2 Corintios 11
11
Pablo mu̶u̶d je̱'e̱ apóstoles anu̶u̶játypyu̶ ajku̶xy
1Mu̶me̱kxtujku̶ch miich ajku̶xy ko u̶u̶ch du'un we̱e̱nu̶ ndzuumu̶dya'agy nbojmu̶dya'agy. Wan nejpyu̶ch, peru̶ mu̶me̱kxtujku̶ch ajku̶xy. 2Du'un neby miich ndzojkku̶xy nju̶wu̶u̶ygyu̶xyu̶ñ, je̱'e̱ Dios u̶u̶ch je̱'e̱ tzojku̶ñ ju̶wu̶u̶yu̶ñ du'un tu̶ xymyo'oy ko miich du'un ndzojkku̶x nju̶wu̶u̶ygyu̶xu̶ch. U̶u̶ch je̱' miich nyajmu̶dzojkku̶xypy ko je̱'e̱ Cristo je'eyu̶ mdzojkku̶x mju̶wu̶u̶ygyu̶xu̶ch, du'un neby je̱'e̱ to'oxy'ana'k tu'ug ñay'amay'adyiiju̶ñ ma je̱'e̱ ya'aydyu̶jk mu̶dyiibu̶ je̱' chojkypy jyu̶wu̶u̶ybyu̶ñ je̱'e̱ mu̶dyiibu̶ pu̶gaanu̶bu̶ñ, wa'adz miich jiiby ngapxku̶xu̶'u̶gaangu̶xy ma je̱'e̱ Crístoju̶ñ, du'un neby tu'ug to'oxy'ana'k mu̶dyiibu̶ ka'p ya'aydyu̶jk mu̶dtzu̶na'ayñu̶ju̶ñ. 3Peru̶ tzu̶gu̶u̶ybyu̶ch ko miich du'un myajwin'u̶u̶ngu̶xu̶ch neby je̱'e̱ Eva je̱'e̱ serpiente wyin'u̶u̶nu̶ju̶ñ mu̶u̶d je̱'e̱ ayuuk mu̶dyiibu̶ janch oymyu̶bu̶jknu̶ju̶ñ, y nu̶kxy je̱'e̱ mwinma'añ myajtu̶gajtzku̶xy m'u̶xmajtzku̶xu̶ch neby je̱'e̱ Cristo naty oy wa'adz y tu̶y tu'uda'agy mmu̶jpu̶daakku̶xyu̶ñ. 4Miich pe̱kyu̶ miich je̱'e̱ wiingpu̶ ja'ay myu̶dya'agy xi'ig xon mgu'ubu̶jku̶ ajku̶xy ko je̱'e̱ wiingpu̶ Jesús myu̶dya'agy xyajmu̶dmu̶dyaaku̶ ajku̶xy y ni'igu̶ ka'p je̱'e̱ mu̶dyiibu̶ miich tu̶ nyajmu̶dmu̶dyaakku̶xyu̶ñ; y nan oy yajxón miich je̱'e̱ wiingpu̶ espíritu mgu'ubu̶jkku̶xy y ni'igu̶ ka'p je̱'e̱ Espíritu Santo mu̶dyiibu̶ jayu̶jp'ajt mgu'ubu̶jkku̶xu̶ñ, y nan oy yajxón miich je̱'e̱ wiingpu̶ ayuuk tu̶y'ajt mgu'ubu̶jkku̶xy, y ni'igu̶ ka'p je̱'e̱ jaanchpyu̶ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ mu̶dyiibu̶ jayu̶jp'ajt mgu'ubu̶jkku̶xu̶ñ. 5U̶u̶ch ka'p u̶u̶ch nidu'uñdyu̶ abexy nnayjyu̶wu̶'u̶yii mu̶u̶d je̱'e̱ mu̶dyiibu̶ apóstolestu̶jk ja'anaydyiju̶gu̶xpu̶ñ je̱'e̱ mu̶dyiibu̶ miich je̱'e̱ myu̶dya'agy mbanú̶kxu̶yu̶gu̶xypyu̶ñ. 6Oy u̶u̶ch je̱'e̱ ngapxy myu̶dya'agy oy kya'awimbu̶dzú̶my ko u̶u̶ch ngapxy nmu̶dya'agy, peru̶ ka'p u̶u̶ch je̱'e̱ tu̶y'ajt naty nga'anejwu̶u̶by, wa'adzu̶ u̶u̶ch je̱'e̱ tu̶y'ajt nnejwu̶ydya'ay; y tu̶ miich adaa du'un nyaj'ijxku̶xy neby u̶u̶ch ku̶xyu̶ tii tu̶ nduun tu̶ n'ijxku̶xyu̶ñ ma miich ajku̶xyu̶ñ.
