San Juan 14
14
Jesús kyu̶xpu̶ je̱'e̱ Dios Teedy yajpaady
1“Ka'p miich mdajku̶xy mmáygyu̶xy. Mmu̶bu̶jkku̶x mmu̶jpu̶daakku̶x je̱'e̱ Dios y mu̶bu̶jku̶ch mu̶jpu̶daaku̶ch u̶u̶ch nandu'un ajku̶xy.#14.1 Mmu̶bu̶jkku̶x mmu̶jpu̶daakku̶x je̱'e̱ Dios u̶u̶ch nandu'un ajku̶xy: nije̱' wiingpu̶ jaaybyu̶du̶jk myu̶naangu̶xy: miich ajku̶xy mu̶bu̶jkku̶xypy mu̶jpu̶daakku̶xypy je̱'e̱ Dios, y xymyu̶bu̶jkku̶xpu̶ch xymyu̶jpu̶daakku̶xpu̶ch miich nandu'un ajku̶xy. Y miich ajku̶xy mu̶bu̶jkku̶xypy mu̶jpu̶daakku̶xypy je̱'e̱ Dios, mu̶bu̶jku̶ch mu̶jpu̶daaku̶ch u̶u̶ch nandu'un ajku̶xy. 2Jiiby ma u̶u̶ch je̱'e̱ nDeedy chu̶na'ayu̶ñ, may je̱'e̱ tzu̶naydyaakt jiiby ma mu̶baad yajtzu̶na'ayu̶ñ, ko u̶xyu̶py du'un ka'p tyu̶y'ajtu̶ch, ka'p u̶xyu̶py du'un tu̶ nnu̶maaygyu̶xy ko u̶u̶ch je̱'e̱ tzu̶naydyaakt jiiby nu̶kxy ni'ixu̶'u̶y mu̶u̶d miich kyu̶xpu̶ ajku̶xy. 3Y ko u̶u̶ch naty tu̶ nba'ttu̶gu̶'u̶y y tu̶ ni'ixu̶'u̶yu̶ch naty je̱'e̱ tzu̶naydyaakt mu̶u̶d miich kyu̶xpu̶ ajku̶xy, mu̶'it u̶u̶ch ja'adu'ook nwimbídu̶ch y nyajnú̶kxku̶xu̶ch jiiby, wan jiiby tu'ugyu̶ n'ijtu̶mu̶ch ajku̶xy ma u̶u̶ch naty u̶u̶ch n'ida'añu̶ñ. 4Miich ajku̶xy mnejwu̶u̶ygyu̶xypy je̱'e̱ nu̶u̶ tu'u ma u̶u̶ch nnu̶kxyu̶ñ.#14.4 Miich ajku̶xy mnejwu̶u̶ygyu̶xypy ma u̶u̶ch nnu̶kxyu̶ñ: nije̱' jaaybyu̶du̶jk myu̶naangu̶xy: Miich ajku̶xy mnejwu̶u̶ygyu̶xypy ma u̶u̶ch nnu̶kxyu̶ñ y mnejwu̶u̶ygyu̶xypy je̱'e̱ nu̶u̶ tu'u.
5Chi je̱'e̱ Tomás je̱'e̱ Jesús nu̶maay:
—Windzú̶n, ka'p u̶u̶ch nnejwu̶u̶ygyu̶xy ma miich mnu̶kxyu̶ñ, ¿neby u̶u̶ch je̱'e̱ nu̶u̶ tu'u nnejwu̶u̶ygyu̶xu̶ch?
6Chi je̱'e̱ Jesús y'adzoowu̶:
—U̶u̶ch je̱'e̱ du'un neby je̱'e̱ nu̶u̶ tu'uju̶ñ, u̶u̶ch je̱'e̱ tu̶y'ajtu̶ñ nmu̶u̶d, y u̶u̶ch je̱'e̱ jugy'ajtu̶ñ wiinu̶u̶xu̶u̶bu̶ nyejkypy. Mu̶u̶d u̶u̶ch kyu̶xpu̶ je̱'e̱ Dios Teedy yajpaady. 7Pu̶nu̶ xy'ixy'ajtpu̶ch miich ajku̶xy, nan xy'ixy'ajttu̶'ku̶byu̶ch je̱'e̱ nDeedy ajku̶xy, y m'ixy'ajtypyu̶n je̱'e̱ cham ajku̶xyu̶ñ, je̱' ko je'emy je̱'e̱ mja'a'ijxku̶xy.
