Génesis 27
27
Jacob a'bot te bendición yu'un Isaac
1Te c'alal mamalix a te Isaac soc te ma xyilix q'uinal yu'un bohlobenix te site, la sticon ta iq'uel te Esaú te sba-nich'an, hich la yalbe: Jnich'an, xchi.
Li' ayoni, xchi te Esaú.
2Mamalonix, xchi te Isaac, ma jna' bin ora ya xchamon. 3Ha yu'un ich'a bahel te awa'tejib, ha te at'ihmalte' soc te yawil ya'tejibal, bahan ta ha'maltic, tsacbon tal ti'bal. 4Pasbon jwe'el hich te bin ut'il ya jmulan swe'el, ich'bon tal jwe', scuenta yu'un ya ca'bat hilel bendición te ma to xchamon, xchi.
5Yac ta ya'iyel te Rebeca te bin yac ta yalbeyel Esaú te Isaac. Hich baht ta ha'maltic te Esaú ta snutsel te bin ya stsacbe tale. 6Te Rebeca hich la yalbe te Jacob: La jca'iy bin la yalbe te abanquil Esaú te atate, te hich la yal: 7Tsacbon tal ti'bal soc pasbon buen buhts'an we'elil yu'un ya jwe' soc ya ca'bat bendición ta stojol Jehová te ma to xchamon, xchi. 8Ha yu'un ta ora ini, cal, ch'uhumbon te bin ya calbat. 9Bahan ta banti ay te chambahlametic, tsacbon tal cha'coht lequil tut tentsunetic, ya jpasbe buhts'an ti'bal a te atat, hich te bin ut'il ya smulan. 10Ya me apahchambe swe' te atat scuenta yu'un ya ya'bat bendición te c'alal ma to xcham a, xchi.
11Pero te Jacob la yalbe te Rebeca te snan: Te jbanquil Esaú bayel stsotsel ta scohtol, yan te ho'one mayuc jtsotsel. 12Ya wan spicon ya'iy te jtate, jlabanwanejon ya xc'ohon yu'un, hich chopol jc'oblal ya xc'oht, ma ha'uc ya quich' te bendición, xchi.
13Hich la sjac' te snan: Cal, ho'on ac'a c'ohtuc ta jcuenta te chopol c'oblalil. Te ha'ate ch'uhuna te jc'ope, bahan ic'bon tal te bin la jcalbat, xchi.
14Hich baht te Jacob, la stsac tal tentsunetic, la ya'be te snane. Hich te snan la spasbe ti'bal te mulambil yu'un te state. 15Soc te Rebeca la yich'be tal te lequil sc'u' spac' te Esaú te sba-al te sq'uejojbe ta sna, la ya'be slap te Jacob te ihts'inale. 16Soc la slap'be ta sc'ab soc ta snuc' te snuhculel tut tentsunetic, 17la ya'be bahel te Jacob te buhts'an ti'bal soc pan te la schahpan.
18Hich baht te Jacob ta stojol te stat, hich c'oht yalbe: Talon, jtat, xchi.
La' me. ¿Mach'ahat a, jnich'an? xchi te Isaac.
19Ho'on te Esaú te aba-nich'anon. La jpasix tal te bin la awalbon. Hahchan, huhcana aba, ti'an te ti'bal la jtsacbat talel, scuenta yu'un yac awa'bon a te bendición, xchi.
20Pero te Isaac la sjoc'obe te snich'an: ¿Bin ut'il ay a te la ata ta ora te ti'bale, jnich'an? xchi.
Te Jehová te Dios awu'un, la scoltayon ta slehel, xchi te Jacob.
21Te Isaac la yalbe te Jacob: Nohpojan tal ta jts'ehl, ya jpicat ca'iy teme melel te ha'at jnich'anat Esaú, xchi.
22Te Jacob nohpoj tal ta sts'ehl te Isaac te stat, la spic ya'iy, hich la yal: Ha sc'op ya ca'iy te Jacob, pero ha nix sc'ab ya ca'iy te Esaú, xchi. 23Hich ma ba la sna'be sba mach'a a, yu'un bayel stsotsel sc'ab hich te bin ut'il sc'ab te Esaú. Hich la ya'be bendición. 24Te Isaac la scha'joc'obe: ¿Melel bal te ha'at jnich'anat Esaú? xchi.
Ho'on, xchi te Jacob.
25Ha yu'un hich la yalbe: Ich'bon tal te ti'bal, ya jti' te bin la stsac tal te jnich'an, scuenta yu'un ya ca'bat bendición, xchi. Hich te Jacob la yich'be tal, te Isaac la sti' te ti'bal; soc la yich'be tal yuch' vino. 26Te Isaac te stat, hich la yalbe: La' me, jnich'an, uhts'uyawon, xchi.
