2 Juan 1
1
Je̱'e̱ tu̶y'ajt y je̱'e̱ tzojk ju̶wu̶u̶yu̶ñ
1U̶u̶ch Juan, je̱'e̱ mu̶dyiibu̶ je̱'e̱ Dios jya'ay nigu'ubajk'ajtpu̶ñ, cham adaa naky nyajnijayu̶u̶ygyu̶xy miich mu̶bu̶jkpu̶du̶jk mu̶dyiibu̶ je̱'e̱ Dios tu̶ wyin'ijxu̶gu̶xyu̶ñ y je̱'e̱ mu̶dyiibu̶ tu'ugyu̶ yajpaatku̶xpu̶ñ mu̶u̶d miich ajku̶xy, je̱'e̱ mu̶dyiibu̶ du'un neby tu'ug to'oxyu̶jk y mu̶u̶d je̱'e̱ y'ung y'ana'k ajku̶xy je̱'e̱ mu̶dyiibu̶ u̶u̶ch jaanch ndzojkku̶xypy nju̶wu̶u̶ygyu̶xypy nan chojkku̶xp xyjyu̶wu̶u̶ygyu̶xp je̱'e̱ nandu'un nigu̶xyu̶ mu̶dyiibu̶ je̱'e̱ tu̶y'ajt tu̶ mu̶bu̶jkku̶xyu̶ñ. 2Ndzojkku̶xypy nju̶wu̶u̶ygyu̶xypy miich je̱' ko u̶u̶ch je̱'e̱ tu̶y'ajt nmu̶dajtku̶xy ma u̶u̶ch je̱'e̱ njoot nwinma'añ ajku̶xyu̶ñ y ídu̶p je̱'e̱ wiinu̶u̶xu̶u̶ ma u̶u̶ch ajku̶xyu̶ñ. 3Wan je̱'e̱ Dios Teedy y je̱'e̱ Jesucristo, je̱'e̱ Dios Teedy y'Ung oy'ajt may'ajt tuñ ma miich ajku̶xyu̶ñ y xymyooygyu̶xu̶ch je̱'e̱ pa'a''ayoowu̶ñ, y je̱'e̱ jootkujk'ajtu̶ñ tu̶ybyu̶ jaanchpyu̶ y je̱'e̱ tzojku̶ñ ju̶wu̶u̶yu̶ñ tu̶ybyu̶ jaanchpyu̶.
4Tu̶ u̶u̶ch mu̶j njootkugu̶'u̶y ko u̶u̶ch nije̱' tu̶ nbaatku̶xy, je̱'e̱ mu̶dyiibu̶ du'un neby je̱'e̱ m'ung m'ana'k ajku̶xyu̶ñ, je̱'e̱ mu̶dyiibu̶ tu'ugyu̶ yajpaatku̶xpu̶ñ mu̶u̶d miich ajku̶xy; chu̶naay jyugy'ajtku̶xy y kuydyuungu̶xy du'un neby je̱'e̱ tu̶y'ajt y'ane'emyu̶ñ, du'un neby je̱'e̱ Dios Teedy tu̶ xy'ane̱'e̱mu̶mu̶ñ ajku̶xy. 5Jada'achám nmu̶nukxtaakku̶xy mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ko amíñ u̶xyu̶py nnaychojk nnayjyu̶wu̶u̶yu̶mu̶ch ajku̶xy. Adaa mu̶dyiibu̶ yam nyajnijayu̶u̶ygyu̶xypyu̶ñ ka'p adaa jyembyu̶ ane̱'e̱mu̶ch, je̱'e̱ ane̱'e̱mu̶ñ adaa mu̶dyiibu̶ je'emy nmu̶dajtu̶mbyu̶ñ ajku̶xy ko je̱'e̱ Jesucristo aga'an nmu̶bu̶jktzónu̶m ajku̶xy. 6Je̱'e̱ naychojk nayjyu̶wu̶u̶yu̶ñ je̱' je̱' ndzu̶naay njugy'ajtu̶mu̶ch cham je̱'e̱ Dios y'ane̱'e̱mu̶ñ naty nguydyuunu̶m ajku̶xy, y je̱'e̱ Dios y'ane̱'e̱mu̶ñ du'un neby miich mmu̶doogu̶xyu̶ñ ko je̱'e̱ ayuuk tu̶y'ajt aga'an mmu̶bu̶jktzóngu̶xy; je̱' ko cham amíñ u̶xyu̶py mnaychojk mnayjyu̶wu̶u̶yu̶gu̶xy.
