Levítico 1
1
Scohtol chic'bil smahtan Dios
1Te Jehová la yic' te Moisés, la sjuc ta c'op c'alal ta Nahilpac' Templo yu'un tahojibal, hich la yalbe: 2Halbeya te snich'nab Israel: Teme ay mach'a ya ya'be smahtan te Jehová, ya xhu' ya yac' wacax, tuminchij o tentsun.
3Teme ya yac' wacax scuenta scohtol chic'bil mahtanil, ha me stat te mayuc bin jihnem yu'un; ya me yac' ta yochibal Nahilpac' Templo yu'un tahojibal scuenta yu'un ya x'ich'ot ta cuenta yu'un Jehová. 4Ya scajan sc'ab ta sjol te scohtol chic'bil mahtanil, hich ay ta cuenta ya xc'oht yu'un stojel smul. 5Ya smil te jcolel toro ta stojol Jehová. Te snich'nab Aarón, ha te sacerdotehetic, ya ya'beyic smahtanin Jehová te ch'ich', ya stsihtsimbeyic ta sjoyobal te scajtajib ta chiq'uel mahtanil te ay ta yochibal te Nahilpac' Templo yu'un tahojibal. 6Te winic ya scho'be snuhculel te scohtol chic'bil mahtanil soc ya sjecticlan. 7Te snich'nab te sacerdote Aarón ya ya'beyic c'ahc' ta sba te scajtajib ta chiq'uel mahtanil, ya schahpambeyic si'il te c'ahq'ue. 8Patil te snich'nab Aarón, te sacerdotehetic, ya scajanlanic ta lec te jecticlambil, te sjol soc te sjuhp'el sbiquil, ya yac'ticlanic ta sba si' te ay sc'ahc'al te ay ta sba te scajtajib ta chiq'uel mahtanil. 9Ya yich'ic poquel ta ha' te sbiquil soc te ya', te sacerdote ya schic' spisil ta sba te scajtajib ta chiq'uel mahtanil. Ha scohtol chic'bil mahtanil, ha chic'bil mahtanil te sumet yic' ta stojol Jehová.
10Teme ya yac' tuminchij o tentsun scuenta scohtol chic'bil mahtanil, ya me yac' te stat te mayuc bin jihnem yu'une. 11Ya smil ta stojol norte yu'un te scajtajib ta chiq'uel mahtanil, ta stojol te Jehová. Te snich'nab Aarón, te sacerdotehetic, ya stsihtsimbeyic sch'ich'el ta sjoyobal te scajtajib ta chiq'uel mahtanil. 12Te winic ya sjecticlan; te sacerdote ya yac'ticlan soc sjol, soc sjuhp'el ta sbiquil ta ba si' te ay sc'ahc'al te ay ta scajtajib ta chiq'uel mahtanil. 13Ya yich'ic poquel ta ha' te sbiquil soc te ya'; te sacerdote ya schic' spisil ta sba te scajtajib ta chiq'uel mahtanil; ha scohtol chic'bil mahtanil, ha chic'bil mahtanil te sumet yic' ta stojol Jehová.
14Teme mutetic ya x'a'bot scuenta scohtol chic'bil mahtanil te Jehová, ya me yac' xpuliwoc o jcolel stsuhmut. 15Te sacerdote ya yac' ta scajtajib ta chiq'uel mahtanil, ha ya stuch'be loq'uel sjol, ya schic' ta scajtajib ta chiq'uel mahtanil; ya yich' pits'el cohel te sch'ich'el ta spahc'ul te scajtajib ta chiq'uel mahtanil. 16Ya stutun soc ya sloq'uesbe schuyha', ya sch'oj bahel ta stojol sloq'uib c'ahc'al yu'un te scajtajib ta chiq'uel mahtanil ta lugar te banti ya yich' aq'uel stanul te c'ahq'ue. 17Ya sjepbe ta xic', pero ma ba ya sloq'ues cheb a. Te sacerdote ya schic' ta scajtajib ta chiq'uel mahtanil ta sba te si' yac ta tihlel; ha scohtol chic'bil mahtanil, ha chic'bil mahtanil te sumet yic' ta stojol te Jehová.
Currently Selected:
Levítico 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.