueb litro harina ta jsejp nax plata, soc jsejp nax plata ya xju' ta manel jo'lajuneb litro cebada”, xi' te Cajwaltique —xi'.
2Te yabat te muc' ajwalil te stsacojbey sc'abe, la sjac'bey sc'op te Eliseo:
—Manchuc me ya sjambey sventanaul ch'ulchan te Cajwaltique, ma xju' ya xc'ot ta pasel te bi ya awale —xi'.
Pero la sjac' te Eliseo:
—Ya me awil ta asit, pero ma ba ya awe' —xi'.
3Ja' nix ta yorail a, ay chantul c'a'el-chameletic te ayic ta yochibal te lume. Jich la yalbey sbaic:
—¿Bi ya jpastic te li' nacalotic ta smaliyel bi ora ya xlajotic? 4Teme ya jnoptic ya x'ochotic bael ta yutil te lume, ya xlajotic ta wi'nal, melel bayal wi'nal tey a. Teme li' ya jnajc'an jbajtique, ja' nix jich ya xlajotic. Ja' lec c'axucotic bael ta banti scampamento te siriaetique. Teme ma ba ya smilotique, ya me xcuxinotic. Teme ya smilotique, jichuc, melel ya nix xlajotic a —xiic.
5Jich la spasic. Ta yijc'ubel q'uinal jajch'ic bael, tojic bael ta banti ay scampamento te siriaetique. Pero te c'alal nopolix ayic a, la yaiyic te ma'yuc mach'a chican tey a. 6Yu'un ja' nix te Cajwaltic te la yac'bey yaiyic te siriaetic te chicnaj sc'op carretaetic yu'un guerra, soc caballoetic soc bayal soldadoetic. Te siriaetic la scuyic te la xchapix sc'op te muc' ajwalil yu'un Israel soc te yantic muc' ajwaliletic yu'un hititaetic soc muc' ajwaliletic yu'un egipcioetic te ya x'ac'botic guerra yu'unique. 7Ja' yu'un jajch'ic bael ta anel ta yochel ajc'ubal. La yijq'uitayic jilel te snailpaq'uic, caballoetic, burroetic. Jich lamal la yijq'uitayic jilel te sbiluquic ta scampamentoic, swenta yu'un ma ba ya xlajic a te la yalique.
8C'alal c'otic te jchameletique, noptsajic bael ta campamento. Ochic ta jun nailpac', ochic ta we'el ta uch'el. La yich'ic bael plata, oro soc c'u'iletic, ba snaq'uic. Patil cha'sujt'ic, ochic xan ta yan nailpac'. Ja' nix jich la yich'ic biluquetic, ba snaq'uic. 9Pero jich la yalbey sbaic:
—Pero ma ba lec bi yacotic ta spasel. Yo'tic ja' yorail te ya sc'an ya caltic te bi yach'il bayal yutsil chicnajeme. C'otix ta pasel, pero quechel ta alel cu'untic. Teme ya to jmaliytic ya sacub q'uinale, ya me x'ac'ot jmulintic. Ja' lec teme ya xbootic ta sna te muc' ajwalile, tey me ya xc'o caltic a —xiic.
10Jich bajt'ic, la yawtayic te jcananetic yu'un te lume, jich la yalbeyic:
—Xc'ootiquix ta scampamento siriaetic. Mero ma'yuc mach'a chican tey a, ni jtuluc mach'a xchicnaj sc'op. Ja' nax tey chucajtic caballoetic soc burroetic a, soc te snailpaq'uic jich nix jilemic te bit'il la spasique —xiic c'oel.
11Te mach'atic yacalic ta scanantayel te yochibal lum, ora la sticunic ta iq'uel te mach'atic ayic ta sna ajwalil. 12Jich jajch' te muc' ajwalil, manchuc me ajc'ubal a. Pero jich la yalbey te capitán-soldadoetic yu'un:
—Ya calbeyex awaiyic te bi snopoj te siriaetique: Loq'uemic ta scampamentoic, snac'oj sbaic ta ja'maltic. Melel sna'ojic te ay jwocoltic yu'un wi'nal, soc snopojic te c'alal ya xloc'otic bael li' ta jlumaltic, te cuxul ya stsacotic. Jich me ya x'ochic tel ta jlumaltic —xi'.
13Pero ay jtul capitán-soldado yu'un jich la yal:
—Ac'a yich' ticunel winiquetic, ac'a yiq'uic bael jo'cojt'uc te caballoetic jileme. Ya me quiltic bila ya xc'ot ta pasel, teme ya xcuxinic o ya xlajic. Melel pajal nix ya xlajotic te jayebotic ya xjilotic li'to —xi'.
14Jich la xchajbanic cheb carretaetic soc caballoetic. Te muc' ajwalil la sticun bael ta scampamento te siriaetique, la yalbey bael mandal ta stsajtayel ta lec. 15La st'unbeyic bael yacan te siriaetic c'alal ta muc'ja' Jordán. La yilic te xch'ixil be ay bayal c'u'il-pac'aletic soc yantic biluquetic te ch'ojbil jilel yu'unic te siriaetic ta scaj te sujoj sbaic ta anel, swenta ma x'ochic ta c'abal a. Patil sujt'ic tel te mach'atic la sticun te muc' ajwalile, jul yalic te bi la yilique. 16Ora bajt'ic te winiquetic, ba yich'ic spisil te bitic ayic ta scampamento te siriaetique. Jich nix te bit'il albil yu'un te Cajwaltique, te harina la yich' chonel ta jsejp nax plata te juqueb litro; te cebada la yich' chonel ta jsejp nax plata te jo'lajuneb litro.
17Te muc' ajwalil la yalbeyix mandal te sjoy ta at'el te ya me swentain scanantayel yochibal te lume, pero cotp'inot yu'un bayal ants-winiquetic tey a, jich laj. Jich nix c'ot ta pasel te bit'il albot yu'un te j'alwanej te c'alal c'ot ta ilel yu'un te muc' ajwalile. 18Soc c'ot ta pasel te bila albot te muc' ajwalile, te ya yich' chonel tey ta yochibal te lum Samaria juqueb litro harina o jo'lajuneb litro cebada ta jsejp nax plata. 19Te sjoy ta at'el te ajwalil la sjac'bey te sc'op j'alwanej yu'un Dios, jich la yal:
—Manchuc me ya sjambey sventanaul te ch'ulchan te Cajwaltique, ma xju' ya xc'ot ta pasel te bi ya awale —xi'. Pero jac'bot yu'un te Eliseo, te ya yil ta sit pero te ma ba ya swe' stuquele. 20Mero jich nix c'ot ta pasel a, melel cotp'inot yu'un te bayal ants-winiquetic ta yochibal lum, jich laj tey a.
Currently Selected:
2 Reyes 7: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.