YouVersion Logo
Search Icon

Abdías 1

1
Ya yich' pehc'anel Edom
1Te snahalsit Abdías. Hich yaloj te Jehová te Ajwalil sc'oblal Edom.
Ca'iybeyejtic te sc'op Jehová,
ticombil jal-c'op ta stojol te nacionetic,
hich ya yal: ¡Hahchucotic!
ya ca'betic guerra te pueblo ini, xchi.
2Tut ya cac'at ta yohlil te nacionetic,
jc'axel p'ajbilat.
3Ha la slo'loyat te stoybahil awo'tan,
ha'at te nahinemat ta jamajtic tontiquil,
te nahinemat ta toyol,
te hich yac awal ta awo'tan:
¿Mach'a ya sjinon cohel ta lum? xchihat.
4Aunque ya xwihlat mohel hich te bin ut'il jxic
soc yac apas apechech ta yohlil te eq'uetic,
tey ya jinat cohel tal a, xchi te Jehová.
5Te ha'uc tal j'eleq'uetic ta atojol,
te ha'uc tal yelc'ambat ta ahc'abal,
(¡mero jimbil c'ohat!)
¿ma bal yacuc yelc'anic
te ban c'alal ya sc'anic?
Te ha'uc talic ta atojol te mach'atic ya stulic ts'usub,
¿ma bal yacuc yihquitayic hilel cha'oxchej?
6¡Jc'axel pojbil te bintic ay yu'un Esaú!
La yich' lehbeyel te sc'ulejal te nac'bile.
7Spisil te mach'atic jun awo'tan soc la slo'loyat;
la yac'at bahel c'alal ta sti'il te q'uinale;
Te mach'atic lamal q'uinal yac awa'iy soc,
la stsalat;
te mach'atic la swe'bat te pan awu'un
la spasbat ayacol ta awe'tal.
¡Mayuc sp'ijil yo'tan te Edom!
8Ta hich ora, xchi te Jehová,
ya cac' ch'ayuc te p'ijil winiquetic yu'un Edom
soc ya jlajin ta witsiltic yu'un Esaú
te mach'atic ay snopojibal yu'unique.
9Te mach'atic awu'un te ay yipic, Temán,
ay me tulan xiwelic,
spisil ants-winiquetic ta witsiltic yu'un Esaú
ya yich'ic lajinel.
10Ta scaj te la awuts'in te awihts'in Jacob,
ya jmucat ta q'uexlal,
soc jc'axel jimbil ya xhilat sbahtel q'uinal.
11Te c'alal ich'otic bahel yu'un jyanlumetic te sc'ulejal,
te c'alal ochic bahel ta ochibaletic yu'un,
soc la spasic seña ta na'el ta stojol Jerusalén,
tey ayat a, pajal la awac' aba soc.
12Ma hichuc la sc'an
te tse'el awo'tan ta scuenta awermano
te bin c'ahc'alil te la yich' pehc'anel;
ma hichuc la sc'an
te tse'el awo'tan ta stojol te snich'nab Judá
te bin c'ahc'alil la yich' jinel;
soc ma hichuc la sc'an te la alaban
te bin c'ahc'alil ay swocole.
13Ma hichuc la sc'an
te ochat ta yochibal te pueblo cu'un
te bin c'ahc'alil la yich' jinel,
ma hichuc la sc'an te tse'el awo'tan yu'un swocol
te bin c'ahc'alil la yich' jinel,
ma hichuc la sc'an te la awich'be te bintic ay yu'un
te bin c'ahc'alil tal te swocole.
14Ha nix hich ma hichuc la sc'an
te la atehc'an aba ta jet-be
yu'un yac amil te mach'atic yaquic ta ahnel;
ma hichuc la sc'an
te la awac' ta c'abal te mach'atic cuxul hilic
ta sc'ahc'alel wocol.
Te sc'ahc'alel yu'un Jehová
15Como nopolix te sc'ahc'alel yu'un Jehová
ta stojol spisil te nacionetique.
Hich te bin ut'il la apas,
hich nix ya spasbotat;
ha nix ya suht ta atojol
te bintic la apase.
16Hich te bin ut'il la awuch'ic ta ch'ul wits cu'un,
hich me ya yuch'ic spisil ora te nacionetique;
ya yuch'ic, bayel ya yuch'ic,
hich ya xc'ohtic te bin ut'il mayuc bin ora cuxajic.
17Pero ta wits Sión
ay mach'atic hilemic te ya xcolique;
ch'ultesbil ya xc'oht,
soc te sna Jacob
ya scha'ich'ic xan te bintic ay yu'un.
18Ha c'ahc' ya xc'oht te sna Jacob,
yat c'ahc' ya xc'oht te sna José,
ha c'ajben te sna Esaú;
ya slajinic ta c'ahc',
mayuc mach'a cuxul ya xhil yu'un te sna Esaú,
como hich yaloj te Jehová.
19Te mach'atic ayic ta Neguev ya me yu'untayic te wits yu'un Esaú, soc te mach'atic ayic ta tsehletic ya me yu'untaybeyic sq'uinal te filisteohetique; soc ya me yu'untaybeyic te sq'uinal Efraín soc te sq'uinal Samaria. Te Benjamín ya me yu'untay Galaad. 20Te tsobol yu'un Israel te bahemic ta chuquel ya me yu'untaybeyic sq'uinal te cananeohetic c'alal ta Sarepta, soc te mach'atic yu'un Jerusalén te bahemic ta chuquel te ayic ta Sefarad ya me yu'untayic te pueblohetic yu'un te Neguev. 21Te jcoltaywanejetic ya xmohic bahel ta wits Sión yu'un ya scuentahinic te wits yu'un Esaú. ¡Yu'un Jehová ya xc'oht te ban c'alal ay ta cuentahinele!

Currently Selected:

Abdías 1: TZH

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy