Hebreos 1
1
Dios c'opojix ta scuenta Snich'an
1Te Dios bayel buelta soc bayel bin ut'il la sc'opon te antiguo jme'jtatic ta namey ta scuenta te jalwanejetic; 2pero ta ora yo'tic te slajibal c'ahc'al ayotic, ha la sc'oponotiquix ta scuenta te Snich'an, ha te la ya'be yu'untay spisil bintic ay, soc ha nix ta scuenta te la spas spisil bintic ay. 3Ha sts'anabul yutsilal te Diose, ha mero slop'tayej sba a, soc spisil bintic ay ipajem ta scuenta yu'el te sc'ope. Te c'alal hu' yu'un stup'belotic stuquel te jmultic, la shuhcan sba ta swa'el-c'ab te Mach'a c'ax bayel yutsilal ta toyol, 4soc hich toyol xan c'oht yu'un te ch'ul a'batetic te bin ut'il c'ax toyol xan ay te sbihil a'bot yich' te bin ut'il yich'oj te ch'ul a'batetique.
Te Nich'anil ha toyol yu'un ch'ul a'batetic
5Como ¿mach'a ch'ul a'batil te hich halbot yu'un te Diose:
Ha'at Jnich'anat,
nax to nax ayinat cu'un, te xchi sc'oblale?
Soc la yal xan:
Ho'on staton ya xc'ohon,
soc ha jnich'an ya xc'oht, xchi.
6Soc te c'alal Dios la sticon tal ta bahlumilal te Ba-nich'anil, hich la yal:
Spisil te ch'ul a'batetic yu'un Dios
ac'a sch'uhuntayic, xchi.
7Soc hich la yalbe sc'oblal te ch'ul a'batetic:
Ya yac' te pajal soc ic' ya xc'oht
te ch'ul a'batetic yu'un,
pajal soc yat c'ahc' ya xc'oht
te a'batetic yu'une, xchi.
8Pero hich ya yalbe sc'oblal te Nich'anil:
Dios, te muc'ul-huctajibal awu'un
sbahtel q'uinal ay.
Te bastón yu'un te cuentahinel awu'un,
ha bastón yu'un bintic toj ta pasel.
9C'ux ta awo'tan te bin stojil ta pasel
soc yac awihlay te bin chopole.
Ha yu'un Dios, te Dios awu'un,
la smalat ta aceite yu'un tse'el-o'tanil, xchi.
10Soc la yal xan:
Ha'at, Cajwal, ta shahchibal
la awa'be yich'o-ip te bahlumilal,
soc ha ya'tel ac'ab te ch'ulchane.
11Ya xlajic, yan te ha'ate, atalel ayat;
spisil hich ya xpoco'ubic
te bin ut'il muc'ul-c'u'ul;
12yac apac hich te bin ut'il c'u'ul;
yac ajeltay hich te bin ut'il mach'a ya sjeltay sc'u'-spac'.
Yan te ha'ate atalel ayat atuquel,
mayuc slajibal te awa'bilal, xchi sc'oblal.
13¿Mach'a ch'ul a'batil te hich halbot yu'un Dios:
Huclan ta jwa'el-c'ab
ha to c'alal ya cac' ta scajtajib awoc
te acontra, te xchi sc'oblale?
14¿Ma bal meleluc te spisil te ch'ul a'batetic ha espírituhetic te ayic ta a'batinel, te ticombilic ta scoltayel te mach'atic ya yich'ic te colele?
Currently Selected:
Hebreos 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.