San Juan 19
19
1Mu̶'it je̱'e̱ Pilato je̱'e̱ Jesús windumbu̶jky y chi yajwojpu̶. 2Chi je̱'e̱ tziptuumbu̶tu̶jk xu̶gue̱jtku̶xy tu'ug je̱'e̱ eptycoronu̶, chi je̱'e̱ Jesús yajku'uje̱nu̶u̶ygyu̶xy, y chi je̱'e̱ mu̶j'ane̱'e̱mbu̶ wit yajpu̶jkku̶xy je̱'e̱ oy'ukypyu̶ color. 3Mu̶'it mu̶wingooñ ajku̶xy, cham myu̶naangu̶xy:
—¡Mu̶j ku'umáy miich, je̱'e̱ judío ja'ay myu̶j'ane̱'e̱mbu̶ ajku̶xy!
Y jyanchkojxku̶xypy najty ma je̱'e̱ wyiiñjyu̶jpu̶ñ.
4Chi je̱'e̱ Pilato ja'adu'ook tyu̶jkpu̶dzu̶u̶mnu̶bu̶, y chi ñu̶maayu̶ ajku̶xy:
—Ok'ijxku̶x, nyajtu̶jkpu̶dzu̶u̶me̱e̱mbyu̶ch yu̶'u̶ yam, wan mnejwu̶u̶ygyu̶xu̶ch ko u̶u̶ch je̱'e̱ poky ka'p nbaady ma yu̶'u̶ju̶ñ.
5Chi je̱'e̱ Jesús tyu̶jkpu̶dzu̶u̶my eptycoronu̶ ku'uje̱nu̶'u̶y, y kubu̶ky mu̶u̶d je̱'e̱ mu̶j'ane̱'e̱mbu̶ wit je̱'e̱ oy'ukypyu̶ color. Chi je̱'e̱ Pilato myu̶naañ:
—¡Ijxku̶x, chiiju̶dz je̱'e̱ ja'ay!
6Ko je̱'e̱ teedy windzu̶ndu̶jk y je̱'e̱ mu̶jtzajptu̶jk kweentu̶'ajtpu̶du̶jk ijxku̶xy je̱'e̱ Jesús, chi yaaxtu̶gu̶u̶y jyojktu̶gu̶u̶ygyu̶xy:
—¡Yajcruutzpé̱t miich yu̶'u̶! ¡Yajcruutzpé̱t miich yu̶'u̶!
Chi je̱'e̱ Pilato ñu̶maayu̶ ajku̶xy:
—Pues yajnú̶kxku̶x y yajcruutzpe̱jtku̶x miich ajku̶xy, u̶u̶ch ka'p u̶u̶ch ni tii poky nbaady ma yu̶'u̶ju̶ñ.
7Chi je̱'e̱ judío ja'ay y'adzooy ajku̶xy:
—U̶u̶ch nmu̶dajtypyu̶ch je̱'e̱ nku'utujku̶ñ tu'ug ajku̶xy, y du'un u̶u̶ch je̱'e̱ nku'utujku̶ñ myiingu̶xy ko mu̶baad y'o'ogy, je̱' ko du'un tu̶ myu̶na'añ ko je̱'e̱ Dios y'ung'adyii.
8Ko je̱'e̱ Pilato du'un mu̶dooy, chi ni'igyu̶ chu̶gu̶u̶ybyu̶jky. 9Chi ja'adu'ook tyu̶gu̶u̶yñu̶bu̶ ma je̱'e̱ myu̶jtu̶jku̶ñ y yajtu̶u̶y je̱'e̱ Jesús:
—¿Ma miich mdzooñ?
Y je̱'e̱ Jesús ka'p je̱'e̱ ni tu'k'aa y'adzooy. 10Chi je̱'e̱ Pilato je̱'e̱ Jesús nu̶maay:
—¿Nej ka'p u̶u̶ch xy'adzowa'añu̶? ¿Nej ka'p mnejwu̶'u̶y ko u̶u̶ch je̱'e̱ ane̱'e̱mu̶ñ nmu̶u̶du̶ch neby mu̶baad nyajnajtzmadzu̶'u̶yii y nej mu̶baad nyajcruutzpedyiiju̶ñ?
11Mu̶'it je̱'e̱ Jesús y'adzooy:
—Miich ka'p u̶xyu̶py ni tii ane̱'e̱mu̶ñ mmu̶u̶du̶ch ma u̶u̶chu̶ñ, ko u̶xyu̶py je̱'e̱ Dios tu̶ xykya'amo'oy. Paadyu̶tz je̱'e̱ mu̶dyiibu̶ u̶u̶ch tu̶ xykyu̶'u̶yéky ma miichu̶ñ, jakni'igyu̶ pojkpu̶ je̱'e̱ mu̶u̶du̶ch ka'p miichu̶ñu̶ba.
12Mu̶'it je̱'e̱ Pilato winma'añ ja'a'u̶xtaaydyu̶gu̶u̶y neby je̱'e̱ Jesús najtzmadzu̶'u̶wu̶chu̶ñ; peru̶ chi je̱'e̱ judío ja'ay myu̶yaaxtu̶gu̶u̶y myu̶jojktu̶gu̶u̶yu̶ ajku̶xy:
—¡Pu̶nu̶ mnajtzmadzu̶u̶by yu̶'u̶, ka'p naty je̱'e̱ Romano mu̶j'ane̱'e̱mbu̶ mmu̶gu'ug'áty! ¡Je̱'e̱ ko pu̶n mu̶j'ane̱'e̱mbu̶'ajtp myu̶dnaymyu̶dzip'ajtu̶py je̱'e̱ mu̶j'ane̱'e̱mbu̶!
13Ko je̱'e̱ Pilato du'un mu̶dooy, mu̶'it je̱'e̱ ane̱'e̱mu̶ñ yejky ko je̱'e̱ Jesús wan yajtu̶jkpu̶dzu̶u̶mgu̶xy, y mu̶'it ñaxwech ma je̱'e̱ ku'utujktaaktu̶ñ, mu̶dyiibu̶ hebreo'eemby xu̶u̶'ajtpu̶ñ Gabata, mu̶dyiibu̶ du'un wimbu̶dzu̶u̶mbu̶ñ tu̶goot tzaawinmakxu̶'u̶ybyu̶. 14Kujkyxyu̶u̶ najty, timychonda'agaanu̶py najty je̱'e̱ Pascua xu̶u̶. Chi je̱'e̱ Pilato je̱'e̱ judío ja'ay nu̶maay ajku̶xy:
—¡Ijxku̶x, chiiju̶tz je̱'e̱ mmu̶j'ane̱'e̱mbu̶ ajku̶xy!
15Mu̶'it je̱' yaaxtu̶gu̶u̶y jyojktu̶gu̶u̶ygyu̶xy:
—¡Wan o'ogy! ¡Wan o'ogy! ¡Yajcruutzpé̱t miich yu̶'u̶!
Chi je̱'e̱ Pilato yajtu̶u̶wu̶ ajku̶xy:
—¿Nej nyajcruutzpé̱du̶byu̶ch yu̶'u̶ mmu̶j'ane̱'e̱mbu̶ ajku̶xyu̶?
Y chi je̱'e̱ teedy windzu̶ndu̶jk y'adzoogu̶xy:
—¡U̶u̶ch ka'p u̶u̶ch je̱'e̱ wiingpu̶ nmu̶j'ane̱'e̱mbu̶ ajku̶xy, je'eyu̶ je̱'e̱ Romano mu̶j'ane̱'e̱mbu̶!
16Mu̶'it je̱'e̱ Pilato je̱'e̱ Jesús yajku̶'u̶du̶gu̶u̶yu̶ ajku̶xy, ko wan yajcruutzpe̱jtku̶xnu̶. Chi yajtzóñ ajku̶xy.
Jesús yajcruutzpe̱jtu̶
(Mt 27.32-44; Mc 15.21-32; Lc 23.26-43)
17Chi je̱'e̱ Jesús yo'oychóñ; cham je̱'e̱ kyruutz kejykyapy'adyii; yajnú̶kxu̶ ma je̱'e̱ it lugaar mu̶dyiibu̶ xu̶u̶'ajtpu̶ñ “O'kpu̶ Ku'ubajk It” (o je̱'e̱ mu̶dyiibu̶ hebreo'eemby xu̶u̶'ajtpu̶ñ Gólgota). 18Jim yajcruutzpejty ajku̶xy kipxy mu̶u̶d je̱'e̱ ja'ay me̱tzk, tu'ug a'oy'eemby y ja'adu'ug anajty'eemby y je̱'e̱ Jesús kujkjooty. 19Chi je̱'e̱ Pilato ane̱'e̱mu̶ñ yejky ko je̱'e̱ leetru̶ wan jim yaj'yujkja'ay ma je̱'e̱ cruutzu̶ñ, mu̶dyiibu̶ du'un mu̶naambu̶ñ: “Jesús je̱'e̱ mu̶dyiibu̶ Nazaret kugajptu̶ñ, je̱'e̱ judío ja'ay Myu̶j'ane̱'e̱mbu̶ ajku̶xy.” 20Janch may je̱'e̱ judío ja'ay je̱'e̱ leetru̶ kápxku̶xy, je̱'e̱ mu̶dyiibu̶ najty jim yujkja'ayu̶ñ, je̱' ko kajpt mu̶wingón najty je̱'e̱ it ma je̱'e̱ Jesús yajcruutzpe̱jtu̶ju̶ñ, y je̱'e̱ leetru̶ hebreo'eemby, latin'eemby y griego'eemby najty je̱'e̱ jya'ayu̶ch. 21Paady je̱'e̱ judío teedy windzu̶ndu̶jk je̱'e̱ Pilato nu̶maaygyu̶xy:
—Ka'p du'un mja'ay: ‘Je̱'e̱ judío ja'ay Myu̶j'ane̱'e̱mbu̶ ajku̶xy’, du'un ni'igu̶ ja'aw: ‘Je̱'e̱ mu̶dyiibu̶ du'un naydyiju̶p je̱'e̱ judío ja'ay Myu̶j'ane̱'e̱mbu̶ ajku̶xy’.
22Peru̶ chi je̱'e̱ Pilato y'adzoowu̶ ajku̶xy:
—Je̱'e̱ mu̶dyiibu̶ u̶u̶ch tu̶ nja'ayu̶ñ, ka'p u̶u̶ch je̱'e̱ mu̶baad nyajtu̶gách.
23Ko je̱'e̱ tziptuumbu̶tu̶jk je̱'e̱ Jesús najty tu̶ yajcruutzpe̱jtku̶xy, chi je̱'e̱ wyit oxu̶'kku̶ ajku̶xy y yajwa'kxku̶xy mu̶daxkpu̶ky, ku̶jtu'ug. Nan y'oxu̶'kku̶x je̱'e̱ Jesús ñi'ijé̱n. Peru̶ je̱' ko ka'p najty je̱'e̱ y'axuuymyúkyu̶ch, tu'ugyu̶ je̱'e̱ najty xyúyu̶ch y janchyóñ najty, 24chi je̱'e̱ tziptuumbu̶tu̶jk ñayñu̶maayu̶gu̶xy amíñ u̶xyu̶py:
—Ka'p mu̶baad ngú̶tzu̶m ajku̶xy, tzu̶k je̱'e̱ suerte ijxu̶m ajku̶xy, a ver pu̶n da'a okje̱'e̱'ádu̶p.
Du'un je̱'e̱ du'un yajkuydyuuñ je̱'e̱ Dios ñaky, je̱'e̱ mu̶dyiibu̶ du'un mu̶naambu̶ñ: “Xyajwa'kxu̶ch je̱'e̱ nwit ajku̶xy, y syuerte ijxu̶ch je̱'e̱ nni'ijé̱n ajku̶xy.” Je̱' je̱'e̱ tziptuumbu̶tu̶jk du'un kyuydyuungu̶x.
25Jim ma je̱'e̱ Jesús kyruutz mu̶dú̶yu̶ju̶ñ jim najty je̱'e̱ tyaj tyu̶na'ay, y je̱'e̱ tyaj pyudo'oxy, y je̱'e̱ María je̱'e̱ Cleofas tyo'oxyu̶jk, y je̱'e̱ María je̱'e̱ mu̶dyiibu̶ najty Magdala kugajptu̶ñ. 26Ko je̱'e̱ Jesús tyaj ijxy, y je̱'e̱ dyiscípulo mu̶dyiibu̶ najty ni'igyu̶ chojkypy jyu̶wu̶u̶by; tyu̶na'ay ma je̱'e̱ tyaj ñamu̶jku̶ñ, chi je̱'e̱ tyaj nu̶maay:
—Mamá, yu̶'u̶ju̶tz m'ung'ajtnu̶py.
27Mu̶'it je̱'e̱ dyiscípulo nu̶maay:
—Yu̶'u̶ju̶tz mdaj'ajtnu̶py, yu̶'u̶ ndaju̶ch.