8Mu̶'it je̱'e̱ Felipe nu̶maay je̱'e̱ Jesús:
—Windzú̶n, ok'yaj'ijxku̶ch je̱'e̱ mDeedy ajku̶xy, y mu̶'it u̶u̶ch jootkujk mwu̶'u̶mu̶u̶ygyu̶xu̶ch.
9Chi je̱'e̱ Jesús je̱'e̱ Felipe adzooy:
—Felipe, jékyu̶p miich nja'atu̶gu̶'u̶ymyu̶d'ijtku̶xpu̶, ¿y nej ka'anu̶ u̶u̶ch xy'ijxwu̶'u̶myñu̶? Pu̶n u̶u̶ch xy'ijxpu̶ñ, nan y'ijxypy je̱'e̱ Dios Teedy nandu'un, ¿y ti u̶u̶ch ko du'un xyñu̶ma'ay ko je̱'e̱ Dios Teedy nyaj'ijxku̶xu̶ch? 10¿Nej ka'p mmu̶bu̶ky ko u̶u̶ch je̱'e̱ Dios Teedy mu̶u̶d n'ity y je̱'e̱ Dios Teedy ijtp mu̶u̶d u̶u̶ch? Je̱'e̱ ayuuk mu̶dyiibu̶ nyajnu̶maaygyu̶xypyu̶ñ, ka'p du'un u̶u̶ch ku̶'u̶mjoot ku̶'u̶mwinma'añ mu̶naamb. Je̱'e̱ Dios Teedy je̱'e̱ mu̶dyiibu̶ ijtp mu̶u̶d u̶u̶ch, je̱' je̱'e̱ tyuung du'un tuumb. 11Mu̶bu̶jku̶gyu̶ch je̱'e̱ ni'ayuuk ajku̶xy ko u̶u̶ch je̱'e̱ Dios Teedy mu̶u̶d n'ity y je̱'e̱ Dios Teedy ijtp mu̶u̶d u̶u̶ch, y pu̶nu̶ ka'p mmu̶bu̶gaangu̶xy; oydyu̶'ajty u̶xyu̶py je'eyu̶ m'okmu̶bu̶jkku̶xnu̶ mu̶u̶d je̱'e̱ mu̶jwinma'añ mu̶dyiibu̶ u̶u̶ch nduumbyu̶ñ. 12Janch tu̶y'ajtu̶ñ du'un nnu̶maaygyu̶xy ko pu̶n u̶u̶ch je̱'e̱ n'ayuuk xymyu̶bu̶jku̶byu̶ñ nan tyúnu̶py je̱'e̱ mu̶jwinma'añ nandu'un je̱'e̱ mu̶dyiibu̶ u̶u̶ch nduumbyu̶ñ, y ni'igu̶ mu̶jpu̶ mu̶jwinma'añ je̱'e̱ ni'igyu̶ tyúnu̶py, je̱' ko nnu̶kxaanu̶byu̶ch jiiby ma je̱'e̱ Dios Teedyu̶ñ. 13Y ku̶xyu̶ tijaty naty miich myujkwaangu̶xypyu̶ñ ma je̱'e̱ Dios Teedyu̶ñ; cham u̶u̶ch je̱'e̱ nxu̶u̶ xykyapxpaattu̶ ajku̶xy, nguydyúnu̶byu̶ch je̱'e̱ du'un; wan je̱'e̱ Dios Teedy y'oy'ajt myu̶k'ajtu̶ñ du'un yajni'igu̶xu̶'u̶gu̶ch mu̶u̶d je̱'e̱ y'Ung kyu̶xpu̶. 14U̶u̶ch ndúnu̶byu̶ch wan timytyiiju̶ch tii u̶u̶ch naty miich xyujkwaanu̶u̶ygyu̶xpu̶ñ; cham u̶u̶ch je̱'e̱ nxu̶u̶ xykyapxpaattu̶ ajku̶xy.
Jesús myu̶na'añ ko je̱'e̱ Espíritu Santo ke̱xaanu̶
15“Pu̶nu̶ xychojkpu̶ch miich ajku̶xy, xykyuydyuunu̶byu̶ch je̱'e̱ n'ane̱'e̱mu̶ñ ajku̶xy. 16Y u̶u̶ch je̱'e̱ Dios Teedy nu̶ma'awu̶py ko je̱'e̱ Yajjootkujk'ajtpu̶ je̱'e̱ Espíritu tu̶y'ajt mu̶u̶dpu̶ wan ja'adu'ug xyajnigue̱jxku̶xy, wan wiinu̶u̶xu̶u̶ xymyu̶d'ijtku̶xu̶ch. 17Je̱'e̱ Espíritu tu̶y'ajtmu̶u̶dpu̶, ka'p je̱'e̱ naaxwiiñjya'ay adu̶gu̶'u̶ joottu̶gu̶'u̶wa'añ, je̱' ko ka'p je̱'e̱ ijxku̶xyñu̶ nan ka'p ixy'ajtku̶xy, peru̶ miich m'ixy'ajtku̶xypy je̱', je̱' ko je̱' yajpaatp ma miich ajku̶xyu̶ñ y ijtu̶wu̶p je̱' ma je̱'e̱ mjoot mwinma'añ ajku̶xyu̶ñ.
18“Ka'p miich naydyu'um nyajwu̶'u̶maangu̶xy, wimbijttu̶gatzaambu̶ch ja'adu'ook ma miich ajku̶xyu̶ñ. 19Tzojku̶ch je̱'e̱ naaxwiiñjya'ay xyjyak'ijxku̶xu̶ch, y ka'p u̶u̶ch mu̶naa xy'ok'ijxku̶xnu̶ch, peru̶ miich xy'ijxku̶xu̶bu̶ch miich, y mjugy'ajtku̶xu̶p wiinu̶u̶xu̶u̶ je̱' ko wiinu̶u̶xu̶u̶ u̶u̶ch njugy'aty. 20Jiinu̶ miich mwinju̶wu̶u̶ygyu̶xu̶ch ko u̶u̶ch nyajpaady ma u̶u̶ch je̱'e̱ nDeedyu̶ñ, y miich yajpaatku̶xp ma u̶u̶chu̶ñ, y u̶u̶ch ma miich ajku̶xyu̶ñ. 21Pu̶n u̶u̶ch je̱'e̱ n'ane̱'e̱mu̶ñ xykyu'ubu̶jku̶byu̶ñ y xykyuydyuunu̶byu̶ñ, yajni'igu̶xu̶'kku̶xypy je̱'e̱ du'un ko u̶u̶ch jaanch xychojkku̶xy. Y tzogu̶u̶ju̶bu̶ch je̱'e̱ nDeedy je̱'e̱ mu̶dyiibu̶ u̶u̶ch naty xychojkpu̶ñ, y ndzógu̶byu̶ch je̱'e̱ u̶u̶ch nandu'un y nnayyajni'igu̶xu̶'u̶gu̶u̶ju̶bu̶ch ma je̱' ajku̶xyu̶ñ.
22Chi je̱'e̱ Judas (ka'p jye̱'e̱ju̶ch je̱'e̱ Iscariote) je̱'e̱ Jesús yajtu̶u̶y:
—Windzú̶n, ¿ti ko mnayyajni'igu̶xu̶'u̶ga'añyii ma u̶u̶ch je'eyu̶ ajku̶xyu̶ñ y ka'p mnayyajni'igu̶xu̶'u̶ga'añyii ma je̱'e̱ naaxwiiñjya'ay ajku̶xyu̶ñ?
