YouVersion Logo
Search Icon

1 Tesalonicenses 1

1
Spahtil-o'tanil
1Pablo, Silvano soc Timoteo, ta stojol te iglesia yu'un te tesalonicahetic te ayic ta stojol te Jtatic Dios soc ta stojol te Cajwaltic Jesucristo: Ayuc me yutsil-o'tanil soc lamal q'uinal awu'unic.#1.1 Ay yantic antiguo hunetic te ya yal xan: ta scuenta te Jtatic Dios soc te Cajwaltic Jesucristo.
Te scuxlejalic te tesalonicahetic
2Spisil ora ya calbecotic wocol Dios ta acuentahic ta apisilic, ya jna'excotic ta stojol Dios te jujun buelta ya jc'oponcotic te Diose. 3Spisil ora ya jna'excotic ta stojol te Jtatic Dios yu'un te awa'telic yac apasic ta scuenta sch'uhunel awo'tanic, te awa'telic ta scuenta sc'uxul awo'tanic, soc te ay yip awo'tanic ta smahliyel te Cajwaltic Jesucristo.
4Quermanotac te c'uxex ta yo'tan Dios, na'bil cu'uncotic te tsahbilex yu'un te Diose. 5Te lec yach'il c'op te la jcalbeyexcotic, ma ha'uc ta c'op nax te c'oht ta atojolic, ha c'oht soc yu'el soc ya'tel te Ch'ul Espíritu, soc c'oht ta awo'tanic ta mero melel. Ana'ojic bin ut'il ayinotcotic ta awohlilic ta scuenta te c'uxex ta co'tancotique.
6Ha'ex la anopbotcotic co'tancotic soc te yo'tan te Cajwaltique. Tse'el awo'tanic ta scuenta te Ch'ul Espíritu la awich'ic te c'op aunque ay bayel awocolic. 7Hich la awaq'uic ta ilel ta stojol spisil mach'atic sch'uhunejic Dios ta Macedonia soc ta Acaya te bin ya sc'an pasele. 8Como loc' hahchel ta atojolic te sc'op Cajwaltic, ma ha'uc nax ta Macedonia soc ta Acaya, ha puhc bahel ta bayuc sc'oblal te sch'uhunel awo'tanic ta stojol Dios. Ha yu'un ma fuersahuc ay bin ya calcotic yu'un. 9Ha'ic nix ya yalic bin ut'il la awic'otcotic ta atojolic, soc bin ut'il la awihquitayic hilel te loc'ombahetic yu'un yac awac' abahic ta a'batinel yu'un te Dios te cuxul soc te melel ay, 10soc yac amahliyic te ya xtal ta ch'ulchan te Snich'an, te cha'cuxaj tal ta yohlil mach'atic chamenic, ha te Jesús, te mach'a ya yac'otic ta libre yu'un te ilimba talel yaque.

Currently Selected:

1 Tesalonicenses 1: TZH

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy