2 Reyes 3
3
Yat'el Joram muc' ajwalil yu'un Israel
1Ta waxaclajuneb ja'wil yat'el ta muc' ajwalil ta Judá a te Josafat, te Joram snich'an Acab och ta ajwalil ta stojol Israel. Jalaj ta muc' ajwalil ta Samaria lajchayeb ja'wil. 2Te yat'el amen ta stojol Cajwaltic, pero ma mero jichuc te bit'il yat'el te sme'-stat, melel la sloq'ues te ch'ultesbil ton yu'un Baal la spas te state. 3Manchuc me jich la spas, pero la nix spas te muliletic la spas te Jeroboam te snich'an Nabat, te la yac'bey sta smulic te israeletique.
Eliseo la yal te ya yich' tsalel Moab
4Te Mesa, te muc' ajwalil yu'un Moab, yat'elinej xch'ijtesel chijetic. Ay ta swenta yaq'uel yu'un spatan jo'winic ta jmil (100,000) alal chijetic te muc' ajwalil yu'un Israel, soc jo'winic ta jmil (100,000) muc'ul tat chijetic soc stsotsilic. 5Pero te c'alal laj Acab, te muc' ajwalil yu'un Moab la stoy sba ta stojol te muc' ajwalil yu'un Israel. 6Te muc' ajwalil yu'un Israel, ja' te Joram, loc' jajch'el ta Samaria, la stsob ta spisil te soldadoetic yu'un Israel. 7Patil la sticun ta alel te muc' ajwalil ta Judá, jich la yalbey: “Te muc' ajwalil yu'un Moab la stoyix sba ta jtojol. ¿Ya bal ac'an ya ajoinon ta yaq'uel guerra?” la yut.
Te muc' ajwalil yu'un Judá la sjac': “Ya joinat, melel te jo'on soc te soldadoetic cu'un, soc nix te soldado cajajtic ta caballo ya xbajt'ic ta guerra, ya me joinat soc te awinictaque. 8Pero ¿banti beil toj ya xbootic ta yaq'uel guerra?” xi'. Te Joram la sjac': “Tojotic ta be ta jochol taquin q'uinal yu'un Edom”, xi'.
9Jich ta yoxebal te muc' ajwaliletic, ja' te muc' ajwalil yu'un Israel, te yu'un Judá soc te yu'un Edom, jajch'ic ta beel. Ta scaj te jalajic juqueb c'aal ta beel ta yaq'uel buelta, laj te ja' ya xtuun yu'un te soldadoetic, soc te ya yuch' te chambalametic yu'unique. 10La yal te muc' ajwalil yu'un Israel:
—¡E! Jich me ya quil te bit'il ta coxebaltic te muc' ajwalilotic, la yic'otic tel Cajwaltic yu'un ya yac'otic ta sc'ab te moabetique —xi'.
11La sjac' te Josafat:
—¿Ma bal ayuc j'alwanej yu'un Cajwaltic li'to te ya xju' ya sjojc'obotic te Cajwaltic? —xi'.
Jtul capitán yu'un soldadoetic yu'un te muc' ajwalil ta Israel, jich la yal:
—Li' ay te Eliseo, te snich'an Safat, te abat yu'un Elías —xi'.
12La yal te Josafat:
—Ay me bi ya yalbotic ta swenta te Cajwaltique —xi' te Josafat.
Te muc' ajwalil yu'un Israel soc te muc' ajwalil yu'un Judá, ja' te Josafat, soc te muc' ajwalil yu'un Edom ora ba yilic te Eliseo. 13Pero te Eliseo jich la yalbey te muc' ajwalil yu'un Israel:
—¿Bi jwentaat a te ja'ate? Baan, jojc'obeya te j'alwanejetic yu'un lotil diosetic yu'un te ame'-atate —la yut.
Pero te muc' ajwalil yu'un Israel la yac' puersa ta c'op:
—Ma'uc, melel ja' te Cajwaltic la yic'otic tel te oxeb muc' ajwalilotic, swenta yu'un ya x'ochotic ta sc'ab te moabetique —xi'.