Je̱'e̱ anu̶u̶'ajtpu̶du̶jk ajku̶xy
7May je̱'e̱ win'u̶u̶nbu̶du̶jk ya naaxwiiñ wyu̶dijtku̶xy, je̱'e̱ mu̶dyiibu̶ ka'p ku'ubu̶jkku̶xy ko je̱'e̱ Jesucristo ya naaxwiiñ y'ooy neby je̱'e̱ ja'ayu̶ñ. Je̱'e̱ mu̶dyiibu̶ du'un adu̶u̶tzpu̶ñ, je̱'e̱ anu̶u̶'ajtpu̶ je̱' y Cristo myu̶dzip je̱'. 8Naygyweentu̶'ajtu̶gu̶x miich, ka'pu̶ je̱'e̱ m'u̶xpu̶jku̶ñ myajtu̶gooygyu̶xu̶ch mu̶dyiibu̶ tu̶ mjajtku̶xy m'abu̶jkku̶xyu̶ñ, wan je̱'e̱ Dios ka'pxy xymyooygyu̶xu̶ch mu̶dyiibu̶ xypyaatku̶xpu̶ñ.
9Wanpú̶nu̶ch pu̶n anaxy yajni'igyu̶ju̶u̶by neby je̱'e̱ Cristo yaj'u̶xpu̶jkyu̶ñ, ka'p je̱'e̱ Dios myu̶d'idyii. Peru̶ pu̶n je̱'e̱ du'umbu̶ u̶xpu̶jku̶ñ kuydyuumbu̶ñ, mu̶d'ijtu̶p Dios Teedy je̱' y je̱'e̱ Dios Ung nandu'un. 10Pu̶nu̶ jii pu̶n nije̱' ku'ijx mu̶gapxpu̶ ñu̶kxy ma je̱'e̱ mju̶u̶n mdu̶jk miich ajku̶xyu̶ñ y pu̶nu̶ ka'p je̱'e̱ Cristo y'u̶xpu̶jku̶ñ mu̶dajtu̶yu̶, ka'p myajju̶u̶ndu̶gu̶u̶y myajtu̶jktu̶gu̶u̶ygyu̶xu̶ch y ni mga'ayajpókxku̶xu̶ch; 11je̱' ko pu̶n je̱'e̱ du'umbu̶ ja'ay yajpókxp tu'ugyu̶ naty je̱'e̱ du'un ñaybyaattu̶gu̶xy mu̶u̶d je̱'e̱ du'umbu̶ u̶xpu̶jku̶ñ, mu̶dyiibu̶ ka'p tyu̶y'ajtu̶chu̶ñ.
Je̱' ayuuk mu̶dyiibu̶ ku̶jxp maayñu̶byu̶ñ
12May u̶u̶ch je̱'e̱ ayuuk nmu̶u̶du̶ch mu̶dyiibu̶ miich nja'ayajmu̶dmu̶dya'agaangu̶xypyu̶ñ, peru̶ ka'p naky'aam nyajnijayu̶'u̶waangu̶xy, ndimyñinu̶kxaangu̶xypy ku̶'u̶m nu̶kxy ngu'ix nmu̶gapxaangu̶xy y nmu̶dmu̶dya'agaangu̶xy miich wiinu̶ ju̶jpu̶, wan du'un njootkugu̶u̶yu̶mu̶ch ajku̶xy.
13Cham je̱'e̱ mu̶bu̶jkpu̶du̶jk miich mmu̶gu'ugtu̶jk yajpókxu̶ñ xyajnigue̱jxku̶xy, je̱'e̱ mu̶dyiibu̶ je̱'e̱ Dios nandu'un tu̶ wyin'ijxu̶gu̶xyu̶ñ, je̱'e̱ mu̶dyiibu̶ du'un neby je̱'e̱ mdzu̶'u̶ y'ung y'ana'k ajku̶xyu̶ñ.
Currently Selected:
2 Juan 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005