2 Reyes 1
1
Laj Ocozías muc' ajwalil yu'un Israel
1Te c'alal laj te Acab,#1 R 22.34-37. te Moab la stoy sba ta stojol soc la scontroin te Israel. 2Te Ocozías#1 R 22.51-53. ch'ay coel ta ventana ta xcha'cajal sna te ay ta Samaria, mero bayal yejch'en a jil yu'un. Jich la sticun abatetic yu'un ta sjojc'oyel te Baal-zebub, te lotil dios yu'un Ecrón, teme ya to xc'ax yu'une. 3Pero te ch'ul abat yu'un Cajwaltic jich la yalbey te Elías te talem ta Tisbe:
—Baan, taa te abatetic yu'un muc' ajwalil yu'un Samaria. Jojc'obeya teme yu'un ma'yuc Dios ta Israel te ay bi yacalic ta beel ta sjojc'oyel te Baal-zebub te lotil dios yu'un Ecrón. 4Soc albeya yaiyic, te jo'on Ajwalilon ya calbey te Ocozías te ma ba ya xjajch'ix ta swayibe, tey me ya xlajix a —la yut.
Te Elías bajt', jich c'o spas te bit'il albote. 5Te c'alal sujt'ic bael te abatetic, c'otic ta stojol te muc' ajwalil, jich albotic yu'un:
—¿Bi yu'un te sujt'ex tale? —xi' sc'oplalic.
6La sjaq'uic:
—Melel loc' staotic jtul winic. La yal te ya sujt'otic ta stojol te muc' ajwalil la sticunotic baele, soc te jich ya calbeytique: “Te Cajwaltic Dios jich ya yalbat: ‘¿Yu'un bal ma'yuc Dios ta sq'uinal Israel jiche te ay bi ya aticun ta jojc'oyel te Baal-zebub te dios yu'un lum Ecrón? Ta scaj te jich la apase, ma ba ya xjajch'atix ta awayib, tey me ya xlajatix a’, xi' te Diose”, utaic me —xiic.
7Te muc' ajwalil la sjojc'o, jich la yal:
—¿Bi yilel te winic loc' tel ta atojolic, soc te jich la yalbeyexe? —xi'.
8La sjaq'uic:
—Te winique sc'u'inej nujc'ul te ay stsotsil, soc xchucoj xch'ujt' ta nujc'ul#Mt 3.4; Mr 1.6. —xiic.
—Ja' jiche te Elías, te talem ta Tisbe —xi' te muc' ajwalile. 9Ora la sticun jtul capitán-soldado soc yantic lajuneb yoxwinic (50) soldadoetic ta yiq'uel tel. C'alal c'otic, te Elías nacal ta ba wits. Te capitán jich la yalbey:
—Ja'at te j'alwanejat yu'un Dios, te muc' ajwalil la yal mandal te ya xcoat bael —xi'.
10La sjac' te Elías:
—Teme j'alwanejon yu'un te Diose, ac'a couc tel c'ajc' ta ch'ulchan, ac'a slajinat ja'at soc te lajuneb yoxwinic (50) soldadoetic#Lc 9.54. awu'une —xi'.
Ora co tel c'ajc' ta ch'ulchan, lajic ta c'ajq'uel yu'un.
11Te muc' ajwalil la xcha'ticun xan yan capitán soc lajuneb xan yoxwinic (50) soldadoetic. Bajt', jich c'o yalbey te Elías:
—Ja'at te j'alwanejat yu'un Dios, te muc' ajwalil la yal tulan mandal te ya xcoat bael ta ora —la yut.
12La sjac' te Elías:
—Teme j'alwanejon yu'un te Diose, ac'a couc tel c'ajc' ta ch'ulchan, ac'a slajinat ja'at soc te lajuneb yoxwinic (50) soldadoetic awu'une —xi'.
Ora nax co tel c'ajc' ta ch'ulchan, lajic ta c'ajq'uel yu'un.
13Patil te muc' ajwalil la sticun xan swenta yoxebal buelta yan capitán soc lajuneb yoxwinic (50) soldadoetic. Pero te yoxebal capitán mo bael c'alal ta banti ay Elías, la squejan sba ta stojol, jich la yalbey:
—Wocoluc, ja'at te j'alwanejat yu'un Dios, ich'bon ta wenta te jcuxlejal soc te xcuxlejalic te lajuneb yoxwinic (50) abatetic awu'une. 14Melel ta yan buelta, yal coel tel c'ajc' ta ch'ulchan, lajic ta c'ajq'uel yu'un te yan cheb capitanetic soc te swinictaque. Jo'on ya calbat wocol te yacuc ana'bon yo'bolil jbae —xi'.
15Te ch'ul abat yu'un te Cajwaltic la yalbey mandal te Eliase:
—Baan soc, ma x'axi' —xi' sc'oplal.
Jich te Elías co bael, bajt' soc te capitán ta yilel te muc' ajwalile. 16Jich c'o yalbey:
—Jich ya yalbat te Cajwaltic: “Te bit'il la aticun abatetic awu'un te ba sjojc'obeyic Baal-zebub te lotil dios yu'un te lum Ecrón, jich c'ot awu'un te bit'il ma'yuc Dios ta sq'uinal Israel te ya xju' ya ajojc'obeye. Ja' yu'un ma ba ya xjajch'atix ta awayib, ya me xlajatix”, xi' te Cajwaltic —la yut.
17Jich nix c'ot a, te Ocozías laj, jich nix te bit'il albot yu'un Cajwaltic ta swenta Elías. Te bit'il ma'yuc snich'an te Ocozías, ja' och sjelolin ta muc' ajwalil te yijts'ine, ja' te Joram sbiile. Ja' xchebal ja'wil yat'el ta muc' ajwalil ta Judá a te Joram snich'an Josafat.
18Te jayeb xan sc'oplal te Ocozías, soc te bitic la spase, ts'ibubil ta libro yu'un yat'el muc' ajwaliletic yu'un Israel.
Currently Selected:
2 Reyes 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.