Colosenses 1
1
Spatil-o'tanil
1Pablo, jpuc-c'op yu'un te Jesucristo ta scuenta sc'anojel yo'tan Dios, soc te quermanotic Timoteo, 2ta stojol te quermanotic te ayic ta Colosas te ch'uhltesbilic soc te jun yo'tanic ta stojol Cristo:
Ac'a sjoquinex te yutsil-o'tanil soc lamal q'uinal yu'un te Jtatic Dios soc te Cajwaltic Jesucristo.
Pablo ya sc'opombe Dios te yacuc x'a'botic sp'ijil yo'tanic
3Ta spisil ora te ya jc'opombeyexcotic Dios ya calbecotic wocol Dios, te Stat te Cajwaltic Jesucristo, 4yu'un ca'iyejcotic te ay sch'uhunel awo'tanic ta stojol te Cristo Jesús soc te c'ux yac awa'iy ta awo'tanic spisil mach'atic ch'ultesbilic. 5Hich ay awo'tanic ta scaj te bin yac amahlibelic te q'uejbil ta acuentahic ta ch'ulchan. Te bin yac amahlibelic awa'iybeyejic sc'oblal ta scuenta te smelelil c'op yu'un te lec yach'il c'op 6te c'ohtix ta atojolique. Ta swohlol bahlumilal yac ta yaq'uel sit te lec yach'il c'op soc yac ta puhquel bahel, hich te bin ut'il ta atojolic te c'alal la awa'iyic soc te la ana'beyic te yutsil yo'tan Dios ta mero melel. 7La anopbeyic sc'oblal ta scuenta Epafras, te c'ux ta co'tancotic soc te joc jbahcotic ta a'tel, te jun yo'tan yac'oj sba ta a'batinel yu'un Cristo ta acuentahic, 8te ha nix yalbeyejotcotic sc'oblal te sc'uxul awo'tanic ta scuenta te Espíritu.
9Ha scuentahil, te c'alal hich la jca'iybeyex ac'oblalic, ma ba ya xquehchajotcotic ta sc'oponel Dios ta atojolic, ha ya jc'ambecotic te yacuc snojesbeyex ta awo'tanic sna'el bin ya sc'an yo'tan, ta scuenta spisil p'ijil-o'tanil soc snopojibal ta scuenta espíritu. 10Hich ya xhu' ya x'ayinex te bin ut'il ya sc'an te Cajwaltic, te lecuc yo'tan awu'unic spisil, te yac awaq'uic sit ta scuenta spisil lequil a'teliletic soc behbe yac ana'beyic xan sc'oblal te Diose. 11Behbehuc ac'a yich' yip awo'tanic ta scuenta spisil yu'el, ha chican bin ut'il ay te yu'el te ay yutsilal, scuenta yu'un ay yip awo'tanic te ya xcuhch awu'unic spisil, 12soc tse'el awo'tanic yac awalbeyic wocol te Tatil, te la yac' te pajal ya xhu' yac awich'ic hilel te bin ay yu'un Dios soc te mach'atic ch'uhltesbilic te ayic ta sacal q'uinale. 13Ha la scoltayotiquix loq'uel ta yip te yihc'al q'uinal, la yic'otiquix ochel ta banti ay te cuentahinel yu'un te Snich'an te c'ux ta yo'tan, 14te ha ta scuenta te mambil jcoleltic ta sch'ich'el, ha te perdón yu'un te jmultique.
Ya xlecub co'tantic soc Dios ta scuenta laj ta cruz Cristo
15Te Cristo ha sloc'omba
te Dios te ma chicanuc ta ilel,
ha ba-alalil yu'un spisil bintic pasticlambil.
16Como ha ta scuenta te la yich' pasel
spisil bintic ay ta ch'ulchan
soc spisil bintic ay ta bahlumilal,
te bin chicanic ta ilel
soc te bin ma chicanuc ta ilel,
teme muc'ul huctajibaletic, jcuentahinwanejetic,
principaletic o te mach'atic ay ya'telic;
spisil la yich'ic pasel
ta scuenta Cristo soc ha nix yu'un.
17Ha nahil ay yu'un spisil bintic ay,
soc spisil yich'oj yip ta scuenta.
18Ha jolal yu'un te iglesia,
te ha sbaq'uetal;
ha shahchibal,
ha nahil cha'cuxaj ta yohlil te mach'atic chamenic,
scuenta yu'un ha toyol ya xc'oht
yu'un spisil bintic ay stuquel,
19como hich la sc'an te Tatil
te ha ya yich'be spisil te stalel,
20soc te ha ta scuenta
te ya yac' te ya xlecub yo'tanic soc Dios
spisil bintic ay ta bahlumilal
soc spisil bintic ay ta ch'ulchan,
ha la yac' lamal q'uinal
ta scuenta sch'ich'el te la yich' malel ta cruz.
21Ha nix hichex, ta nahil to namal ayex ta stojol Dios soc ha scontrahex ta scaj apensaric soc ta scaj chopol awa'telic, 22pero ta ora ini, la scha'lecubtesbeyex awo'tanic soc ta scuenta te sbaq'uetal Cristo te laje, scuenta yu'un ch'ultesbilex soc mayuc banti jihnem awu'unic soc mayuc bin quechel ta acuentahic a ya stehc'anex ta stojol. 23Pero ya sc'an te spisil ora ay yip te sch'uhunel awo'tanic, te ma ba ya xhil awu'unic te smuc'ul awo'tanic yu'un te lec yach'il c'op te awa'iyejic, te ha ya yich' halel ta stojol spisilic te ayic ta ye'tal ch'ulchan, te ho'on, Pablohon, quich'oj ca'tel ta yalel.
24Yo'tic tse'el co'tan yu'un te bin c'ax jwocol ta acuentahic soc te ya jts'acaytes ta jbaq'uetal te bin xan ya sc'an te ya xc'ax swocol Cristo yu'un te sbaq'uetal, ha te iglesia. 25Ha ya'bat te iglesia c'ohemon ta scuenta te ca'tel la ya'bon te Dios ta acuentahic, scuenta yu'un ts'acal ya calbeyex te sc'op Dios, 26ha te bin mayuc ta na'el ta namey te muquen ay, pero yo'tic a'botix sna'ic te mach'atic ch'ultesbilic yu'une. 27Dios la sc'an ya ya'be sna'ic te yutsil sc'uhlejal te bin mayuc ta na'el ini te lec ta a'iyel ta yohlil te jyanlumetic, ha te ay ta awo'tanic te Cristo, te ha ta scuenta te ya me xchicnaj utsilal.
28Ha yu'un ya calbecotic sc'oblal te Cristo; ta scuenta spisil p'ijil-o'tanil ya jtsitsbecotic soc ya jnohptescotic spisil ants-winiquetic, scuenta yu'un spisilic ay yipic a ya cac'cotic stehc'an sbahic ta stojol Cristo. 29Ha scuentahil te ya x'a'tejon, ya cac' fuersa ta scuenta yu'el stuquel, te tulan yac ta a'tel ta jtojol.
Currently Selected:
Colosenses 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.