2 SAN JUAN 1
1
Makionkox
1Axti yɨriabux naki asaratitɨ tyakuma axɨbama samamekanama uiti Tupax axɨbama ikokoromati Jesús. Ñemanauntu aukuasɨrɨka iñemo, chaxɨpɨñɨantai, namanaiñaintyo axɨbama isuputakaimia axɨna ñemanauntu. 2Aukuasɨrɨka iñemo tyopiki axɨna ñemanauntu ane au nuyausasɨ axɨna sɨsio usaɨbu ɨmo nanaiña naskɨbeka. 3Tari axti Tupax naki Uyaɨ, axtityo Jesucristo, Aɨtoxti naki Uyaɨ, aukurusɨka uimia apukɨruma autaku tari ui nipukɨruxɨma autaku ñemanauntu napakumananaunku.
Bakɨpukux ɨmo makumananaunkux
4Taruku nipukɨnunku tyopiki aboma axɨbama isuñukama abaxɨpekuki isamutema nisɨborikixhimia isiuki axɨna ñemanauntu, takana yakɨpukuxti oemo Tupax naki Uyaɨ. 5Kaɨma xhankikia amopɨnanaki masarukityaiki nauki ukuasɨrɨ oemoantoe. Axɨna xhakonomoka aume axɨna bakɨpukux chaɨboataipɨ, ta tyoneantoe axɨmanu toxio oemo naukiche uikokoroti Cristo. 6Axɨna makumananaunkux tyone axɨna axtɨ uisamute axɨba yakɨpukuxti Tupax oemo, axɨmanu bakɨpukux, tɨtusiu aume aukiapae maɨbo, ta nauki apisamune nausɨboriki aɨbu napakumananaunku.
7Iku axɨna kɨx aboma sɨrɨmanama axɨbama matachemakanama ɨmo makiataka, chikokotapɨma ta axti Cristo kuatati iku kɨx takana nakaxti ñoñɨnx. Axti naki sane nisɨborikixhti tyonenti naki ñatachemakax chuxiampɨ uiti ɨmoti Cristo. 8Amasasai nuxia, tapɨ munatai nanaiña axɨna supachɨkoi autaku, ta nauki ane ñana toxiobo ityobo aume.
9Axti naki xhanxti aiñanti pese ñanunekakaxti Cristo, champɨti Tupax chepeti. Tapɨti naki sɨsioti aɨbu axɨmanu ñanunekakaxti, anati chepeti Yaɨtoti chepetityo Aɨtoxti. 10Axtɨ anati naki sɨrotitɨ asarati año chɨmanunekanatipɨ aume axɨna sane, tapɨ apasukiukati au naupo tapɨ apankikia ɨmoti. 11Tyopiki axtɨ apankikia nuxia ɨmoti apisamutentyo axɨba chomixhampɨ isamutenti.
Tyakɨrux makionkox
12Abiki sɨrɨmana surapoboibo ausukarɨ, ta chixhankapɨ sukanañɨ aume ikuki nikorox. Ixhanka yɨrotɨ tanu yasaraño nauki xhanitya aupu. Sane uixh taruku nipukɨnunku.
13Axɨbama ikokoromati Jesús auna kauta yaka axɨbama samamekanaintyo uiti Tupax, apasusiutyo ñakionkoxɨma tanu aume.
Currently Selected:
2 SAN JUAN 1: CHIQB
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chiquitano © Sociedad Bíblica Boliviana 2002.