27Hich nohpoj tal te Jacob, la yuhts'uy te state. Te Isaac la ya'iybe yic' te sc'u' spac', la ya'be bendición, hich la yal:
A'iya awa'iy, ha yic' te jnich'ane,
hich yic' te bin ut'il ha'maltic
te a'bibil bendición yu'un Jehová.
28Dios ac'a ya'bat tal ts'ujul ta ch'ulchan,
soc ac'a ya'bat te sit ya yac' te lumq'uinal,
soc bayel trigo soc vino.
29Ac'a yac' sbahic ta a'batinel awu'un tsobol ants-winiquetic,
soc ac'a snijan sbahic ta atojol te nacionetique.
Ac'a yajwalinat awermanotac,
ac'a snijan sbahic ta atojol te yalatac te anane.
Bohlubuc me sc'oblal te mach'a ya sbohlobtesbat ac'oblal,
soc lecuc me sc'oblal te mach'a ya ya'bat bendición, xchi.
30Lajel to yo'tan te Isaac ta ya'beyel bendición a te Jacob, loq'uel to bahel a te Jacob ta stojol te stat, hul tal ta nutsojel te Esaú te sbanquile. 31Ha nix hich la spas buhts'an ti'bal, la yich' tal ta stojol te stat, hich la yalbe: Hahchan, jtat, ti'a te ti'bal la stsac tal te anich'an, scuenta yu'un yac awa'bon bendición, xchi.
32Halbot yu'un te Isaac ha te stat: ¿Mach'ayat a? xchi.
Ho'on Esaú te aba-nich'anon, xchi.
33Te Isaac bayel nihc yu'un, hich la yalbe: ¿Mach'a a hiche te xtaluquix, te la yich' tal te nutsbil ti'bal, la ya'bon soc la jti' spisil te c'alal ma to xtalat a? La jca'beyix bendición, ya me xc'oht ta stojol te bendición, xchi.
34C'alal la ya'iybe te sc'op stat te Esaú tulan awon scuenta muc'ul c'uxul mel-o'tan, hich la yal: A'bon bendición ec, jtat, xchi.
35La yal te stat: Pero xtaluc slo'loyonix awihts'in, ha la yich'batix te abendición, xchi.
36La yal te Esaú: Ha nix yu'un Jacob sbihil a. Schebalix buelta slo'loybelon a.#27.36 Ilawil nota ta 25.26. Nahil la spojbon te jba-alalil, yo'tic la spojbonix te bendición te sc'oblal ya quich', xchi. Soc la yal: ¿Ma bal ayuc bendición q'uejbil awu'un te yac awa'bon? xchi.
37Te Isaac la yalbe te Esaú: La jcaq'uix te ha awajwal ya xc'oht, soc la jcaq'uix ya'batin spisil yermanotac; la jca'beyix trigo soc vino; ¿bin xan ya ca'bat ha'at, jnich'an? xchi.
38Te Esaú la sjac'be sc'op te stat: ¿Ha nax bal jun bendición ay te yac awac', jtat? A'bon bendición ec, jtat, xchi. Tulan awon ta oq'uel te Esaú.
39Ha yu'un la yal te Isaac:
Namal ya xhil awu'un te yaxal q'uinal
soc te ts'ujul ya xco tal ta ch'ulchan.
40Ta scuenta te espada awu'un ya xcuxajat,
soc yac awac' aba ta a'batinel yu'un te awihts'ine;
pero te bin ora awich'ojix awip a,
yac aloq'ues ta anuc' te yugo yu'une, xchi.
Jacob ahn loq'uel ta stojol Esaú
41Te Esaú la sp'aj te Jacob yu'un te bendición a'bot yu'un te state, hich la yal ta yo'tan: Nopol sta yorahil mel-o'tan yu'un te ya xcham te jtate, tey ya jmil a te quihts'in Jacob, xchi.
42Halbot ya'iy te Rebeca te bin la yal te Esaú te sba-al, ha yu'un la sticon ta iq'uel tal Jacob te ihts'inal, hich la yalbe: A'iya awa'iy, te abanquil Esaú ha smuc'ul yo'tan te snopoj te ya smilat. 43Ha yu'un, cal, ch'uhuna te bin ya calbat: Hahchan, bahan ta ahnel ta banti ay te jbanquil Labán ta Harán. 44Joquina cheb oxeb c'ahc'al ha to c'alal ya xlaj te yilimba te abanquile. 45Te c'alal lajix a te yilimba te abanquil ta atojol soc te ch'ayix ta yo'tan te bin la apasbe, ya jticonat ta iq'uel tal. ¿Bistuc ya xch'ayex cu'un achebalic ta junax c'ahc'al? xchi.
46Te Rebeca hich la yalbe te Isaac: Wocol cuxulon ta scaj te yantsil-nich'nab Het. Teme Jacob ya yic' yihnamin jtuhl sts'umbal Het, ha te ach'ixetic yu'un te q'uinal li'i, tojol te cuxulon, xchi.
Currently Selected:
Génesis 27: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.