2 Corintios 1
1
Je̱'e̱ yajpókxu̶ñ
1U̶u̶ch Pablo je̱'e̱ Dios du'un tzojkp ko u̶u̶ch je̱'e̱ Jesucristo xy'apóstol'ádu̶ch. Kipxy mu̶u̶d je̱'e̱ nmu̶gu'ug Timoteo yam nijayu̶u̶ygyu̶xy miich je̱'e̱ Dios jya'ay je̱'e̱ mu̶dyiibu̶ jim Corinto kajpt tzu̶naaygyu̶xpu̶ñ y ku̶xyu̶ je̱'e̱ Dios jya'ay je̱'e̱ mu̶dyiibu̶ Acaya naaxjooty tzu̶naaygyu̶xpu̶ñ. 2Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo oy'ajt may'ajt tuñ ma miich ajku̶xyu̶ñ, y xyajjootkujk'ajtku̶xu̶ch.
Neby je̱'e̱ Pablo jyajty y'abejtyu̶ñ
3Tzu̶k je̱'e̱ Dios ku'umaay ja'aymye̱jtzu̶m ajku̶xy je̱'e̱ Jesucristo Tyeedy, u̶u̶ch je̱'e̱ nWindzú̶n ajtu̶m ajku̶xy, je̱' je̱'e̱ Dios Teedy je̱'e̱ mu̶dyiibu̶ xypya'a''ayoowu̶mbu̶ñ ajku̶xy y je̱' je̱'e̱ Dios Teedy je̱'e̱ mu̶dyiibu̶ je'emy xypyudaj xypyumayu̶u̶yu̶mbu̶ñ ajku̶xy. 4Je̱' xypyudaj xypyumayu̶u̶yu̶mb ajku̶xy ko naty nej njajt n'abe̱jtu̶m ajku̶xy, neby u̶u̶ch mu̶baad nandu'un nbudaj nbumayu̶ydyu̶gajtzu̶mu̶ñ ajku̶xy je̱'e̱ mu̶dyiibu̶ oy nejpy jajtp abe̱jtku̶xpu̶ñ nbudaj nbumayu̶u̶yu̶mu̶ch ajku̶xy du'un neby je̱'e̱ Dios u̶u̶ch tu̶ xypyudaj xypyumayu̶u̶yu̶mu̶ñ ajku̶xy. 5Du'un neby je̱'e̱ Cristo oy nejpy jyajty y'abejtyu̶ñ y nandu'un u̶u̶ch oy nejpy njajt n'abe̱jtu̶m ajku̶xy mu̶u̶d je̱'e̱ Cristo kyu̶xpu̶, nan mu̶j ku̶je̱e̱ je̱'e̱ pudaj pumayu̶u̶yu̶ñ nandu'un xymyooyu̶mu̶ch ajku̶xy. 6Ko u̶u̶ch du'un oy nejpy njajtku̶xy n'abe̱jtku̶xy, paady u̶u̶ch du'un njajtku̶xy n'abe̱jtku̶xy wan miich je̱'e̱ pudaj pumayu̶u̶yu̶ñ mbaatku̶xu̶ch y je̱'e̱ aanu̶mu̶ ni'idzooku̶ñ; y pu̶nu̶ je̱'e̱ Dios u̶u̶ch xypyudaj xypyumayu̶u̶ygyu̶xp, paady u̶u̶ch je̱'e̱ xypyudaj xypyumayu̶u̶ygyu̶xy wan miich je̱'e̱ nandu'un xypyudaj xypyumayu̶u̶ygyu̶xu̶ch y neby mu̶baad mu̶me̱kxtujkku̶xyu̶ñ mu̶u̶d je̱'e̱ mu̶k'ajtu̶ñ je̱'e̱ tzaachpyu̶ ayo'on je̱'e̱ mu̶dyiibu̶ u̶u̶ch nmu̶najxypy ngu'ubu̶jkypyu̶ñ ajku̶xy. 7Nnejwu̶u̶ybyu̶ch tu̶y tu'uda'agy ajku̶xy ko miich je̱'e̱ tzaachpyu̶ ayo'on mmu̶me̱kxtujkku̶xu̶ch, je̱' ko nnejwu̶u̶ybyu̶ch ajku̶xy ko du'un neby je̱'e̱ tzaachpyu̶ ayo'on mmu̶najx mgu'ubu̶jkku̶xyu̶ñ, nan mbaatku̶xypy je̱'e̱ pudaj pumayu̶u̶yu̶ñ, je̱'e̱ mu̶dyiibu̶ jiiby tzomb ma je̱'e̱ Diosu̶ñ.