7¿Nej tuundu̶gooyu̶ch da'a du'un ko u̶u̶ch je̱'e̱ ayuuk tu̶y'ajt tu̶ ngapxwa'kxy ma miich ajku̶xyu̶ñ je̱'e̱ mu̶dyiibu̶ aanu̶mu̶ ni'idzooku̶ñ ye̱jkpu̶ñ ko ka'p nidu'uñdyu̶ nyajjuuygyu̶xy, nnaybyu̶daaku̶ch yuung naaxypy neby miich myajku'umaaygyu̶xu̶chu̶ñ? 8Je̱'e̱ wiingpu̶ mu̶bu̶jkpu̶du̶jk u̶u̶ch je̱'e̱ myeeñ ngu'ubu̶jku̶ ajku̶xy ko u̶u̶ch xymyu̶juuygyu̶xy neby u̶u̶ch je̱'e̱ ayuuk tu̶y'ajt jim mu̶baad ngapxwa'kxku̶xyu̶ñ ma miich ajku̶xyu̶ñ. 9Y ko u̶u̶ch najty jim nyajpaady ma miich ajku̶xyu̶ñ ko u̶u̶ch ku̶xyu̶ tii nyajmayjyajty, ni pu̶n u̶u̶ch nga'a''adzijpy nga'a''abejty. Je̱'e̱ mu̶bu̶jkpu̶du̶jk u̶u̶ch xymyooygyu̶x ku̶xyu̶ tii u̶u̶ch najty nyajmayjyajtypyu̶ñ je̱'e̱ mu̶dyiibu̶ jim Macedonia tzóngu̶xu̶ñ. Ka'p miich n'adzijpy n'abejty ajku̶xy, y du'un u̶u̶ch njaktuun'adu̶'u̶dza'añ neby u̶u̶ch tu̶ nduñu̶ñ ma miich ajku̶xyu̶ñ. 10Nmu̶u̶du̶ch je̱'e̱ tu̶y'ajt ko nnejwu̶u̶ybyu̶ch je̱'e̱ Cristo tyu̶y'ajt, y ni tu'ug u̶u̶ch je̱'e̱ Acaya naaxjootypyu̶ ja'ay nxondaaku̶ñ xykya'apu̶jku̶yu̶ch neby u̶u̶ch nxonda'agyu̶ñ. 11¿Ti u̶u̶ch da'a ko du'un nmu̶na'añ? ¿Nej paady u̶u̶ch da'a du'un nmu̶na'añ ko ka'p ndzojkku̶xy nju̶wu̶u̶ygyu̶xy? ¡Dios ijx nejwu̶u̶by ko miich ndzojkku̶xy nju̶wu̶u̶ygyu̶xy!
