2 Reyes 25
25
1Ta baluneb ja'wil soc lajuneb u soc lajuneb c'aal yochel ta muc' ajwalil a te Sedequías, te muc' ajwalil Nabucodonosor bajt' ta stojol Jerusalén ta spisil soc soldadoetic yu'un.#Jer 21.1-10; 34.1-5; Ez 24.2. C'o sjoytay te lume swenta yu'un ma'yuc mach'a ya xloc' soc ma'yuc mach'a ya x'och tey a. Tey c'o xchajban scampamento ta banti mero stojol ay te lume. Ta sjoyobal la sbusanbeyic lum ta xch'ujt' sts'ajc'ul, yu'un smoibic ta yaq'uel guerra. 2Te lume tey joytabil ta soldadoetic a loc' bulucheb ja'wil yat'el ta muc' ajwalil te Sedequías. 3Ta sbalunebal c'aal jajch'el xchanebal u a te ja'wile, toy xan te wi'nal tey ta lum, te ants-winiquetic ma'yuquix bi la swe'ic. 4Ja' yu'un la slomic te sts'ajc'ul te lume.#Ez 33.21. Jich loq'uic ta anel ta ajc'ubal te mach'a muc' ajwalil soc te soldadoetic yu'un, manchuc me joytabilic yu'un te caldeoetique. Tey loq'uic bael ta stojol te banti ay sti' ta yolil te cheb ts'ajq'uetique, ta be bael yu'un te ts'unbil nichimaltic yu'un ajwaliletic, ja' la st'unic bael te be baem ta spamlej yu'un Jordán. 5Pero te soldado-caldeoetic la snutsic bael te muc' ajwalil Sedequías, c'o staic ta spamlej yu'un Jericó. Spisil te soldadoetic yu'une ijq'uitayot yu'un, la spuc bael sbaic. 6Te caldeoetic la stsaquic bael te muc' ajwalile, la yiq'uic bael ta stojol muc' ajwalil yu'un Babilonia te ay ta lum Ribla ta sq'uinal Hamat. Te Nabucodonosor tey la yalbey tulan sc'oplal a te bila ya xc'ot ta swenta te Sedequías. 7Ta sit nix la yac' ta milel te snich'nabe. Te Sedequías la yich' loq'uesel sit, la yac' ta chuquel ta cadena yu'un ya yic' bael ta Babilonia.#Ez 12.13.
Laj templo
(2 Cr 36.17-21; Jer 39.8-10; 52.12-30)
8Chaneb u soc juqueb c'aal sjajch'el sbalunlajunebal ja'wil yochel ta muc' ajwalil a te Nabucodonosor, muc' ajwalil yu'un Babilonia, te Nabuzaradán abat yu'un te muc' ajwalil, soc ja' nix comandante swentainej jcanantaywanej yu'un, c'ot ta Jerusalén. 9La yac'bey sc'aal te templo,#1 R 9.8. te sna muc' ajwalil, soc spisil te naetic ta lum, ja' mero tojlinotic te snaic te mach'atic ich'bilic ta muq'ue. 10Te soldado-caldeoetic sjoinej la sjinic te ts'ajc' joybil a te Jerusalén. 11Patil te Nabuzaradán la yic' bael ta chuquel ta Babilonia te mach'atic jilemic ta lume, soc te mach'atic yac'oj sbaic soc muc' ajwalil yu'un Babilonia, soc te jteb xan mach'atic ay bitic ya sna'ic spasele. 12Ja' xanix la yijq'uitay jteb xan te mach'atic mero me'baetic, swenta yu'un ya me x'at'ejic ta ts'usubiltic soc ta lumq'uinaletic.#Dt 4.27-28; 28.36.
13Te caldeoetic la swuyic te biluquetic pasbilic ta bronce ayic ta templo, jich bit'il te balal taq'uin tec'ajtic,#1 R 7.15-22; 2 Cr 3.15-17. te yawil ja'etic, soc te mero muc'ul yawil ja'e.#1 R 7.23-26; 2 Cr 4.2-5. Spisil la yich'ic bael ta Babilonia te bronce. 14Soc la yich'ic bael te tsobol yawil stanul c'ajc', te palaetic, te stup'jibal te smechail c'ajq'ue, te muc'ul cucharaetic, soc spisil te bitic pasbilic ta bronce ya xtuun ta templo.#1 R 7.45; 2 Cr 4.16. 15Soc ja' nix jich te comandante swentainej jcanantaywanejetic yu'un te muc' ajwalil, la yich' bael spisil te bitic ya xtuun ta templo te pasbilic ta oro soc ta plata: ja' te yawil ac'aletic soc te muc'ul tazaetique. 16Te bit'il ay sc'oplal te cheb balal taq'uin tec'ajtique, te muc'ul yawil ja', soc te yantic yawil ja'etic, te la sticun ta pasel yu'un templo te muc' ajwalil Salomón, ma ba ju' yu'unic sliquel te yalale. 17Te jujun te balal taq'uin tec'ajtique, c'axem ta waxaqueb metro stoyolil. Ta toyol ta jujun sni'il ay chajbanbil swenta xch'alil ta bronce, c'axem ta cheb metro stoyolil. Ta sjoyobal yich'oj jalbil bronce ch'albil ta sloc'ombail sit te' te granada sbiile. Ta xchebal te balal taq'uinetique, pajal xchebalic.