8“Mu̶gu'uktu̶jk, cham nyajja'aymye̱jtzku̶xy neby u̶u̶ch je̱'e̱ ayo'on jootmáy jim Asia naaxjooty n'ijxku̶xy nbaatku̶xyu̶ñ. Mu̶k u̶u̶ch je̱'e̱ ayo'on jootmáy jim n'ijxku̶xy nbaatku̶xy ka'p u̶u̶ch najty n'oknayjyu̶jp'ijxu̶gu̶xnu̶ nbu̶dzu̶u̶mgu̶xu̶chu̶ch jim juugy. 9Du'un u̶u̶ch najty jim nnayjyu̶wu̶u̶yu̶gu̶xnu̶ neby je̱'e̱ ja'ay je̱'e̱ mu̶dyiibu̶ o'kju̶jp'aam yajpaatku̶xpu̶ñ. Peru̶ paady u̶u̶ch du'un njajtku̶xy neby u̶u̶ch nnejwu̶u̶ygyu̶xu̶chu̶ñ ko jim je̱'e̱ pube̱jtu̶ñ yajpaady ma je̱'e̱ Diosu̶ñ, je̱'e̱ mu̶dyiibu̶ je̱'e̱ o'ogyjya'ay yajjuugypyu̶jkpu̶ñ y ka'p jyímu̶ch ma u̶u̶ch ku̶'u̶m ajku̶xyu̶ñ. 10Y Dios u̶u̶ch tu̶ xyñiwaan xykyuwaangu̶xy y xyñiwa'an xykyuwa'anu̶bu̶ch ajku̶xy ma u̶u̶ch je̱'e̱ o'ku̶ñ naty nja'a'íx nja'apadaangu̶xyu̶ñ. Y nmu̶dajtypyu̶ch je̱'e̱ mu̶bu̶jku̶ñ ajku̶xy ma je̱'e̱ju̶ñ ko u̶u̶ch xyñiwaan'adu̶'u̶dz xykyuwaan'adu̶'u̶dzaangu̶xy, 11pu̶nu̶ xypyube̱jtpu̶ch miich ajku̶xy mu̶bu̶jktzoogu̶xu̶ch je̱'e̱ Dios mu̶u̶d u̶u̶ch kyu̶xpu̶ ajku̶xy. Pu̶nu̶ may je̱'e̱ ja'ay Dios mu̶bu̶jktzoogu̶xy mu̶u̶d u̶u̶ch kyu̶xpu̶ ajku̶xy, nan may je̱'e̱ ja'ay Dioskujuuyu̶p ye̱jkku̶xu̶ch mu̶u̶d je̱'e̱ oy'ajtu̶ñ gyu̶xpu̶ je̱'e̱ mu̶dyiibu̶ je̱' xymyooyu̶mbu̶ñ ajku̶xy.
Ti je̱'e̱ Pablo ko ka'p Corinto ñu̶kxy
12Jii je̱'e̱ mu̶dyiibu̶ u̶u̶ch jootkujk xyajnayjyu̶wu̶u̶yu̶bu̶ñ ajku̶xy, y je̱' je̱' ko u̶u̶ch je̱'e̱ njoot nwinma'añ xy'awaanu̶ ajku̶xy ko u̶u̶ch oy yajxón tu̶ nja'ay'ajtku̶xy y tu'uda'agy ma adayaaba naaxwiiñu̶ñ y ni'igyu̶ oy ma miich ajku̶xyu̶ñ. Je̱'e̱ Dios u̶u̶ch tu̶ xypyube̱jt xypyudu̶gu̶u̶ygyu̶xy mu̶u̶d je̱'e̱ y'oyjya'ay'ajtu̶ñ ko u̶u̶ch du'un ndzu̶naay njugy'ajtku̶xu̶ch y ka'p jye̱'e̱ju̶ch je̱'e̱ ngu̶'u̶mwij'ajtu̶ch ajku̶xy. 13Ma je̱'e̱ naky je̱'e̱ mu̶dyiibu̶ tu̶ nyajnigue̱jxku̶xyu̶ñ, je̱'e̱ naky je̱' je̱'e̱ mu̶dyiibu̶ mu̶baad mgápxku̶xy y mwinju̶wu̶u̶ygyu̶xyu̶ñ. Y nja'ay'ejxypyu̶ch ko oy wa'adz mwinju̶wu̶u̶ygyu̶xu̶ch, 14je̱' ko tu̶ miich we̱e̱nu̶ mwinju̶wu̶u̶ygyu̶xy, y ko naty je̱'e̱ Jesús ya naaxwiiñ ja'adu'ook wyimbity je̱'e̱ nWindzú̶n ajtu̶m ajku̶xy, mu̶'it miich jootkujk mnayjyu̶wu̶u̶yu̶gu̶xu̶ch mu̶u̶d u̶u̶ch kyu̶xpu̶ ajku̶xy, nandu'un u̶u̶ch jootkujk nnayjyu̶wu̶u̶yu̶gu̶xu̶ch mu̶u̶d miich kyu̶xpu̶ ajku̶xy.
