San Juan 21
21
Jesús ñayyajni'igu̶xu̶'ku̶ ma je̱'e̱ nijuxtujkpu̶ dyiscípulotu̶jk ajku̶xyu̶ñ
1Ko adaa du'un tyuunu̶ jyajtu̶, chi je̱'e̱ Jesús ja'adu'ook ñayyajni'igu̶xu̶'ku̶ ma je̱'e̱ dyiscípulotu̶jk ajku̶xyu̶ñ, jim Tiberias mejypya'a. Y du'un ñayyajni'igu̶xu̶'ku̶: 2Jim je̱'e̱ Simón Pedro najty ajku̶xy mu̶u̶d je̱'e̱ Tomás, je̱'e̱ mu̶dyiibu̶ najty tyijku̶xypyu̶ñ je̱'e̱ Xeeñ'úng, mu̶u̶d je̱'e̱ Natanael, je̱'e̱ mu̶dyiibu̶ najty kugajptu̶ñ jim Caná Galilea naaxjooty, mu̶u̶d je̱'e̱ Zebedeo y'ung ajku̶xy y mu̶u̶d je̱'e̱ jaknime̱tzkpu̶ Jesús dyiscípulotu̶jk ajku̶xy. 3Chi je̱'e̱ Simón Pedro je̱'e̱ myu̶gu'ugtu̶jk nu̶maay:
—Nnú̶kxyu̶ch n'ok'akxku'uju̶bípy.
Chi je̱'e̱ myu̶gu'ugtu̶jk y'adzoowu̶gu̶xy:
—U̶u̶ch nnu̶kxaambu̶ch nandu'un ajku̶xy mu̶u̶d miich.
Chi chóngu̶xy, y pye̱jtku̶xy ma tu'ug bárcu̶ju̶ñ, peru̶ je̱'e̱ mu̶'it koodz ka'p ni tii ku'uju̶bijpy ajku̶xy. 4Ko najty xyu̶u̶mu̶u̶yñu̶, chi je̱'e̱ Jesús ñayyajni'igu̶xu̶'ku̶; tyu̶na'ay mejypya'a. Peru̶ je̱'e̱ discípulotu̶jk ka'p najty je̱'e̱ nejwu̶u̶ygyu̶xy pu̶nu̶ je̱'e̱ Jesús je̱' najty. 5Chi je̱'e̱ Jesús yajtu̶u̶wu̶ ajku̶xy:
—Mu̶gu'uktu̶jk, ¿nej ka'anu̶ ni ti mgu'uju̶bijpku̶xyñu̶ja?
Chi je̱' y'adzoogu̶xy:
—Ka'anu̶.
6Mu̶'it je̱'e̱ Jesús ñu̶maayu̶ ajku̶xy:
—Pu̶daakku̶x je̱'e̱ mgu'uju̶bijptzaay mejyjyooty a'oy'eemby ma je̱'e̱ bárcu̶ju̶ñ, y mu̶'it je̱'e̱ akx mgu'uju̶bijpku̶xu̶ch.
Y chi je̱'e̱ kyu'uju̶bijptzaay a'oy'eemby pu̶daakku̶xy, y ka'p najty je̱'e̱ y'okmaayu̶gu̶xnu̶ neby yajpu̶dzu̶u̶mgu̶xu̶chu̶ñ, je̱' ko je̱'e̱ may'akx najty tu̶ ku'uju̶bijpku̶xy. 7Mu̶'it je̱'e̱ discípulo, je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ, je̱'e̱ Pedro nu̶maay:
—¡Je̱'e̱ nWindzú̶n yu̶'u̶ ajtu̶m ajku̶xy!
Je'eyu̶ je̱'e̱ Simón Pedro du'un ni'imu̶dooy ko jye̱'e̱ju̶ch je̱'e̱ Windzú̶n, chi je̱'e̱ wyit yajtu̶gu̶u̶y, je̱' ko agu̶ u̶xmotzpa't najty je̱', y chi myejykyu'utu̶jpy. 8Y je̱'e̱ nimaybyu̶ discípulotu̶jk ajku̶xy barcu̶jooty je̱'e̱ mejypya'a jya'tku̶xy; cham je̱'e̱ kyu'uju̶bijptzaay ujtz pawijtz papo'tku̶xy mu̶u̶d je̱'e̱ may'akx, mu̶go'px metro je̱'e̱ mejypya'a najty tu̶ ku'ugue̱e̱kku̶xy. 9Ko byarcu̶pu̶dzu̶u̶mgu̶xy, chi je̱'e̱ ju̶u̶n paatku̶xy tyoy najty jim; y jim najty akx tu'ug yajtza'ay ju̶u̶nbajkjooty y kyoona'ay tzajkaagy tu'ug. 10Chi je̱'e̱ Jesús ñu̶maayu̶ ajku̶xy:
—Yajmiingu̶x je̱'e̱ akx tu'ug me̱tzk je̱'e̱ mu̶dyiibu̶ naamnu̶ mgu'uju̶bijpku̶xyu̶ñ.