Ac'bot yijq'uitay slumalic yajwal Judá
18Te comandante yu'un te jcanantaywanejetic yu'un te muc' ajwalile, la stsac te Seraías te muc' sacerdote, te Sofonías te ja' nix xchebal sacerdote, soc te oxeb jcanan-ti'nailetic yu'un te templo. 19Soc la stsac loq'uel te capitán swentainej spasel ta mandal soldadoetic, soc jo'eb winiquetic te ayic ta abatinel ta stojol te muc' ajwalil te ayic ta lume, te mach'a soldado te swentainej stsobel winiquetic yu'un soldadoil, soc oxwinic (60) yajwal te ich'bilic ta muc' te tey ayic ta lum. 20-21Te Nabuzaradán la yic' bael spisilic ta stojol muc' ajwalil yu'un Babilonia, te ay ta lum Ribla ta sq'uinal Hamat. Tey la yal mandal a te muc' ajwalil yu'un Babilonia te ya yich'ic milele.
Jich loq'uesotic ta slum-sq'uinalic te yajwal Judá.
Te jchajp xan jilique anic bael ta Egipto
(Jer 40.7-10; 41.1-3,16-18)
22Te Nabucodonosor muc' ajwalil yu'un Babilonia la yac' ochel ta jwentainwanej te Gedalías snich'an Ahicam, smam Safán, swenta yu'un ya swentain te mach'atic la yijq'uitay jilel ta sq'uinal Judá. 23C'alal la yaiyic te capitán yu'un soldadoetic ta Judá soc te swinictac, ora bajt'ic ta Mizpa ta sc'oponel te Gedalías, ja'ic te Ismael snich'an Netanías, Johanán snich'an Carea, Seraías snich'an Tanhumet talem ta Netofa, soc Jaazanías snich'an jtul winic ta lum Maaca. Joinbilic bael yu'un swinictaquic. 24Te Gedalías jc'axel albotic yu'un ta spisilic soc te swinictaque te manchuc ya xi'ic te soldado-caldeoetic, te teyuc ya x'ainic ta sq'uinalic, soc te yacuc yac' sbaic ta abatinel yu'un te muc' ajwalil ta Babilonia, jich me lec ya xc'otic a.
25Pero ta sjuquebal u, te Ismael snich'an Netanías, smam Elisama, sts'umbal muc' ajwalil ta Judá, c'ot tey a, sjoinej c'oel lajuntul winiquetic. Ta spisilic la smilic te Gedalías soc te judioetic soc te caldeoetic sjoinej ta Mizpa. 26Ja' yu'un ta spisil te yantic, ta scaj te ja' la xi'ic te caldeoetic, jajch'ic bael, bajt'ic ta Egipto#Jer 43.5-7. ta spisil, muc'-biq'uitetic, soc te capitanetique.
Te Joaquín coltayot ta chuquel soc la yich' c'uxtayel ta Babilonia
(Jer 52.31-34)
27Ta juclajuneb xcha'winic (37) ja'wil, ta juqueb xcha'winic (27) c'aal te slajchayebal u, te ac'bot yijq'uitay Judá a te muc' ajwalil Joaquín, och ta muc' ajwalil ta Babilonia te Evil-merodac. Te yach'il muc' ajwalil la sna'bey yo'bolil sba te Joaquín. La sloq'ues ta chuquel, 28lec yo'tan ta stojol. C'ax jich c'uxtayot Joaquín a te bit'il yantic muc' ajwaliletic sjoinej ta Babilonia. 29Jich ju' yu'un te la sloq'ues te c'u'il swenta chuquel slapoj te Joaquín. La sjoin ta we'el te muc' ajwalil te jayeb xan c'aal cuxine. 30Soc te jayeb xan c'aal cuxul te Joaquín, ac'bot scoltayel jujun c'aal yu'un te muc' ajwalil ta Babilonia.
Currently Selected:
2 Reyes 25: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.