Daniel 9
9
Daniel la sc'opombe Dios te pueblo yu'un
1Ta shahchibal ha'bil yu'un te Darío snich'an Asuero, te ha sts'umbal medohetic, te och ta ajwalil ban c'alal scuentahinej te caldeohetique, 2ta shahchibal ha'bil yochel ta ajwalil a, ho'on Daniel, la jquil ta hunetic te bin halbot yu'un Jehová te Jeremías te jayeb ha'bil te ya xhalaj te jinel yu'un Jerusalén, ha lajuneb schanwinic (70) ha'bil. 3La jsut jsit quelaw ta stojol Cajwaltic Dios, la jcalbe wocol soc la jcom jwe'el, la jlap ch'ixal-pac' soc la juhcan sba ta stanul c'ahc'. 4La jc'opon te Jehová te Dios cu'un, hich la jcal: Cajwal, muc'ul Diosat, te ayat ta xi'el, te yac awac' c'ohtuc ta pasel te chapbil-c'op soc yac ac'uxultay te mach'atic c'uxat ta yo'tanic soc te ya sch'uhunic spasel te mandariletic awu'une. 5La jta jmulcotic, la jpascotic te bintic chopol, la jpascotic te bin ma lecuc, la jtoy jbahcotic soc la jquihquitaycotic hilel te mandariletic awu'un soc te bin awaloj ta mandar. 6Ma ba la jquich'cotic ta cuenta te jalwanejetic te a'batetic awu'un te c'opojic ta scuenta abihil ta stojol te ajwaliletic, te príncipaletic, jme'jtatcotic soc spisil te pueblo yu'un te q'uinale. 7Ha'at awu'un, Jehová, te bin toj ta pasel, pero ho'otcotic ayotcotic ta q'uexlal c'alal ora yo'tic, spisil mach'atic yu'un Judá, te mach'atic nahihenic ta Jerusalén soc spisil Israel, te nopol ayic soc te namal ayic, ta spisil q'uinal ta banti la apucticlan bahel ta scaj stoybahilic ta atojol. 8Jehová, ha cu'uncotic te q'uexlal soc yu'un te ajwaliletic soc príncipaletic cu'uncotic soc te jme'jtatcotic, yu'un la jta jmulcotic ta atojol. 9Yu'un Jehová, te Dios cu'untic, te c'uxultaywanej soc te perdón, aunque jtoyoj jbahcotic ta stojol, 10soc ma ba la jch'uhumbecotic te sc'op Jehová, te Dios cu'untic, ha te ya jt'umbecotic te leyetic yu'un te la ya'botic ta scuenta te jalwanejetic, te a'batetic yu'une. 11Spisil Israel la sc'axuntaybat te Ley awu'un, la yihquitayic sch'uhunel ac'op. Ha yu'un tal ta jtojolcotic te bin ma lecuc sc'oblal soc te bin halbil ta jamal te ts'ihbabil ta ley yu'un Moisés, te a'bat yu'un Dios, como la jta jmulcotic ta stojol Dios. 12Ha la sc'ohtes ta pasel te bin la yal ta jtojolcotic soc ta stojol te jcuentahinwanejetic cu'uncotic, ha te la yac' tal ta jtojolcotic bayel wocol; mayuc hich c'ohem ta pasel ta ye'tal ch'ulchan te bin ut'il c'oht ta stojol Jerusalén. 13Hich te bin ut'il ts'ihbabil ta ley yu'un Moisés, c'oht ta jtojolcotic spisil te bintic wocol ini; pero ma ba calbeyejcotic wocol Jehová te Dios cu'untic, ma ba la jquihquitaycotic te jchopolilcotic o ma ba la jquich'cotic ta cuenta te smelelil c'op awu'une. 14Ha yu'un te Jehová la schahpan te bin chopol, la yac' tal ta jtojolcotic; como te Jehová te Dios cu'untic, stojil ay spisil bintic ya spas, pero ho'otcotic ma ba la jch'uhumbecotic te sc'ope.