12Peru̶ nyajtu'uyo'oy'adu̶'u̶dze̱e̱mbyu̶ch je̱'e̱ nduung neby u̶u̶ch je'emy nduñu̶ñ, ka'pu̶ je̱'e̱ jye̱' mu̶bu̶dzu̶u̶mgu̶xu̶ch je̱'e̱ mu̶dyiibu̶ du'un anu̶u̶'ajtku̶xpu̶ñ neby je̱'e̱ xondaaku̶ñ du'un nandu'un padaangu̶xyu̶ñ neby u̶u̶ch ajtu̶m ajku̶xyu̶ñ; 13je̱'e̱ apóstolestu̶jk je̱'e̱ ajku̶xy je̱'e̱ ka'pu̶ tyu'uda'agyu̶ch ajku̶xy y win'u̶u̶nbu̶du̶jk; ñayyajnajxu̶gu̶xy neby je̱'e̱ Cristo y'apóstolestu̶jk ajku̶xyu̶ñ. 14Y adaa, ka'p adaa y'oyyajnú̶kx y'oyyajju̶wu̶u̶yñu̶ch, je̱' ko nandu'un je̱'e̱ mu̶jku'u ku̶'u̶m ñayyajnaxyii neby je̱'e̱ Dios y'ángel y'adu̶kxy y'ajajyu̶ñ; 15paady je̱'e̱ mu̶jku'u tyuumbu̶du̶jk nandu'un ñayyajnajxu̶gu̶xy neby je̱'e̱ ja'ay mu̶dyiibu̶ je̱'e̱ oybyu̶ tuungu̶xpu̶ñ. ¡Peru̶ kyumu̶doogu̶xu̶py je̱' neby pyadyii neby wyinmachiiju̶ñ ajku̶xy!
Je̱'e̱ tzaachpyu̶ ayo'on mu̶dyiibu̶ je̱'e̱ Pablo myu̶najxypy kyu'ubu̶jkypyu̶ñ ko y'apóstol'aty
16Cham ja'adu'ook nnu̶maaygyu̶xnu̶ba ko ka'p ni pu̶n myu̶na'anu̶ch ko u̶u̶ch nlooku̶ju̶ch; peru̶ pu̶nu̶ du'un mmu̶naangu̶xy, oktuungu̶x je̱'e̱ may'ajt u̶u̶ch je̱'e̱ n'ayuuk ok'amdo'ijtu̶ky ajku̶xy, wan n'okmu̶dkapx n'okmu̶dmu̶dyaakku̶xu̶ch neby tu'ug looku̶ju̶ñ, neby u̶u̶ch mu̶baad nandu'un we̱e̱nu̶ nnaygyu'umayiiju̶ñ, 17oy je̱'e̱ Windzú̶n du'un ka'aku'umáy ko u̶u̶ch nnaygyu'umayu̶u̶ju̶ch, peru̶ je̱'e̱ naygyu'umayiibyu̶ u̶u̶ch du'un xyajkápxp xyajmu̶dyaakp neby je̱'e̱ ja'ay looku̶bu̶ju̶ñ. 18¡Je̱'e̱ ko jii je̱'e̱ ja'ay may mu̶dyiibu̶ ku̶'u̶m naygyu'umaayu̶gu̶xpu̶ñ mu̶u̶d je̱'e̱ mu̶dyiibu̶ tu̶ tuungu̶xy ijxku̶xy mu̶u̶d je̱'e̱ kyu̶'u̶mmu̶k'ajt, y paady u̶u̶ch nandu'un nnaygyu'umayii! 19Miich janch wijy kejy miich mnayjyu̶wu̶u̶yu̶gu̶xy, peru̶ mgu'ubu̶jku̶py je̱'e̱ looku̶ja'ay y'ayuuk oy yajxón ajku̶xy, 20y mgu'ubu̶jkku̶xypy je̱'e̱ du'umbu̶ ja'ay nandu'un je̱'e̱ mu̶dyiibu̶ xytyuumbu̶'ajtku̶xpu̶ñ, je̱'e̱ mu̶dyiibu̶ ku̶xyu̶ tii xypyu̶jku̶byu̶ñ ajku̶xy, je̱'e̱ mu̶dyiibu̶ xywyin'u̶u̶ngu̶xpu̶ñ, je̱'e̱ mu̶dyiibu̶ xykya'amu̶j'ijxp xykya'amu̶jpu̶daakku̶xpu̶ñ, o je̱'e̱ mu̶dyiibu̶ xywyingojxp xyjyu̶jpkojxku̶xpu̶ñ. 21Ja'atzo'oydyuumbu̶ch du'un ko u̶u̶ch du'un nmu̶na'añ, ¡yuung naaxypy u̶u̶ch tu̶ nja'ay'ajtku̶xy ma miich ajku̶xyu̶ñ, ka'p u̶u̶ch je̱'e̱ njoot du'un tu̶ myu̶k'ajtku̶xy ko miich du'un nduungu̶xu̶ch neby je̱'e̱ wiingpu̶ ja'ay tu̶ xytyuungu̶xyu̶ñ!
Peru̶ pu̶nu̶ naygyu'umaayu̶p je̱'e̱ wiingpu̶ ja'ay ajku̶xy, nan naygyu'umayu̶u̶wu̶bu̶ch u̶u̶ch nandu'un, oy u̶xyu̶py du'un jya'aku̶xu̶'kpu̶ neby u̶u̶ch looku̶bu̶ju̶ñ. 22Pu̶nu̶ hebreo ja'ay yu̶'u̶ ajku̶xy, nan hebreo ja'ay u̶u̶ch nandu'un. Pu̶nu̶ Israel ja'ay yu̶'u̶ ajku̶xy, nan Israel ja'ay u̶u̶ch nandu'un. Pu̶nu̶ Abraham yu̶'u̶ myu̶j'áp myu̶jteedy'ajtku̶xypy, nan Abraham u̶u̶ch nandu'un nmu̶j'áp nmu̶jteedy'ajtypy. 23Pu̶nu̶ myu̶duungu̶xypy je̱'e̱ Cristo, u̶u̶ch je̱'e̱ Cristo ni'igyu̶ nmu̶duumby ka'p je̱' ajku̶xyñu̶ba, oy adaa du'un jya'ayajmu̶dóy neby u̶u̶ch looku̶bu̶ju̶ñ ko u̶u̶ch du'un ngapxy nmu̶dya'agy. U̶u̶ch ni'igyu̶ tu̶ nduñ ma je̱'e̱ Cristo tyuungu̶ñ ni'igu̶ ka'p je̱' ajku̶xyñu̶ba, may'ook u̶u̶ch ni'igyu̶ tu̶ nyajtzúmy nyajmách y ka'p je̱' ajku̶xyñu̶ba, ni'igyu̶ u̶u̶ch tu̶ nyajwópy nyajka'ach ka'p je̱' ajku̶xyñu̶ba, y may'ook u̶u̶ch o'kju̶jp'aam tu̶ nyajpaady. 24Mu̶gooxk'ook u̶u̶ch je̱'e̱ judío ja'ay xychachtyuungu̶xy xywyojpku̶xyu̶ch ipxmajkmokxmu̶daaxk ku̶'u̶. 25Tu̶gu̶u̶g'ook u̶u̶ch xywyojpku̶xy mu̶u̶d je̱'e̱ paxy y tu'u'ook u̶u̶ch xykya'tzku̶xy mu̶u̶d je̱'e̱ tzaa. Tu̶gu̶u̶g'ook je̱'e̱ barco kyiiñ mejykyujk je̱'e̱ mu̶dyiibu̶ u̶u̶ch naty nyajnu̶kxu̶u̶ybyu̶ñ, y ja'awe̱e̱n u̶u̶ch nga'anu̶u̶'o'ky, tu'kxu̶u̶ tu'ktzuum u̶u̶ch mejyjyooty nyajpaaty. 26May'ook u̶u̶ch ju̶gue̱m tu̶ nwu̶dity, y o'kju̶jp'aam u̶u̶ch tu̶ nyajpaady ma je̱'e̱ mu̶jnu̶u̶ju̶ñ, o'kju̶jp'aam ma je̱'e̱ me̱e̱tzpu̶du̶jk ajku̶xyu̶ñ, y o'kju̶jp'aam ma u̶u̶ch je̱'e̱ nmu̶gugajpu̶du̶jku̶ñ y ma u̶u̶ch je̱'e̱ ka'pu̶ nmu̶gugajpu̶du̶jku̶chu̶ñ. Nan tu̶ u̶u̶ch o'kju̶jp'aam nyajpaady ma je̱'e̱ mu̶jkajptu̶ñ, yuugjooty e̱e̱myjyooty y mejyjyooty, y o'kju̶jp'aam ma je̱'e̱ mu̶bu̶jkpu̶du̶jk mu̶dyiibu̶ ka'p tu̶y tu'uda'agy mu̶bu̶jkku̶xyu̶ñ. 27Tu̶ u̶u̶ch je̱'e̱ tuung mu̶k nmu̶naxy ngu'ubú̶ky y tu̶ u̶u̶ch je̱'e̱ ayo'on nmu̶naxy ngu'ubú̶ky; may'ook u̶u̶ch tzuum tu̶ nga'ama'ay nga'apókxy; tu̶ u̶u̶ch je̱'e̱ yuu xu̶u̶ nmu̶naxy ngu'ubú̶ky; may'ook u̶u̶ch tu̶ nga'akáy nga'a'u'ugy; tu̶ u̶u̶ch je̱'e̱ tu̶u̶chpyu̶ nmu̶naxy ngu'ubú̶ky y tu̶ nyajmayjyátyu̶ch je̱'e̱ wit tukxy.