11Chi je̱'e̱ Simón Pedro barcu̶jooty pyejty, y yajnú̶kxy je̱'e̱ kyu'uju̶bijptzaay pawich papo'ody mejypya'a ujtz mu̶u̶d je̱'e̱ mu̶jjaty'ákx, mu̶go'px ja'ajuxytyíkxymyajktu̶gu̶u̶g najty je̱'e̱ mu̶jjaty'ákx kyu̶xy'ajtta'ay; y oy najty je̱'e̱ jya'amáyu̶ch, peru̶ ka'p je̱'e̱ ku'uju̶bijptzaay kyu̶ch. 12Chi je̱'e̱ Jesús ñu̶maayu̶ ajku̶xy:
—Min ajop'ajtku̶x.
Peru̶ ni tu'ug je̱'e̱ discípulotu̶jk najty ka'ayajtu̶u̶waangu̶xy pu̶n je̱' najtyu̶ñ, je̱' ko ñejwu̶u̶ygyu̶xypy najty ko jye̱'e̱ju̶ch je̱'e̱ Windzú̶n. 13Mu̶'it je̱'e̱ Jesús myu̶jwa'ky, y konu̶'ky je̱'e̱ tzajkaagy y mooy je̱'e̱ dyiscípulotu̶jk ajku̶xy; nan myooy je̱'e̱ akxtza'ay nandu'un ajku̶xy.
14Adaa je̱' adaa, je̱'e̱ mu̶du̶gu̶u̶g'ookpu̶ ko je̱'e̱ Jesús ñayyajni'igu̶xu̶'ku̶ ma je̱'e̱ dyiscípulotu̶jk ajku̶xyu̶ñ ko najty tu̶ jyuugypyú̶ky.
Jesús je̱'e̱ Simón Pedro mu̶dmu̶dya'agy
15Ko y'ajop'ajttaaygyu̶xy, chi je̱'e̱ Jesús je̱'e̱ Simón Pedro yajtu̶u̶y:
—Simón, je̱'e̱ Juan y'ung,#21.15 Je̱'e̱ Juan y'ung: nije̱' wiingpu̶ versión myu̶na'añ: je̱'e̱ Jonás y'ung. ¿nej xychojkpu̶ch miich ni'igyu̶ ni'igu̶ ka'p u̶u̶ch adayaaba ndiscípulotu̶jk ajku̶xyñu̶ba?
Chi je̱'e̱ Pedro y'adzooy:
—Du'un, Windzú̶n, miich mnejwu̶u̶by ko u̶u̶ch miich ndzoky nju̶wu̶'u̶y.
Chi je̱'e̱ Jesús ñu̶maayu̶:
—Kweentu̶'ajtu̶gyu̶ch je̱'e̱ nja'ay, du'un neby je̱'e̱ borreegu̶ kweentu̶'ajtpu̶ je̱'e̱ byorreegu̶'úng kweentu̶'átyu̶ñ.
16Chi je̱'e̱ Jesús mu̶me̱jtz'ook yajtu̶u̶wu̶:
—Simón, je̱'e̱ Juan y'ung,#21.16 (Ijxku̶x je̱'e̱ v. 15). ¿nej xychojkpu̶ch miich u̶u̶cha?
Chi je̱'e̱ Pedro y'adzooy:
—Du'un, Windzú̶n, miich mnejwu̶u̶by ko u̶u̶ch miich ndzoky nju̶wu̶'u̶y.
Chi je̱'e̱ Jesús ñu̶maayu̶:
—Kweentu̶'ajtu̶gyu̶ch je̱'e̱ nja'ay, du'un neby je̱'e̱ borreegu̶ kweentu̶'ajtpu̶ je̱'e̱ byorreegu̶ kweentu̶'átyu̶ñ.
17Chi mu̶du̶gu̶u̶g'ook yajtu̶u̶wu̶:
—Simón, je̱'e̱ Juan y'ung,#21.17 (Ijxku̶x je̱'e̱ v. 15). ¿nej xychojkpu̶ch miich u̶u̶cha?
Chi je̱'e̱ Pedro tyajtu̶gu̶u̶y myaaydyu̶gu̶u̶y ko mu̶du̶gu̶u̶g'ook yajtu̶u̶wu̶ pu̶nu̶ tzojku̶p najty, chi adzooy:
—Windzú̶n, miich ku̶xyu̶ mnejwu̶ydya'ay: miich mnejwu̶u̶by ko u̶u̶ch miich ndzoky nju̶wu̶'u̶y.
