Génesis 19
19
Laj Sodoma soc Gomorra
1Yaquix ta ihc'ubel q'uinal a c'ohtic ta Sodoma te cheb ch'ul a'batetique. Te Lot hucul ta yochibal te Sodoma. C'alal la yilbe sitic, hahch spatbe yo'tanic, la spahcan sba ta lum, 2hich la yal: Jtatiquetic, awocoluc conic ta sna te a'bat awu'un, yu'un yac apoc awoquic soc ya xwayex tey a, ta sab pajel ya xhahchex xan bahel, xchi.
La sjaq'uic: Ma'uc, ya xwayotcotic ta calle ha'i ahc'abal ini, xchihic.
3Pero te bin ut'il ma ba laj yo'tan ta c'op te Lot ta stojolic, bahtic soc ta sna. La spasbe we'elil, la spas pan te ma ba yich'oj levadura, hich we'ic.
4Pero te c'alal ma to xwayic a, tal sjoytayic te na spisil te winiquetic yu'un Sodoma, jcolel ch'ihyeletic soc mamaletic. 5La yawtayic te Lot, hich la yalic: ¿Banti ay te winiquetic te talic ta atojol ha'i ahc'abal ini? Loq'uesa tal, yu'un ya xwayotcotic soc, xchihic.
6Ha yu'un te Lot loc' bahel ta stojolic, la smac hilel te puerta ta spat, 7hich la yal: Awocolicuc, quermanotac, ma me xapasic te bin chopol ini. 8Ilawil, ay cheb cantsil-nich'nab te ma ba tahbilic ta winic, ya quic'beyex loq'uel tal, chican bin yac apasbeyic. Pero ma me ayuc bin xapasbe te winiquetic ini te ochemic ta jna, la yut.
9La sjaq'uic: Loc'an teye, xchihic. Soc la yalic xan: Te jyanlum winic ini tal ta nahinel ta cohliltic, ¿yu'un bal ya sc'an ya x'ochix ta juez? C'ax hich bin chopol ya jpasbatcotic a te bin ut'il te yantique, xchihic. Tulan la stenic ta c'op te Lot, soc nohpojic bahel yu'un ya stop'ic te ti'nahil. 10Hich te winiquetic te ayic ta sna la sloq'ues sc'abic, la snitic ochel ta yut na te Lot, la smaquic te ti'nahil. 11Soc la sc'atp'unic ta ts'o'sit te winiquetic te ayic ta ti'nahil, queremetic soc mamaletic, hich lubic ta slehel te ti'nahile.
12Te Lot hich halbot yu'un te winiquetic: ¿Ay bal yan mach'a ay awu'un li'i? Loq'uesa bahel li' ta lugar ini te ani'altac, awal-anich'nab, soc spisil bintic ay awu'un ta pueblo, 13yu'un ya me jlajincotic te lugar ini, como bayel c'opetic ta scontra te yajwal te pueblo ini te c'ohtix ta stojol Jehová; ha yu'un te Jehová la sticonotcotic talel ta slajinel, xchihic.
14Hich loc' bahel te Lot, baht sc'opon te queremetic te chapal ya yic' sbahic soc te yantsil-nich'nab, hich la yalbe ya'iyic: Hahchanic, loc'anic bahel ta lugar ini, yu'un te Jehová ya slajin te pueblo ini, la yut. Pero te queremetic la scuyic ta labanel.
15C'alal yaquix ta sacubel tal a te q'uinale, te cheb ch'ul a'batetic la sujic te Lot, hich la yalbeyic: Hahchan, ic'a bahel awihnam soc te cheb awantsil-nich'nab te li' ayic, scuenta yu'un ma pajaluc ya xlajat soc te pueblo, xchihic.
16Te bin ut'il yoquelal ma xloc' te Lot, te cheb winiquetic la stsacticlambeyic sc'ab soc te sc'ab te yihnam soc te cheb yantsil-nich'nab, la yiq'uic loq'uel ta pueblo, ta scaj te na'bot yo'bolil sbahic yu'un te Jehová. 17C'alal loq'uix bahel ta fuera yu'unic a, la yalbeyic: Loc'anic ta ahnel yu'un te acuxlejal, ma me xasut asit ta apat soc ma me ayuc banti ya xhalajat ta spamlej ini; bahan ta ahnel ta witsiltic scuenta yu'un ma ba ya xlajat a, xchihic.