14Jich albot yu'un te Eliseo:
—Jc'axel jamal ya cal ta stojol te Cajwaltic te Spisil ya xju' yu'une, soc te ya yilone: Te manchuc ja'uc ta swenta te yu'un ya quich' ta muc' te Josafat, te muc' ajwalil yu'un Judá, ma ba la quich'at ta wenta, soc ni lajuc quilat yilel te jichuque. 15Lec ay, ic'bonic tel jtuluc mach'a ya stijbon caiy arpa —xi' te Eliseo.
Te c'alal jajch' ta tijel te arpa, te Cajwaltic la swentain te Eliseo. 16Te Eliseo jich la yalbey te ajwaliletic:
—Te Cajwaltic jich la yalix: “Pasaic bayal stanqueil ja'etic li' ta stenlej xatal q'uinal. 17Melel manchuc me ma'yuc ic' soc ni yacuc awilic ja'al, pero ya me xnoj ta ja' te beja'e. Ta apisilic ya me awuch'ic, soc nix te achambalamique”, xi'. 18Ja' to nax jteb seña te ya xju' ya spasbeyex awilic te Cajwaltic, melel ya to me yac'beyex ta ac'abic te moabetique, 19soc ja'ex me ya ajinic te lumetic joytabil ta ts'ajc', soc te lumetic bayal sc'oplalic, soc ya ats'etic te te'etic lequic ta lo'el site, soc ya abut'ic te sloq'uibja'etic, soc ya anojesic ta ton te q'uinaletic te yawil awalts'unubil —xi' te Eliseo.
20Jich c'ot ta pasel ta sab ta xchebal c'aal, ta yorail te ya yich' aq'uel smajt'an Dios ta templo, ta sq'uinal Edom tal te ja'e, jul spuc sba ta q'uinal.
21Te moabetic la yaiyic te yac ta bael ta stojolic te ya x'ac'botic guerra yu'un te muc' ajwaliletique. Ja' yu'un la stsobic spisil queremetic soc muc'ul winiquetic te staojix ya'wilalic ta soldadoil, c'o yac' sbaic ta sti'il te sq'uinalique. 22C'alal sacub q'uinal ta sab, te c'alal jajch'ic ta wayel, chican xojobil c'aal te ya xlem ta ja'e. C'alal la yilic te moabetic ta stojol te banti ayique, tsaj la yilic jichuc ch'ich'. 23Ja' yu'un jich la yalic:
—Ch'ich' me to. Te bi c'oem ta pasele, ja' nix la yac'beyix sbaic guerra te muc' ajwaliletique, ja'ic nix talel c'axel la smil sbaic. La'ic, moabetic, ya xba quich'beytic te bitic jil yu'unique —xiic.
24Pero c'alal ochic bael te moabetic tey ta scampamento soldado-israeletic, ora ac'bot guerra yu'un te israeletique, loq'uic ta anel ta stojol. Jich te israeletic la snutsic soc la smilic. 25Ochic ta lajinel te juju-jpam lumetic yu'unique, nojesbotic ta ton te sq'uinalic yu'un te yawil yawal-sts'unubic, la sbut'beyic spisil te sloq'uibja'etic yu'unic, soc la sts'etbeyic te te'etic te lequic ta lo'el site. Ja' xanix a jil te jpam lum te Kir-hareset sbiile. Pero te soldadoetic te swentainejic jimoch'il, la sjoytayic, tulan la yac'beyic guerra.
26C'alal la yil te muc' ajwalil yu'un Moab te ja' toyol yipic te scontrotac, te ja' peq'uel yipic te swinictaque, la yic' jo'lajunwinic xcha'bajc' (700) soldadoetic te ya xbeen ta yacanic, yu'un ya c'an sjam bael sbeic ta stojol banti ay te muc' ajwalil yu'un Edom. Pero ma ba ju' yu'unic spasel. 27Jich te ajwalil yu'un Moab la stsac te sba snich'an, te sc'oplal ja' ya x'och jilel ta sjelol ta muc' ajwalile, la yac' ta chic'bil smajt'an te bi diosinbil yu'un, ta sba te sjoyob ts'ajc'ul te lume. Mero chajp nax la yilic a te israeletique. Ja' yu'un la sjach sbiluquic ta scampamentoic, sujt'ic bael ta slumalic.
Currently Selected:
2 Reyes 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.