Josué 1
1
Ya schahpan sbahic yu'un ya yu'untayic Canaán
1Te c'alal chamix a te Moisés te a'bat yu'un Jehová, te Jehová la sc'opon te Josué snich'an Nun, ha te mach'a la scoltay ta a'tel te Moisés, hich la yalbe: 2Chamix te ca'bat Moisés, ha yu'un hahchan, sohlan bahel ta muc'ul-ha' Jordán, ha'at soc spisil te pueblo ini, tey ta q'uinal te ya ca'be te snich'nab Israel. 3La jca'beyex spisil te lugartic banti ya xc'oht awoquic, hich te bin ut'il la jcalbe te Moisés. 4Awu'unic ya xc'oht te q'uinal c'alal ta jochol taquin q'uinal c'alal ta Líbano ha to ta muc'ul-ha' Éufrates, spisil te sq'uinal heteohetic c'alal ta Muc'ul Mar#1.4 Ha te Mar Mediterráneo. ta stojol banti ya xmahl c'ahc'al. 5Mayuc mach'a ya xhu' ya stsalat te jayeb c'ahc'al cuxulat. Hich te bin ut'il la joquin te Moisés, ha nix hich ya joquinat; ma ba ya quihquitayat soc ma ba ya jpihtesat. 6Ac'a me fuersa soc ayuc me yip awo'tan, yu'un ha'at yac awa'be yich'ic te q'uinal te pueblo ini te la jcalbe ta jamal te sme'static te ya ca'beye. 7Ha nax ac'a me fuersa soc ayuc me yip awo'tan, tsahtaya me ta spasel spisil te mandariletic te la yalbat te ca'bat Moisés; ma me xloc'at bahel ta wa'el o ta q'uexam, scuenta yu'un lec ya xc'oht ta pasel awu'un spisil bintic yac apas. 8Ma me ayuc bin ora ya xhil awu'un yalel bin ya yal ha'i hun ini yu'un te Ley, ya me ana'ulan ta c'ahc'al ahc'abal, scuenta yu'un yac apas spisil te bintic ts'ihbabil tey a; hich lec ya xc'ohat bayuc ya xbehenat soc lec ya xc'oht spisil bintic yac apas. 9Ilawil, ya jpasat ta mandar te ac'a me fuersa soc ayuc me yip awo'tan; ma me xiwat soc ma me xpehc'aj awo'tan, como te Jehová te Dios awu'un ya me sjoquinat bayuc ya xbahat, xchi.
10Ha yu'un te Josué hich la spas ta mandar te jtsobawetic yu'un te pueblo: 11C'axanic bahel ta yohlil te campamento, hich xawalbeyic te pueblo: Pasa awe'elic, como li' ta oxeb c'ahc'al ya me sohlex bahel ta Jordán yu'un ya x'ochex ta yich'el te q'uinal ya ya'beyex ta acuentahic te Jehová te Dios awu'unic, xchi.
12Soc te Josué hich la yalbe te sts'umbal Rubén, Gad soc te j'ohlil sts'umbal Manasés: 13Na'ahic me te bin la spasex ta mandar te Moisés te a'bat yu'un Jehová, te hich la yal: Te Jehová te Dios awu'unic la ya'beyex acux awo'tanic soc la ya'beyex te q'uinal ini. 14Te awihnamic, anich'nabic soc awacaxic ya xhilic ta q'uinal la ya'beyex te Moisés li' ta jehch Jordán; yan te ha'exe, apisilic te ay yip awo'tanic soc te ay awipic, awich'oj awa'tejibic yu'un guerra a ya me xnahilijex bahel yu'un te awermanotac soc ya me acoltayic, 15ha to c'alal ya x'a'bot scux yo'tanic yu'un Jehová hich te bin ut'il ha'ex, soc te hich nix ya yu'untayic te q'uinal ya x'a'botic yu'un Jehová te Dios awu'unique. Patil ya suhtex bahel te q'uinal te a'botex awich'ic, te la ya'beyex Moisés te a'bat yu'un Jehová li' ta jehch Jordán ta stojol banti ya xloc' tal c'ahc'al, xchi.
16La sjac'beyic sc'op te Josué, hich la yalic: Ya jpascotic spisil bintic la apasotcotiquix ta mandar soc ya xbohotcotic ta bayuc yac aticonotcotic bahel. 17Ya jch'uhumbatcotic ac'op hich te bin ut'il la jch'uhumbecotic sc'op te Moisés; ha nax ac'a sjoquinat te Jehová te Dios awu'un hich te bin ut'il la sjoquin Moisés. 18Mach'ayuc a ya stoy sba ta sc'axuntayel te mandar awu'un, te ma ba ya sch'uhun spasel spisil bintic yac awal, ac'a lajuc. Ha nax ac'a fuersa soc ayuc me yip awo'tan, xchihic.
Currently Selected:
Josué 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.