Jeremías 1
1
Te iq'uel soc ticonel yu'un Jeremías
1Ha sc'op Jeremías snich'an Hilcías, jtuhl sacerdote yu'un te sacerdotehetic ta Anatot te ay ta sq'uinal Benjamín. 2Ha te sc'op Jehová te tal ta stojol Jeremías ta yoxlajunebal (13) ha'bil ay ta ajwalil yu'un Judá a te Josías snich'an Amón. 3Ha nix hich tal ta yorahil te ay ta ajwalil yu'un Judá te Joacim snich'an Josías, ha to c'alal ta slajibal te sbuluchebal (11) ha'bil ay ta ajwalil Sedequías snich'an Josías, te c'alal ic'otic bahel ta chuquel te swinquilel Jerusalén, ta yo'ebal u.
4Tal ta jtojol te sc'op Jehová, hich la yal:
5Te c'alal ma to pasbilat cu'un ta sch'uht a te anan,
la jna'bat aba;
te c'alal ma to x'ayinat a, parte la jcac'at;
la jca'bat awa'tel ta jalwanej
ta stojol te nacionetique, xchi.
6Hich la jcal:
¡Ay, Cajwal Jehová! Ma jna' c'op,
como queremon to, xchihon.
7Pero la yalbon te Jehová:
Ma me xawal te queremat to;
yu'un ya me xbahat ta stojol
spisil mach'atic ya jticonat bahel,
soc ya me awal
spisil te bin ya calbat ta mandar.
8Ma me xiwat ta stojolic,
como joquinejat yu'un ya jcoltayat,
xchi te Jehová.
9Hich te Jehová la yac' tal sc'ab, la spicbon que soc hich la yalbon: La jca'bat te jc'op ta awe.
10Ilawil, yo'tic ya ca'bat awa'tel
ta stojol nacionetic
soc ta banti ya xcuentahinwan ajwaliletic,
yu'un yac abul loq'uel soc yac ajin cohel,
yu'un yac alajin soc yac atuhquiy,
yu'un yac apas soc yac ats'un, xchi.
11Tal sc'op Jehová ta jtojol, hich la yal: Jeremías, ¿bin yac awil? xchi.
Ya quil sc'ab almendro, xchihon.
12La yalbon te Jehová: Lec la awil, yu'un ya me quil te ya xc'oht ta pasel te jc'ope, xchi.
13Tal sc'op Jehová ta jtojol ta schebal buelta, hich la yal: ¿Bin yac awil? xchi.
Ya quil oxom te yac ta buhl, ya c'an maluquix tal yilel c'alal ta stojol norte, xchihon.
14La yalbon te Jehová:
C'alal ta stojol norte ya xmal tal te bin chopol
ta stojol spisil mach'atic nahinemic ta q'uinal ini.
15Yac quic'bel tal spisil ta chahp ants-winiquetic
te ban c'alal ya xcuentahinwan ajwaliletic
ta stojol norte, xchi te Jehová.
Ya me xtalic te ajwaliletic yu'unic,
ya me schahpan shuctajibic
ta yochibal te Jerusalén
ta stojol spisil sts'ahcul te ay ta sjoyobal
soc ta scontrahinel
spisil te pueblohetic yu'un Judá.
16Ya cal te castigo ya xc'oht ta stojolic
ta scaj spisil schopolilic
yu'un te la yihquitayon ta yo'tanic,
la schic'beyic pom yantic diosetic
soc la sch'uhuntayic te bintic la spas ta sc'abic.
17Te ha'ate, chahpana aba,
tehc'ana aba soc halbeya
spisil te bintic ya calbat ta mandar.
Ma me xiwat ta stojolic,
yu'un teme yac axi'e,
ya jxiwtesat ta stojolic.
18Yo'tic hich ya cac'at
te bin ut'il pueblo te ay sts'ahcul,
hich te bin ut'il oy-taq'uin
soc ts'ahc pasbil ta bronce,
yu'un scontrahinel spisil te q'uinal ini,
te ajwaliletic yu'un Judá, te príncipaletic,
sacerdotehetic soc spisil te swinquilel te q'uinale.
19Ya me ya'bat guerra,
pero ma ba ya stsalat,
como ya joquinat
yu'un ya cac'at ta libre, xchi te Jehová.
Currently Selected:
Jeremías 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.