Génesis 32
32
Jacob la schahpan sba yu'un ya sta sba soc Esaú
1Te Jacob hahch xan ta behel, tal ta tahel bahel yu'un ch'ul a'batetic yu'un Dios. 2Hich la yal te Jacob c'alal la yil: Ha campamento yu'un Dios ini, xchi yu'un, la ya'be sbihilin Mahanaim#32.2 Mahanaim: cha'tsohb soldadohetic, o: campamento, xchi. te lugar.
3Te Jacob nahil la sticon bahel jal c'opetic ta stojol te sbanquil Esaú ta sq'uinal te Seir, ta sq'uinal Edom. 4Hich la yalbe bahel: Hich xawalbe te cajwal Esaú: Hich ya yal te awa'bat Jacob: La joquin ta nahinel te Labán, tey halajon a ha to suhton tal ta ora ini. 5Ayix wacaxetic, burrohetic, tuminchijetic soc a'bat ants-winiquetic cu'un. La jticon tal te c'op ini ta stojol te cajwal scuenta yu'un ayuc yutsil awo'tan ta jtojol, xchihex me.
6Te jal c'opetic suhtic tal ta stojol Jacob, hich hul yalbeyic: Suhtotcotiquix tal ta stojol te abanquil Esaú, ha nix ya xtal stahat ta be, soc joquimbil yu'un jbahc' (400) ta tuhl winiquetic, xchihic hulel.
7Bayel hahch ta xiwel te Jacob soc bayel la smel yo'tan yu'un. Hich la yac' ta cha'tsohb te mach'atic sjoquinej, soc te tuminchijetic, wacaxetic soc te camellohetic, 8como hich la yal: Te Esaú teme ya xtal scontrahin te jtsohb, ya xcol te jtsohb xane.
9Patil hich la yal te Jacob: Diosat yu'un te jtat Abraham, soc Diosat yu'un te jtat Isaac, Jehová, ha'at te la awalbon: Suhtan bahel ta alumal soc ta stojol awermanotac, lec ya xc'ohat cu'un, te xchihate, 10¡peq'uel ayon ya ca'iy yu'un spisil te c'uxultayel awu'un soc te stalel jun awo'tan ta stojol te a'bat awu'une! Ha nax quich'oj jnahbate' te c'alal c'axon bahel ta muc'ul-ha' Jordán, yo'tic cha'tsohb loq'uemonix a. 11Coltayawon loq'uel ta sc'ab te jbanquil Esaú, yu'un ya jxi' te ya xtal smilon soc te alaletic soc te snanique. 12Hich awaloj: Ya cac' te lec ya xc'ohat, soc hich yipal ya xc'oht ats'umbal cu'un te bin ut'il shi'al mar te ma xhu' ta ahtayel, xchi ta sc'oponel Dios.
13Tey way ta ahc'abal a, soc ta yohlil te bintic ay yu'un la stsabe smahtan te Esaú te sbanquil: 14ha lajunwinic (200) ta coht yantsilel tentsunetic, jtahb (20) ta coht stat tentsunetic, lajunwinic (200) ta coht yantsilel tuminchijetic, jtahb (20) ta coht stat tuminchijetic, 15lajuneb scha'winic (30) ta coht sme' camellohetic te yahtalal yalatac, cha'winic (40) ta coht wacaxetic, lajuncoht (10) torohetic, jtahb (20) ta coht yantsilel burrohetic, soc lajuncoht (10) stat burrohetic. 16La yac'ticlambe ta sc'ab te a'batetic yu'un, parte la yac' ta jujutsohb, soc hich la yalbe te a'batetic yu'un: Nahilijanic bahel, namts'ac me xawil abahic bahel jujutsohb, xchi.
17Soc hich la yalbe te mach'a ya xnahilij bahel: Te c'alal yac ata ta be te jbanquil Esaú, teme ya sjoc'obat: ¿Mach'a yu'unat? ¿Banti ya xbahat? soc ¿mach'a yu'un te bin amacoj ta behel? teme xchihe, 18hich me xawalbe: Ha mahtanil te ticombil tal yu'un te awa'bat Jacob ta stojol te cajwal Esaú; soc yac ta talel ta jpatcotic, xchihat me, xchi te Jacob.
19Soc ha nix hich la spas bahel ta mandar te scha'tsohb, te yoxtsohb, soc spisil mach'atic te patil ya xbahtic yu'un te tsohbotsohb, hich la yalbe: Ha nix hich xawalbeyic te Esaú te c'alal ya xc'oht atahic. 20Soc ya me awalbeyic: Yac ta talel ta jpatcotic te awa'bat Jacob, xchihex me, xchi. Yu'un la snop ta yo'tan: Ya jlecubtesbe yo'tan ta scuenta te mahtanil te ya xnahilij bahel cu'un, patil ya quilbe sit yelaw; ya wan yic'on ta stojol a, xchi. 21Hich te mahtanil nahilij bahel yu'un, yan te Jacob tey way ta campamento ta ahc'abal.
Jacob la stsac sba soc ch'ul a'bat ta Peniel
22Ta ahc'abal hahch te Jacob, la yic' tal schebal te yihnam, schebal te scriada soc te buluchtuhl (11) snich'nab, sohlic bahel ta uc'um Jaboc te banti ya xhu' c'axele. 23La sticon sohlel ta uc'um soc spisil bintic ay yu'un. 24Stuquel xanix hil te Jacob. Ay jtuhl winic te la stsac sba soc yalel c'alal sacub tal q'uinal. 25C'alal la yil te winic te ma ba hu' yu'un ya stsal te Jacob, la smajbe scub, hich pitc'uj te sts'acawul scub te Jacob te c'alal yac stsacbel sba soc a te winique. 26Hich la yal te winique: Coltayawon bahel, yu'un yaquix ta sacubel tal te q'uinale, xchi.
La sjac' te Jacob: Ma ba ya jcoltayat bahel teme ma ba yac awa'bon bendición, xchi.
27¿Bin abihil? xchi te winique.
Jacob, xchi.
28La yal te winic: Ma ba Jacob ya xhil abihil, Israel#32.28 Israel: ya stsac sba soc Dios, xchi. ya xc'ohtix, yu'un la atsac aba soc Dios soc winiquetic, la awa'iy tsalaw, xchi.
29Halbon ca'iy te abihil, xchi te Jacob.
¿Bin yu'un yac ajoc'obon jbihil? xchi te winique. Tey la ya'be bendición a.
30Te Jacob la ya'be sbihilin Peniel#32.30 Peniel: yelaw Dios, xchi. te lugar, como la yal: La jquilbe sit yelaw te Diose, pero cuxul hilon, xchi.
31Yac ta c'axel bahel ta Peniel a loc' tal te c'ahc'al, xcoxquinaj behen bahel yu'un te scube. 32Ha scuentahil te snich'nab Israel ma ba ya sti'ic te sts'acawul te cub c'alal ora, yu'un la yich' majel te sts'acawul scub te Jacob.
Currently Selected:
Génesis 32: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.