15Yo'tic, Cajwaltic Dios, te la aloq'ues te pueblo awu'un ta sq'uinal Egipto ta scuenta yip ac'ab, soc te la awac' ta na'el abihil ha to c'alal ora yo'tic, la jta jmulcotic, la jpascotic te bin chopole. 16Cajwal, hich te bin ut'il stojil spisil te bintic yac apas, loq'uesa awilimba soc te sc'ahc'al awo'tan ta stojol Jerusalén te pueblo awu'un, te ch'ul wits awu'une; como ta scaj jmulcotic soc schopolil te jme'jtatcotic te tse'laybil c'oht te Jerusalén soc te pueblo awu'un yu'un spisil mach'atic ayic ta joyobalcotic. 17Ha yu'un, Dios cu'untic, a'iybeya sc'op te a'bat awu'un soc te bintic ya sc'ambate, soc ta scuenta abihil, Cajwal, ac'a tihluc sts'anabul asit awelaw ta stojol te ch'ul awilal awu'un te jihneme. 18Ac'a achiquin a, Dios cu'un, a'iya awa'iy; jama asit, ilawil te jinel cu'uncotic soc te muc'ul pueblo te yich'oj te abihile. Ma yu'unuc te ay bin ya jc'ambatcotic ta scaj te toj bin ya jpascotic, pero ta scaj bayel sc'uxul awo'tan. 19¡A'iya awa'iy, Cajwal! ¡Pasa perdón, Cajwal! ¡A'iya awa'iy, Cajwal, soc pasa! Ta scuenta sc'uxul awo'tan, ma xhalajat, Dios cu'un, como yich'oj abihil te Jerusalén soc te pueblo awu'une.
Sc'oblal lajuneb schanwinic (70) semana
20C'alal yacon ta sc'oponel Dios soc ta yalel ta jamal te jmul soc smul te jlumal Israel, soc ta yalel wocol ta stojol Jehová te Dios cu'un yu'un te ch'ul wits yu'une; 21c'alal yacon to ta sc'oponel Dios a, te Gabriel, te winic te la jquil ta nahalsit ta nahil, ahnimal tal ta wihlel ta banti ayon ta yorahil aq'uel te milbil mahtanil ta tibiltic. 22La ya'bon jna', hich la yalbon: Daniel, talon ta ora yu'un ya ca'bat sp'ijil awo'tan soc snopojibal awu'un. 23Te c'alal hahchat ta yalbeyel wocol Dios chicnaj te suhtib, hich tal calbat awa'iy, como ha'at c'uxat ta o'tanil. Ha yu'un na'beya scuentahil te suhtib soc na'beya scuentahil te nahalsitile.
24Chapal lajuneb schanwinic (70) semana#9.24 Te jun semana, ha huqueb ha'bil c'ohem.
ya xc'ax yu'un te alumal
soc te ch'ul pueblo awu'un,
yu'un ya xlaj te sc'axuntayel mandar,
yu'un ya xlaj te mulil soc yu'un stojel mulil,
yu'un ya yich' talel
te bin stojil ta pasel te stalel ya xhil,
yu'un ya yich' sello te nahalsitil
soc te sc'op-jalwanej,
soc yu'un ya yich' ch'ultesel
te Mero Ch'ul Awilal.#9.24 O: te Mach'a mero ch'ultesbile.
25Na'a me soc ac'a c'ohtuc ta awo'tan:
te c'alal ya yich' halel mandar
te ya yich' cha'pasel xan te Jerusalén
ha to c'alal ya xtal te príncipal te malbil ta aceite,
ya xc'ax huqueb semana,
soc cheb schanwinic (62) semana;
ya yich' xan pasel te callehetic soc te sts'ahcul
ta yorahil wocol.
26C'alal ya xc'ax te cheb schanwinic (62) semana,
ya yich' milel te mach'a malbil ta aceite,
mayuc bintic ya xhil yu'un.
Te ants-winiquetic yu'un te príncipal te ya xtal
ya me sjinic te pueblo soc te ch'ul awilal;
hich ya xtal slajibal te bin ut'il snojel ha',
ya xhalaj te jinel ha to c'alal ya xlaj te guerrahe.
27Ta jun xan semana ya schap sc'op soc tsobolic,
ta j'ohlil semana ya scom ta aq'uel te milbil mahtanil
soc te mahtanil yu'un harina.
Ya me stehc'an bin ilobtic sba te ya xjinawan,
ha to c'alal ya xc'oht ta stojol te jinaw
te lajinel te chapal ya yich'e, xchi.
Currently Selected:
Daniel 9: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.