Chi je̱'e̱ Jesús ñu̶maayu̶:
—Kweentu̶'ajtu̶gyu̶ch je̱'e̱ nja'ay, du'un neby je̱'e̱ borreegu̶ kweentu̶'ajtpu̶ je̱'e̱ byorreegu̶ kweentu̶'átyu̶ñ. 18Janch tu̶y'ajtu̶ñ miich du'un nnu̶ma'ay ko najty mdzugajy'ana'k'átyñu̶, ku̶'u̶m najty je̱'e̱ mwit myajtu̶gu̶'u̶y ko naty mnu̶kxa'añ ma naty je̱'e̱ m'aa mjoot timychokyu̶ñ; peru̶ ko naty m'amu̶jja'ayu̶u̶yñu̶, mxajtú̶wu̶py je̱'e̱ mgu̶'u̶ y wiingpu̶ je̱'e̱ mwit xyajpú̶ku̶p, y xyajnú̶kxu̶ch ma naty ka'p mja'anu̶kxa'añu̶ñ.
19Ko je̱'e̱ Jesús du'un myu̶naañ, je̱' najty je̱'e̱ Pedro du'un yajwinju̶wu̶u̶by neby je̱'e̱ Pedro najty yaj'o'oga'añyiiju̶ñ y neby je̱'e̱ Dios y'oy'ajt myu̶k'ajt du'un yajku̶xu̶'ku̶chu̶ñ mu̶u̶d je̱'e̱ y'o'ku̶ñ. Mu̶'it je̱'e̱ Jesús je̱'e̱ Pedro nu̶maay:
—¡Pajaamgu̶ch!
Je̱'e̱ discípulo je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ
20Ko je̱'e̱ Pedro ñayjyu̶'ijxu̶, chi ijxy ko u̶x'aam najty je̱'e̱ discípulo pyamiñyii, je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ, je̱'e̱ mu̶dyiibu̶ je̱'e̱ Jesús najty tu̶ mu̶d'u̶ña'ay ma je̱'e̱ ñamu̶jku̶ñ ko y'adzuu'ajtku̶xy, y je̱'e̱ mu̶dyiibu̶ je̱'e̱ Windzú̶n najty tu̶ yajtú̶yu̶ñ: “Windzú̶n, ¿pu̶n je̱' je̱'e̱ mu̶dyiibu̶ xykyu̶'u̶ye̱gaamb ma je̱'e̱ mmu̶dzipu̶ñ?” 21Ko je̱'e̱ Pedro ijxy je̱'e̱ discípulo, je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶by, chi je̱'e̱ Jesús yajtu̶u̶y:
—Windzú̶n, y adaaju̶tz, ¿nej yu̶'u̶ jyadaambu̶?
22Chi je̱'e̱ Jesús y'adzoowu̶:
—Pu̶nu̶ u̶u̶ch du'un ndzojkypy ko yu̶'u̶ jyugy'ádu̶ch u̶xtu̶ koonu̶ u̶u̶ch naty nwimbijtu̶gách, ¿y miich, ti miich mgweentu̶? U̶u̶ch miich pajaamg.
23Paady je̱'e̱ kapxy ayuuk du'un wya'kxtaay ma je̱'e̱ mu̶dyiibu̶ je̱'e̱ Jesús y'ayuuk tyu̶y'ajt najty mu̶bu̶jkku̶xpu̶ñ ko je̱'e̱ discípulo ka'p y'o'oga'añ, je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ. Peru̶ ka'p je̱'e̱ Jesús du'un myu̶naañ ko ka'p y'o'oga'añ. Du'un je̱'e̱ myu̶naañ: “Pu̶nu̶ u̶u̶ch du'un ndzojkypy ko yu̶'u̶ jyugy'ádu̶ch u̶xtu̶ koonu̶ u̶u̶ch naty nwimbijtu̶gách, ¿y miich ti miich mgweentu̶?”
24U̶u̶ch Juan, je̱'e̱ discípulo je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ, je̱'e̱ mu̶dyiibu̶ adaa du'un ku̶xyu̶ nidu̶y'ajt'ajtpu̶ñ, y tu̶ u̶u̶ch adaa du'un nguja'ay neby u̶u̶ch tu̶ n'ixy tu̶ ndu̶kxyu̶ñ. Y nnejwu̶u̶ybyu̶ch ajku̶xy ko du'un tyu̶y'ajtu̶ch neby u̶u̶ch yam nmu̶dya'agyu̶ñ.
25Jesús tyuun je̱'e̱ mayñax ku̶xyu̶ tijaty, ka'p je̱'e̱ ku̶xyu̶ tu̶ yajkujaaydya'ay, y ko u̶xyu̶py tu'ugjáty tu'ugjáty tu̶ y'ok'yajkuja'ay, ka'p ndijy u̶xyu̶py je̱'e̱ naaxwiimbu̶ ku̶xyu̶ myu̶baad'áty mu̶u̶d je̱'e̱ maylibro. Jaanch adaa du'un.
Currently Selected:
San Juan 21: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005