28May'ook u̶u̶ch tu̶ ndzaachjyáty y ka'p y'adaadu̶'ajtyu̶ch, jaboom jaboom u̶u̶ch mu̶k nidajy nimay neby je̱'e̱ mu̶bu̶jkpu̶du̶jk nigu̶xyu̶ yajpaatku̶xyu̶ñ. 29Pu̶nu̶ jii je̱'e̱ myu̶bu̶jku̶ñ pu̶n mu̶j may ka'amu̶u̶du̶ch, nnidaj nnimaaybyu̶ch je̱' je̱'e̱ mu̶dyiibu̶ du'un jajtp abe̱jtpu̶ñ; y pu̶nu̶ jii je̱'e̱ myu̶gu'ug pu̶n nidu'ug yajwinma'añdyu̶góy, u̶u̶ch nmu̶jootma'typyu̶ch je̱' je̱'e̱ mu̶dyiibu̶ je̱'e̱ myu̶gu'ug yajwinma'añdyu̶gooybyu̶ñ. 30Pu̶nu̶ jii tii, tii u̶u̶ch nayyajku'umayu̶u̶wu̶bu̶ñ, je̱' u̶u̶ch nayyajku'umayu̶u̶wu̶p je̱'e̱ mu̶dyiibu̶ yajni'igu̶xu̶'kpu̶ñ ko u̶u̶ch je̱'e̱ ayo'on nmu̶naxy ngu'ubú̶ky. 31Je̱'e̱ Dios je̱'e̱ nWindzú̶n Jesucristo tyeedy ajtu̶m ajku̶xy, je̱'e̱ mu̶dyiibu̶ paattu̶bu̶ñ n'u̶u̶baat ngapxpaatu̶mu̶ch wiinu̶u̶xu̶u̶ ajku̶xy, nejwu̶u̶by ko du'un tyu̶y'ajtu̶ch neby u̶u̶ch nmu̶na'añu̶ñ. 32Ko u̶u̶ch najty jim Damasco kajpt nyajpaady, chi je̱'e̱ gobernador, je̱'e̱ mu̶dyiibu̶ je̱'e̱ mu̶j'ane̱'e̱mbu̶ Aretas najty mu̶duumbu̶ñ, ane̱'e̱mu̶ñ yejky ko je̱'e̱ adu̶naaybyu̶ jim pu̶da'agu̶ch ma kyajptu̶gu̶'u̶yu̶ñ, wan u̶u̶ch je̱' xymyajtzku̶xu̶ch; 33peru̶ ku̶xu̶'kku̶x je̱'e̱ mu̶bu̶jkpu̶du̶jk mu̶dyiibu̶ u̶u̶ch kachjyooty ventaanu̶'aguuy xykyu'udu̶u̶yñajxku̶xu̶ñ ma je̱'e̱ mu̶jpóch mu̶dyiibu̶ je̱'e̱ kajpt mu̶u̶d jyu'ubojtzwu̶dítyu̶ch, y du'un u̶u̶ch ngueeky ma je̱'e̱ kyu̶'u̶jooty ajku̶xyu̶ñ.
Currently Selected:
2 Corintios 11: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005