Proverbios 1
1
Te bin scuentahil te tsahbil c'opetic
1Te tsahbil c'opetic yu'un Salomón snich'an David, te ajwalil yu'un Israel:
2scuenta snopel p'ijil-o'tanil soc tojobtesel;
scuenta stsahtayel te bintic ay ta halel;
3scuenta yaq'uel lequil tojobtesel
soc stsahtayel jbahtic,
spasel bin toj, tojil chahpanel,
soc pajal ya x'ich'ot ta cuenta;
4scuenta ya'beyel sp'ijil yo'tanic
te mach'atic mayuc bin ya sna'ic,
soc ya'beyel sna'ojibal
soc yu'un ya sna' stsahtayel sbahic te queremetique.
5Ya me ya'iy te mach'a ay sp'ijil yo'tan,
ay bin ya sna' xan yu'un,
soc te mach'a ya sna'be scuentahil
ya me yich' xan sp'ijil
6yu'un sna'beyel scuentahil tsahbil c'opetic
soc sloc'omba c'op,
te c'opetic yu'un p'ijil winic
soc te bin chuhcul ta na'beyel suhtibe.
7Te shahchibal te p'ijil-o'tanil
ha te xi'el te Jehová;
te mach'atic ma sna'ic q'uinal
ya yihlayic te p'ijil-o'tanil soc te nohptesele.
Tsitsel yu'un p'ijil-o'tanil
8Jnich'an, a'iybon awa'iy te nohptesel yu'un te atate,
soc ma me xap'ajbe te tojobtesel yu'un te anane;
9como yutsil sch'ahlel ajol ya xc'oht
soc uhalil ta anuc'.
10Jnich'an, teme ya sc'an ya slo'loyat te jmulawiletic,
ma me xawac' awo'tan a.
11Teme ya yalbat: La', joquinawotic;
ya ca'iytic macliwanej yu'un ya ca'iytic milaw,
ya jmacliytic te mach'a mayuc smul;
12cuxul me ya jbic'ticlantic
hich te bin ut'il te yawil mach'atic chamenic,
ya jbic'ticlantic scohtol
hich te bin ut'il te mach'atic
ya xch'ayic cohel ta xahab.
13Bayel ta chahp c'ulejaliletic ya jtahtic tey a,
ya jnojestic ta pojbil biluquetic te jnatique.
14La', joquinawotic,
junax jbiluctic ta jpisiltic, teme xchihique,
15ma me xat'un bahel, jnich'an;
ma me xbehenat ta behetic yu'unic;
16como ya x'ahnimajic ta stojol bin chopol,
ya suj sbahic ta smalel ch'ich'.
17Tojol ya yich' pasel yaquil
teme yac yilbel spisil te ha'mal mutetique.
18Pero te winiquetic ini
ha'ic nix ya smacliyic sch'ich'elic,
ha'ic nix ya smil sbahic.
19Hich ya xc'ohtic te jbic'tal-o'tanetic,
ha nix ya xlajinotic yu'un.
20Te p'ijil-o'tanil ya x'awon ta callehetic,
ya stoy sc'op ta plazahetic;
21Ya x'awon ta banti bayel mach'atic ya stsob sbahic,
ta ochibaletic yu'un te pueblo
ya yal te bin snopoje:
22Ha'ex te ma xana'ic q'uinal,
¿bin to ora te yac amulanic
te mayuc bin yac ana'ic?
¿Bin to ora ya smulanic labanwanej te jlabanwanejetic
soc te mach'atic mayuc sp'ijil yo'tanic
te ya sp'ajic bin ay ta na'el?
23Suhtanic tal ta stojol te tojobtesel cu'un,
ya me jmal ta atojol te espíritu cu'un,
ya ca'beyex ana'ic te bintic jnopoj.
24Ho'on la jquiq'uex tal,
pero ma ba la ac'an la awa'iyic;
la jach jc'ab
pero mayuc mach'a la yich'bon ta cuenta.
25La ap'ajic spisil bintic ya ca'beyex ana'ic
soc ma la ac'an te tojobtesel cu'une.
26Ha yu'un ya me xtse'ejinon
te c'alal ay awocolic;
ya me jlabanex
te c'alal ya xtal te bin yac axi'ic,
27te c'alal ya xtal xiwel
hich te bin ut'il tulan ic',
soc ya xtal sc'uxul wocol
hich te bin ut'il sutu-ic',
te c'alal ya xtal wocol ta atojolic
soc mel-o'tan.
28Ta hich ora ya sc'opononic,
pero ma ba ya jac'be;
ya me slehonic,
pero ma ba ya stahonic;
29ta scaj te la yihlayic te p'ijil-o'tanil,
soc ma ba la stsahic
te ya yich'ic ta muc' te Jehová;
30ma ba la sc'anic te bin ya ca'be sna'ic
soc la sp'ajic spisil te tojobtesel cu'une,
31hich ya me swe'beyic sit te be yu'unic
soc ya xnojic ta bin chopol snopoj ta yo'tanic.
32Como te mach'atic mayuc bin sna'ojic
ya xmilotic yu'un te mayuc bin sna'ojic;
soc te mach'atic ma sna'ic q'uinal
ya xlajinotic yu'un te scuyoj te lec ayic.
33Pero te mach'a ya ya'iybon jc'op
jun me yo'tan ya xcuxaj stuquel,
mero jun yo'tan,
ma ba ya xi' te bin chopol,
xchi te p'ijil-o'tanile.
Currently Selected:
Proverbios 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.