Y mu̶'ityu̶ je̱'e̱ discípulo je̱'e̱ Jesús tyaj ku'ubu̶jku̶ neby je̱'e̱ kyu̶'u̶mdaju̶ñ y ju̶u̶nmooy tu̶jkmooy ma je̱' tyu̶jku̶ñ.
Ko je̱'e̱ Jesús y'o'ky
(Mt 27.45-56; Mc 15.33-41; Lc 23.44-49)
28Ko adaa du'un tyuundaay jyajttaayu̶, je̱'e̱ Jesús ñejwu̶u̶by je̱'e̱ najty ko tu̶ najty je̱'e̱ du'un ku̶xyu̶ yajkuydyuunda'ay, y wan du'un yajkuydyúnu̶ch neby je̱'e̱ Dios ñaky myu̶na'añu̶ñ, chi myu̶naañ:
—Tu̶dzu̶u̶yu̶bu̶ch.
29Jim najty tu'tz tu'ug ujtz mu̶u̶d je̱'e̱ vinonu̶u̶ ta'ambu̶. Chi je̱'e̱ pixy tu'ktúky pama'tznajxku̶xy ma je̱'e̱ vinonu̶u̶ ta'ambu̶ju̶ñ y chi je̱'e̱ pixy kuxodzu̶u̶ygyu̶xy ma je̱'e̱ hisopo paxyu̶ñ y yajja'tku̶xy du'un ma je̱'e̱ y'awaku̶ñ. 30Jesús myuk je̱'e̱ vinonu̶u̶ ta'ambu̶, y chi myu̶naañ:
—Tu̶ je̱'e̱ du'un ku̶xyu̶ yajkuydyuunda'ay.
Chi ñaax'ijxy y y'o'knu̶.
Jesús je̱'e̱ tziptuumbu̶ tu'ug kyumyii ma je̱'e̱ kyachu̶ñ
31Je̱'e̱ xu̶u̶ najty ma je̱'e̱ Pascua xu̶u̶ najty tyimychonda'agaanu̶ju̶ñ, y je̱'e̱ judío ja'ay ajku̶xy ka'p najty je̱'e̱ du'un tzojkku̶xy ko je̱'e̱ o'ogyjya'ay ñi'kx jim cruutzkú̶xp wyu̶'u̶mgu̶xu̶ch pokxyxyu̶u̶, je̱' ko je̱'e̱ pokxyxyu̶u̶ najty mu̶k ok'amay'ajtku̶xnu̶. Paady je̱'e̱ Pilato mu̶nukxtaakku̶xy ko je̱'e̱ tziptuumbu̶tu̶jk wan ane̱'e̱mgu̶xy nu̶kxy je̱'e̱ o'ogyjya'ay tyeky tu̶ju̶ ajku̶xy, je̱'e̱ mu̶dyiibu̶ najty tu̶ yajcruutzpe̱jtku̶xyu̶ñ, neby mu̶baad pe̱'kyu̶ y'o'kku̶xyu̶ñ y yajmu̶najkku̶xu̶ch jim cruutzkú̶xp. 32Mu̶'it je̱'e̱ tziptuumbu̶tu̶jk ñú̶kxku̶xy, oy je̱'e̱ me̱tzkpu̶ ja'ay tyeky tu̶ju̶ ajku̶xy je̱'e̱ mu̶dyiibu̶ najty kipxy tu̶ yajcruutzpe̱jtku̶xyu̶ñ mu̶u̶d je̱'e̱ Jesús. 33Peru̶ ko je̱'e̱ tziptuumbu̶tu̶jk mu̶wingoongu̶xy je̱'e̱ Jesús, mu̶'it ijxku̶xy ko tu̶ najty y'o'knu̶. Paady je̱'e̱ tyeky ka'p tu̶ju̶ ajku̶xy.
