Oseas 1
1
Yihnam Oseas soc snich'nab
1Ha sc'op Jehová te tal ta stojol Oseas snich'an Beeri, ta yorahil Uzías, Jotam, Acaz soc Ezequías, ajwaliletic yu'un Judá, soc ta yorahil Jeroboam snich'an Joás, ajwalil yu'un Israel.
2Ha te shahchibal te sc'op Jehová te la yal ta scuenta Oseas. Hich la yalbe te Oseas:
Bahan, ic'a jtuhl j'antsinel ants
soc ac'a awal-anich'nab soc
te ayic ta scuenta mulil,
como yac ta antsinel te pueblo
te la yihquitay hilel te Jehová, xchi.
3Ha yu'un te Oseas la yic' yihnamin te Gomer yantsil-nich'an Diblaim, hahch yal, ayin jtuhl squerem-al. 4Te Oseas hich halbot yu'un te Jehová:
A'beya sbihilin Jezreel te alale,
como nopol ya ca'be castigo
te mach'atic ay yu'un Jehú
ta scaj te ch'ich' la yich' malel ta Jezreel,
soc ya jlajin te nación Israel.
5Ta hich sc'ahc'alel ya jwac'be
te t'ihmalte' yu'un Israel
ta spamlej yu'un Jezreel, xchi.
6Te Gomer cha'hahch xan yal, la yalatay jtuhl ach'ix. Te Jehová la yalbe te Oseas:
A'beya sbihilin Lo-ruhama#1.6 Lo-ruhama: ma ba na'bil yo'bolil sba, xchi.
como ma ba ya jna'beyix xan yo'bolil sba te sna Israel,
ma ba ya jpasbeyix perdón.
7Pero ya jna'be yo'bolil sba te sna Judá: ya jcoltay ta scuenta Jehová te Dios yu'une, ma ha'uc ta scuenta t'ihmalte', o espada, guerra, cawuhetic, o mach'atic cajajtic tey a, xchi.
8C'alal hil schu' te Lo-ruhama, hahch yan yal te Gomer, la yalatay jtuhl querem. 9Te Jehová la yal:
A'beya sbihilin Lo-ami,#1.9 Lo-ami: ma ha'uc pueblo cu'un, xchi.
como te ha'exe ma ha'uquex pueblo cu'un,
soc ma ho'uconix Dioson awu'unic.
10Aunque hich ay, te israeletic hich ya xc'ohtic
te bin ut'il shi'al mar,
te ma xhu' ta p'isel o ta ahtayel.
Ta banti hich ya xhalbotic:
Ma puelohuquex cu'un, te xchihe,
hich ya xhalbotic:
Yal-snich'anex te cuxul Dios, xchi sc'oblalic.
11Ya me stsob sbahic te snich'nab Judá soc Israel,
soc ya me slehic jtuhl jtsobaw yu'unic;
soc ya me xhahchic ta q'uinal,
como muc' ya xc'oht sc'ahc'alel te Jezreel.
Currently Selected:
Oseas 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.