Job 1
1
Swocol Job
1Ta sq'uinal Uz ay jtuhl winic Job sbihil, lec soc toj yo'tan ta winiquil, yich'oj ta muc' te Dios soc mayuc bin chopol ya spas. 2Ayin huqueb squerem-nich'nab soc oxeb yantsil-nich'nab. 3Ay lajunwinic swaxaclajunbahc' (7,000) tuminchijetic, lajunwinic swaxacbahc' (3,000) camellohetic, ho'winic scha'bahc' (500) ta chahp j'a'tel-wacaxetic, ho'winic scha'bahc' (500) me' burrahetic soc bayel a'batetic yu'un. Ha te winic te c'ax hich muc' sc'oblal a te bin ut'il spisil te yantic ayic ta stojol banti ya xloc' tal c'ahc'al.
4Te snich'nab ya spasic q'uinetic ta snahic, jujutuhl ta sc'ahc'alel; ya sticonic ta iq'uel te oxeb yantsilelic yu'un ya sjoquinic ta we'el uch'el. 5Ta jujun buelta te ya xlaj te q'uin yu'unic, te Job ya sticon ta iq'uel soc ya slecubtesbe sc'oblalic. Ya xhahch ta sab, ya yac' scohtol chic'bil mahtaniletic ta scuenta jaytuhlic, yu'un hich ya yal te Job: Ay wan la sta smulic te jnich'nab soc ay wan la slabanic Dios ta yo'tanic, xchi. Hich la spasulan ta spisil ora.
6Ay jun c'ahc'al te tal stehc'an sbahic ta stojol Jehová te yal-snich'nab Dios,#1.6 yal-snich'nab Dios, o: ch'ul a'batetic soc ha nix hich tal tey a te Satanás. 7Hich joc'obot yu'un Jehová te Satanás: ¿Banti talat? xchi sc'oblal.
Te Satanás la sjac'be te Jehová: Ayon ta behel ta yocliyel swohlol te bahlumilale, xchi.
8¿La bal awil te ca'bat Job te mayuc mach'a yan hich pajal soc ta bahlumilal te lec soc toj ta winiquil, te yich'oj ta muc' te Dios soc mayuc bin chopol ya spas? xchi te Jehová.
9Te Satanás la sjac'be sc'op te Jehová: ¿Yu'un bal tojol yich'oj ta muc' Dios te Job? 10¿Ma bal ajoytayej soc te mach'atic ay yu'un soc te bintic ay yu'une? Awa'beyej bendición spisil te ya'tel, ha yu'un te bayel p'ohlem te bintic ay yu'un ta q'uinal. 11Pero te yacuc ahach ac'ab yo'tic ta spojbeyel spisil te bintic ay yu'une, ya me awil teme ma ba ya sbohlc'optayat ta atojol, xchi.
12Te Jehová la yalbe te Satanás: Ilawil, ay ta ac'ab spisil te bintic ay yu'un; ha nax ma me xawac' bahel ac'ab ta stojol stuquel, xchi.
Hich loc' bahel te Satanás ta stojol Jehová.
13Ay jun c'ahc'al c'alal yacalic ta we'el soc ta yuch'el vino ta sna smuc'ul banquilic a te squerem-nich'nab soc yantsil-nich'nab Job, 14tal jtuhl winic ta stojol Job, hich c'oht ta halbeyel yu'un: Te c'alal yacalic ta a'tel ta arado a te j'a'tel-wacaxetic soc yacalic ta we'el ta nopol a te me' burrahetic, 15ochintayotic yu'un te sabeohetic, la yelc'anic bahel te chambahlametic soc la smilic hilel ta espada te a'batetic; ho'on xanix colon hilel te tal calbat awa'iy, xchi.
16Yac to ta c'op a, tal yan te hich c'oht yal: Co tal c'ahc' yu'un Dios ta ch'ulchan te la schic' te tuminchijetic soc te jcananetic yu'unic; ho'on xanix colon hilel te tal calbat awa'iy, xchi.
17Yac to ta c'op a, tal yan te hich c'oht yal: Te caldeohetic oxchahp la yac' sbahic, la yochintayic soc la yelc'anic bahel te camellohetic, soc la smilic ta espada te a'batetic; ho'on xanix colon hilel te tal calbat awa'iy, xchi.
18Yac ta c'op a tal yan te hich c'oht yal: Te aquerem-nich'nab soc te awantsil-nich'nab yacalic ta we'el soc yuch'el vino ta sna te smuc'ul banquilalic, 19tal tulan ic' ta stojol jochol taquin q'uinal te la smaj schanxuhcul te na, yahl cohel ta sbahic, hich chamic. Ho'on xanix colon hilel te tal calbat awa'iy, xchi.
20Ha yu'un te Job la stehc'an sba, la sch'i' snahtil-c'u', la sjoch stsotsel sjol yu'un, la squejan sba ta lum, la sch'uhuntay, 21hich la yal:
Watalon a la yayinteson jnan,
watalon a ya suhton bahel.
Jehová la yac', Jehová la sloq'ues.
¡Bayeluc me yutsil sbihil te Jehová! xchi.
22Ta spisil ini ma ba la sta smul te Job soc ma ba la ya'be smulin te Diose.
Currently Selected:
Job 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.