34Mu̶'it je̱'e̱ tziptuumbu̶tu̶jk nidu'ugtu̶ kuumy je̱'e̱ Jesús ma je̱'e̱ kyachu̶ñ mu̶u̶d tu'ug kepyjyu̶jpxu'uñ, y mu̶'it je̱'e̱ ne'pty mu̶k'eemby pyu̶dzu̶u̶my y mu̶u̶d je̱'e̱ nu̶u̶. 35Je̱'e̱ mu̶dyiibu̶ adaa du'un mu̶dyaakpu̶ñ, je̱' je̱'e̱ nidu'ugtu̶ je̱'e̱ mu̶dyiibu̶ tu̶ ixy tu̶ tu̶kxyu̶ñ, y tu̶y'ajt je̱'e̱ du'un myu̶dya'agy, y ñejwu̶u̶by ko du'un tyu̶y'ajtu̶ch je̱'e̱ mu̶dyiibu̶ myu̶dyaakypyu̶ñ, wan du'un miich nandu'un mmu̶bu̶jkku̶xu̶ch. 36Adaa paady adaa du'un tu̶ tyuñ tu̶ jyadyii wan je̱'e̱ Dios ñaky du'un yajkuydyúnu̶ch je̱'e̱ mu̶dyiibu̶ du'un mu̶naambu̶ñ: “Ka'p je̱'e̱ wyaay pyajk ni tu'ug tyu̶jkku̶xu̶ch ajku̶xy.” 37Y nandu'un je̱'e̱ Dios ñaky wiingtuum ja'adu'k'ít myu̶na'añ: “Y'ijxku̶xu̶py je̱'e̱ ja'ay je̱'e̱ mu̶dyiibu̶ naty tu̶ kuumgu̶xyu̶ñ.”
Jesús yajnaaxtu̶gu̶u̶yu̶
(Mt 27.57-61; Mc 15.42-47; Lc 23.50-56)
38Ko adaa du'un tyuunu̶ jyajtu̶, chi je̱'e̱ José je̱'e̱ mu̶dyiibu̶ najty Arimatea kugajptu̶ñ, je̱'e̱ may'ajt oy yujkwa'añ ma je̱'e̱ Pilátoju̶ñ ko je̱'e̱ Jesús ñi'kx nu̶kxy yajtzonaanu̶ ma najty tu̶ yajcruutzpedyiiju̶ñ. Je̱'e̱ José je̱'e̱ Jesús najty y'u̶xpu̶jkpu̶du̶jk je̱'e̱ nidu'ugtu̶, peru̶ ka'p najty ijxnu̶ ke̱'e̱xnu̶ mu̶dwu̶dity, je̱' gyu̶xpu̶ ko je̱'e̱ judío ja'ay najty tzu̶gu̶u̶ygyu̶xy. Pilato kyu'ubu̶jk je̱'e̱ du'un, y chi je̱'e̱ José ñu̶kxy oy je̱'e̱ Jesús ñi'kx yajtzónu̶. 39Nan nu̶kx je̱'e̱ Nicodemo nandu'un je̱'e̱ mu̶dyiibu̶ je̱'e̱ Jesús oy tu'ook koodz mu̶dmu̶dya'agyu̶ñ, y chi je̱'e̱ perfume jim mu̶ja'ty jii da'a ipxmajk kilo, te̱e̱mwu̶díty mu̶u̶d je̱'e̱ mirra tzooy y mu̶u̶d je̱'e̱ áleo mu̶dyiibu̶ oy janch xukpu̶ñ. 40Y chi je̱'e̱ José mu̶u̶d je̱'e̱ Nicodemo je̱'e̱ Jesús ñi'kx nixaju̶u̶yu̶ ajku̶xy y mo'ongu̶xy mu̶u̶d je̱'e̱ wit je̱'e̱ mu̶dyiibu̶ najty tu̶ yajtzamu̶u̶ygyu̶xyu̶ñ mu̶u̶d je̱'e̱ perfume, du'un neby je̱'e̱ judío ja'ay kyostumbre ajku̶xyu̶ñ ko naty je̱'e̱ o'kpu̶ yajnaaxtu̶gu̶u̶ygyu̶xy. 41Je̱'e̱ it lugaar ma je̱'e̱ Jesús yajcruutzpe̱jtku̶xyu̶ñ jim najty kam tu'ug, y ma je̱'e̱ jimbu̶ kamu̶ñ, jim najty o'kpu̶ naaxtu̶gu̶u̶ydyaakt tu'ug jembyu̶ ma najty ka'p ni pu̶n ñaaxtu̶gu̶'u̶yñu̶ju̶ñ. 42Y jim je̱'e̱ Jesús yajnaaxtu̶gu̶u̶ygyu̶xy, je̱' ko wingondu̶gu̶'u̶ je̱'e̱ naaxtu̶gu̶u̶ydyaakt najty jim, y janch joottu̶góy jim yajnaaxtu̶gu̶u̶ygyu̶xy, je̱' ko je̱'e̱ judío ja'ay pyokxyxyu̶u̶ najty tyimychonda'agaangu̶xnu̶.
Currently Selected:
San Juan 19: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005