Daniel 8
8
Nahalsitil yu'un tat tuminchij soc tentsun
1Ta yoxebal ha'bil yochel ta ajwalil a te Belsasar, ho'on Daniel la jquil nahalsitil, yan a te la jquil ta nahil to. 2La jquil ta nahalsit te ayon ta Susa, te capital ta jsehp q'uinal Elam. La jquil ta nahalsit te ayon ta sti'il muc'ul-ha' Ulai. 3La jquil mohel, ay jcoht tat tuminchij ta sti'il muc'ul-ha', soc ay cheb xulub; aunque naht schebalic, te june ha naht xan yu'un te yane, pero patil muc'ub bahel. 4La jquil te tat tuminchij la sluchticlan ta xulub ta stojol smahlib c'ahc'al, ta norte soc ta sur. Mayuc ni jcohtuc chambahlam te hu' yu'un te ya stsal sba soc, soc mayuc mach'a hu' yu'un ya scoltay sba ta yip te xulube. La spas te bin la sc'an yo'tan, soc xquechcon ta muc'ubel.
5C'alal yacon ta sna'el ini, tal jcoht tat tentsun ta stojol smahlib c'ahc'al, yac ta c'axel ta q'uinal, ma ba la sta lum. Te tat tentsun ay xulub ta yohlil sti'ba te chican ta lec. 6Nohpoj tal ta stojol te tat tuminchij te ay cheb xulubil te la jquil ta sti'il te muc'ul-ha', syahlib c'oht sta ta cujel soc spisil yip. 7La jquil te nohpoj tal ta stojol te tat tuminchij; soc sc'ahc'al yo'tan la scuj, la swac'be schebal te xulube. Te tat tuminchij mayuc yip te ya stsac sba soc. Te tat tentsun la sjip ta lum te tat tuminchij, la sts'o'ts'o'tec', mayuc mach'a hu' yu'un te ya scoltay ta yip.
8Te tat tentsun c'ax muc' c'oht; pero c'alal bayelix yip a, wac' te smuc'ul xulube, tey loc' tal chanch'ix muc'ul xulubiletic a, te jujune yiloj bahel ta schanxuhcul te q'uinale. 9Ay tut xulub te loc' tal ta jun xulubil, te nahtub bahel ta stojol sur, ta stojol banti ya xloc' tal c'ahc'al, soc ta stojol te t'ujbil q'uinale. 10Muc'ub bahel ha to c'oht c'alal ta banti ay te tsobolic yu'un te ch'ulchane. Ay la sjin cohel c'alal ta lum j'ohlil te tsobolic yu'un te ch'ulchan soc te eq'uetic, la sts'o'ts'o'tec'ticlan. 11Muc' la yac' sba ta scontrahinel te príncipe yu'un te tsobolic yu'un te ch'ulchan; la yac' quehchajuc yac'ulanel te milbil mahtaniletic yu'un, soc la sjin cohel c'alal lum te ch'ul awilal yu'une. 12Ta scaj toybahil, te tsobolic ac'otic ta sc'ab soc te milbil mahtanil scuenta jujun c'ahc'al; la sch'oj cohel ta lum te smelelil c'op, soc la spas te bin la sc'an yo'tan, soc lec c'oht yu'un.
13Patil la jca'iy te c'opoj jtuhl mach'a ch'ultesbil, ay yan mach'a ch'ultesbil hich la sjoc'obe te mach'a c'opoj: ¿Bin to ora ya xlaj te nahalsitil sc'oblal te milbil mahtanil scuenta jujun c'ahc'al, sc'oblal te toybahil te ya yac' jinel, soc te ya x'ac'otic ta ts'o'ts'o'teq'uel te tsobolic soc te ch'ul awilal? xchi. 14Hich la yal: Ha to c'alal ts'acal ho'lajunwinic swacbahc' (2,300) tibiltic soc sahb; patil ya yich' lecubtesel te ch'ul awilal, xchi.
15Ho'on, Daniel, c'alal yacon ta sna'ulanel a te nahalsitil soc bin ut'il ay sc'oblal, la stehc'an sba ta jtojol mach'a hich yilel te bin ut'il winic. 16Soc la jca'iy sc'op winic ta ti' muc'ul-ha' Ulai te hich la yal ta aw: Gabriel, halbeya sc'oblal te nahalsit ini, xchi.
17Hich nohpoj tal ta banti ayon; c'alal tal, bayel xiwon, la jpahcan jba c'alal ta lum. Pero hich la yalbon: Snich'anat winic, na'a me te ha sc'oblal te slajibal c'ahc'al te nahalsit, xchi.
18C'alal yac sc'opombelon a, c'ub jwayel yu'un, pacalon ta lum. Ha la spicon, la yac' tehc'ajucon. 19Hich la yalbon: Ya calbat awa'iy te bin ya xc'oht ta pasel te c'alal c'axix a te ilimba; como ha sc'oblal te slajibal c'ahc'al. 20Te tat tuminchij te ay cheb xulub te la awile, ha te ajwaliletic yu'un Media soc Persia. 21Te tat tentsun, ha te ajwalil yu'un Grecia, soc te muc'ul xulubil te ay ta yohlil sti'ba, ha te shahchibal ajwalil. 22Te xulubil te wac', te loc' chaneb xulubiletic tey a, ha sc'oblal te ya xloc' chanchahp nacionetic tey a, pero ma pajaluc yipic soc te shahchibal ajwalile.
23C'alal nopol ya sta yorahil
te ya xlaj te cuentahinel yu'unic,
c'alal tohyix a te jc'axun-mandaretic,
ya xchicnaj jtuhl ajwalil te toyba te sit yelaw,
soc mero ya sna' lo'loywanej.
24Bayel yip ya xc'oht,
pero ma yu'unuc te yipe;
ya me yac' bayel jinaw,
spisil ya xhu' yu'un te bintic ya sc'an ya spase.
Ya me slajinlan te mach'atic bayel yipic,
soc te pueblo yu'un mach'atic ch'uhltesbilic.
25Ta scuenta sp'ijil yo'tan ta lo'loywanej
ya yac' te ya ya'iy tsalaw te lo'loyele;
ya scuy sba ta muc',
ya me smilticlan tsobolic te jun yo'tanic ayique.
Ya xhahch scontrahin
te Príncipal yu'un te príncipaletic,
pero ya me yich' jinel,
ma ha'uc ta sc'ab winic.
26Te nahalsitil yu'un te tibiltic soc te sahb
te ac'ot ta ilel, mero smelelil.
Pero macal me ya xhil awu'un te nahalsit,
como ha sc'oblal bayel c'ahc'al ta patil, xchi.
27Ho'on, Daniel, laj quip la jca'iy yu'un, bayel c'ahc'al ayon ta chamel. Patil hahchon, cha'ochon xan ta spasel te a'tel yu'un te ajwalil. Pero ay xiwel ta co'tan ta scaj te nahalsit, ma ba la jna'be scuentahil.
Currently Selected:
Daniel 8: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.