18Pero te Lot la yalbe: Ma'uc, awocoluc, jtatiquetic. 19Lec c'oht sc'oblal ta atojolic te a'bat awu'unic soc muc' te sc'uxul awo'tanic te bin ut'il cuxul a la awic'onic loq'uel tal; pero ma xhu' ya xbohon ta ahnel ta witsiltic, ya wan stahon te bin chopol, hich ya xlajon. 20Ay tut pueblo nopol li'i te banti ya xhu' ya xbohon ta ahnel. Ac'awon bahel tey a, tut nax te pueblo, tey ya xcolon a, xchi.
21Halbot yu'un: La jca'iyix te bin la ac'ambon. Ma ba ya cac' lajuc te pueblo yac awale. 22Suja aba, bahan me ta ahnel tey a, yu'un mayuc bin ya xhu' ya jpas ha to teme ya xc'ohat tey a, xchi. (Ha scuentahil te Zoar#19.22 Zoar: tut, xchi. c'oht sbihil te pueblo.)
23Loq'uix tal c'ahc'al a te och ta Zoar te Lot. 24Hich te Jehová la yac' tal ta ch'ulchan azufre soc c'ahc' ta stojol Sodoma soc Gomorra. 25La slajin te pueblohetic soc spisil te spamlej, soc spisil mach'atic nahinemic tey ta pueblohetic, soc sts'unub-yawalic. 26Pero te yihnam te Lot la sut sit ta spat, hich c'atp'uj ta teq'uel bahlal ats'am.
27Sab hahch te Abraham, baht ta banti la stehc'an sba ta stojol Jehová. 28La yil bahel ta stojol Sodoma soc Gomorra soc spisil te spamlej, la yil te xtomomet ta loq'uel sch'ahilel hich te bin ut'il sch'ahilel horno.
29Hich te c'alal Dios la slajinlan te pueblohetic ta spamlej, la sna' te Abraham, hich la sticon loq'uel te Lot ta yohlil te jinel te la slajinlan te pueblohetic ta banti nahinem.
Banti chicnaj moabetic soc amonetic
30Te Lot la xi' te ya xnahin ta Zoar, ha yu'un baht ta nahinel ta witsiltic soc te cha'tuhl yantsil-nich'nab. Nahin ta ch'en soc te cheb yantsil-nich'nab.
31Te wixil la yalbe te yihts'in: Mamalix te jtatic, soc mayuc winic ta sjoyobal te banti ayotic te ya xhu' ya xnuhpunotic soc hich te bin ut'il stalel spisil te ants-winiquetic ta bahlumilal. 32La', ya ca'betic yuch' vino te jtatic, ya joquintic ta wayel scuenta yu'un hich ay sts'umbal ya xc'oht a te jtatic, xchi.
33Hich la ya'beyic yuch' vino te static te c'alal ihc'ub q'uinal, och bahel te wixil, la sjoquin ta wayel te state. Pero ma ba la sna' te stat bin ora tal ta joquinel ta wayel soc te bin ora hahch bahel. 34Ta yan c'ahc'al, te wixil la yalbe te yihts'in: La joquin ta wayel ahc'abe te jtatique. Ha nix hich yo'tic ta ahc'abal ya ca'betic yuch' vino, ha'at me ya x'ochatix bahel, yac ajoquin ta wayel scuenta yu'un ay sts'umbal ya xc'oht a te jtatic, xchi.
35Hich la ya'beyic yuch' vino te static ta ahc'abal, te ihts'inal baht sjoquin ta wayel. Pero te static ma ba la sna' bin ora tal ta joquinel ta wayel o bin ora hahch bahel. 36Hich la sta yalic ta schebal yantsil-nich'nab Lot ta scuenta nix te statique. 37Ayin yal te wixil, la ya'be sbihilin Moab.#19.37 Moab: jteb ma pajaluc ta a'iyel soc: ta scuenta jtat, xchi. Ha stat te moabetic te ayic ta q'uinal c'alal ora ini. 38Ha nix hich ayin yal te ihts'inal, la ya'be sbihilin Ben-amí.#19.38 Ben-amí: snich'an jlumal, xchi. Ha stat te amonetic te ayic ta q'uinal c'alal ora ini.
Currently Selected:
Génesis 19: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.