23Chi je̱'e̱ Jesús y'adzoowu̶:
—Pu̶n u̶u̶ch xychojkpu̶ñ, xykyuydyuunu̶byu̶ch je̱'e̱ n'ayuuk ndu̶y'ajt, tzogu̶u̶ju̶bu̶ch je̱'e̱ nDeedy, y je̱'e̱ nDeedyu̶ch y u̶u̶ch miingu̶xu̶bu̶ch tzu̶naaybyu̶ ma je̱'e̱ jyoot wyinma'añ ajku̶xyu̶ñ. 24Pu̶n u̶u̶ch ka'p xychokyu̶ñ, ka'p u̶u̶ch je̱'e̱ n'ayuuk ndu̶y'ajt xykyweentu̶tuunu̶. Adaa ayuuk tu̶y'ajt je̱'e̱ mu̶dyiibu̶ miich yam m'amdo'ijtku̶xypyu̶ñ, ka'p adaa u̶u̶ch ngu̶'u̶m'ayuuk; je̱'e̱ nDeedyu̶ch adaa y'ayuuk tyu̶y'ajt, je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ.
25“Cham adaa du'un ku̶xyu̶ nyajmu̶dmu̶dyaakku̶xy ma u̶u̶ch yam nyajpaatyñu̶ju̶ñ mu̶u̶d miich ajku̶xy, 26peru̶ je̱'e̱ Espíritu Santo, je̱'e̱ Yajjootkujk'ajtpu̶ mu̶dyiibu̶ je̱'e̱ Dios Teedy kye̱xe̱e̱mby ma miich ajku̶xyu̶ñ, je̱'e̱ mu̶dyiibu̶ u̶u̶ch xykyudu̶na'awaambu̶ñ, je̱' ku̶xyu̶ xyajni'ixu̶ydya'awu̶p ajku̶xy y xyajja'aymye̱jtzpaatku̶xu̶ch ku̶xyu̶ neby tu̶ nnu̶maaygyu̶xyu̶ñ.
27“Jootkujk nyajwu̶'u̶mgu̶xy. Nmooygyu̶xypy je̱'e̱ jootkujk'ajtu̶ñ, peru̶ ka'p u̶u̶ch je̱'e̱ jootkujk'ajtu̶ñ du'un nyeky neby je̱'e̱ mu̶dyiibu̶ ya naaxwiiñ yajpaatpu̶ñ. Ka'p mdajku̶xy mmaaygyu̶xy y nan ka'p mdzu̶gu̶u̶ygyu̶xy. 28Tu̶ mmu̶doogu̶xy ko du'un tu̶ nnu̶maaygyu̶xy ko u̶u̶ch nnu̶kxa'añ y ko u̶u̶ch nwinbijtu̶gatza'añ y nmu̶d'idaangu̶xnu̶ba miich ja'adu'ook ajku̶xy. Ko u̶u̶ch u̶xyu̶py jaanch xy'oktzojkku̶xy, tu̶ u̶xyu̶py mjootkugu̶u̶ygyu̶xy ko u̶u̶ch du'un tu̶ nmu̶na'añ ko u̶u̶ch nnu̶kxa'añ ma je̱'e̱ Dios Teedyu̶ñ, je̱' ko je̱' ni'igyu̶ mu̶j, y ka'p u̶u̶chu̶ñu̶ba. 29Cham du'un pa'tykyu̶ nnu̶maaygyu̶xy, y ko naty adaa du'un tyuñyii jyadyii, mu̶'íttu̶tz mmu̶bu̶jkku̶xu̶ch neby tu̶ nnu̶maaygyu̶xyu̶ñ.
30“Ka'p u̶u̶ch miich jeky n'okmu̶dmu̶dya'agaanu̶ ajku̶xy, je̱' ko jii je̱'e̱ mu̶jku'u myiinu̶ je̱'e̱ mu̶dyiibu̶ ya ane̱'e̱mb ma adayaaba naaxwiiñu̶ñ. Peru̶ ka'p mu̶k'ajtu̶ñ je̱'e̱ mu̶u̶du̶ch mu̶u̶d u̶u̶ch. 31Peru̶ nguydyúnu̶byu̶ch je̱'e̱ du'un neby u̶u̶ch je̱'e̱ Dios Teedy tu̶ xy'ane'emyu̶ñ, wan je̱'e̱ naaxwiiñjya'ay du'un nejwu̶u̶ygyu̶xu̶ch ko u̶u̶ch je̱'e̱ Dios Teedy ndzoky.
“Pu̶du̶'kku̶x. Tzu̶k ya tzónu̶m ajku̶xy.”
Currently Selected:
San Juan 14: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005