15Nmu̶dajtypyu̶ch je̱'e̱ mu̶bu̶jku̶ñ ma miich ajku̶xyu̶ñ ko u̶u̶ch je̱'e̱ nnaky oy wa'adzu̶ xywyinju̶wu̶u̶yu̶ch ajku̶xy, du'un u̶u̶ch najty tu̶ nwinmay nnu̶kxa'añu̶ch jayu̶jp ma miich ajku̶xyu̶ñ, y nu̶kxy me̱jtz'ook ngu'ix nmu̶gapxaangu̶xy. 16Du'un u̶u̶ch najty nwinmay ngu'ix nmu̶gapxaangu̶xy ko u̶u̶ch naty jim Macedonia nnu̶kxy, y ko u̶u̶ch naty jim Macedonia nwimbijtnu̶, mu̶'it najty ja'adu'ook ngu'ix nmu̶gapxaangu̶xnu̶ba. Neby u̶u̶ch miich du'un u̶xyu̶py xypyubejtyu̶ñ ajku̶xy ndu'uyo'oy'adu̶'u̶dzu̶chu̶ch y nja'adu̶chu̶ch jim Judea. 17¿Nej ka'p u̶u̶ch je̱'e̱ da'a oy yajxón nwinmaay ko u̶u̶ch najty jim nnaxu̶'u̶wa'añ ma miich ajku̶xyu̶ñ? ¿Nej mmu̶naangu̶xp miich ko u̶u̶ch tii nduñ, nduumbyu̶ch je̱'e̱ da'a; cham u̶u̶ch nmu̶na'añ “oy”, y nan cham u̶u̶ch naty nmu̶na'añ “ka'p”? 18Dios nejwu̶u̶by ko ka'p u̶u̶ch miich du'un nnu̶maaygyu̶xy “oy”, y nan cham u̶u̶ch naty nmu̶naangu̶xy “ka'p”. 19Je̱' ko je̱'e̱ Cristo Jesús, je̱'e̱ Dios y'Ung, je̱'e̱ mu̶dyiibu̶ je̱'e̱ Silvano, je̱'e̱ Timoteo y u̶u̶ch ngapxwa'kxku̶xypyu̶ñ ma miich ajku̶xyu̶ñ, ka'p je̱'e̱ jye̱'e̱ju̶ch je̱'e̱ mu̶dyiibu̶ mu̶naambu̶ñ “oy” y nan cham naty myu̶na'añ “ka'p”. Cristo je̱' je̱' je̱'e̱ mu̶dyiibu̶ du'un mu̶naambu̶ñ “oy” kuydyuunu̶ je̱'e̱ Dios y'ayuuk tyu̶y'ajt. 20Je̱'e̱ Cristo ku̶xyu̶ kuydyuundaaby tii je̱'e̱ Dios jékyu̶p y'awanu̶u̶yu̶ñ. Paady ko je̱'e̱ Dios nja'aymye̱jtz n'o'owu̶dajtu̶m ajku̶xy, chi nmu̶naanu̶m ajku̶xy “Jaanch adaa du'un” Cristo Jesús kyu̶xpu̶. 21Y je̱'e̱ Dios je̱' je̱'e̱ mu̶dyiibu̶ u̶u̶ch y miich tu̶ xypyube̱jtu̶mu̶ñ ajku̶xy ko tu'ugyu̶ nyajpaatu̶m ajku̶xy ma je̱'e̱ Crístoju̶ñ, y tu̶ xywyin'ijxu̶m ajku̶xy ko je̱'e̱ y'ayuuk tyu̶y'ajt ngapxwa'kxu̶yu̶ch ajtu̶m ajku̶xy. 22Tu̶ je̱'e̱ ijxpe̱jtu̶ñ xypyu̶daaku̶ ajtu̶m ajku̶xy ko xyñidu̶y'ajt'ajtu̶m ajku̶xy y tu̶ je̱'e̱ Espíritu Santo xyaj'adu̶gu̶u̶y xyajjoottu̶gu̶u̶yu̶m ajku̶xy, du'un neby du'umbu̶ tu̶ xyjyuuyu̶'ku̶mu̶ñ ajku̶xy ko nbadaanu̶m ajku̶xy je̱'e̱ co mu̶dyiibu̶ xymyo'owaanu̶mbu̶ñ ajku̶xy.
23Dios je̱'e̱ tu̶y'ajt mu̶u̶d tii u̶u̶ch ko Corinto nga'anú̶kxyñu̶ju̶ñ, neby u̶u̶ch najty nja'awinmáyu̶ñ nnu̶kxa'añu̶ch jim, y je̱'e̱gyú̶xpu̶ je̱' nga'amu̶kmu̶gapxaangu̶xy nga'ayaj'ama'ad nga'ayajjootma'adaangu̶xy. 24Ka'p je̱' nyajmu̶guwanu̶'u̶waangu̶xypy je̱'e̱ mu̶dyiibu̶ mu̶baad adzip mmu̶bu̶jkku̶xyu̶ñ, miich tu'ug'aa tu'ugjoot miich je̱'e̱ mmu̶bu̶jku̶ñ mmu̶dajtku̶xnu̶, je̱'e̱ mu̶dyiibu̶ u̶u̶ch ndzojkku̶xypyu̶ñ je̱' je̱' co nbube̱daangu̶xy, wan ni'igyu̶ mxoongu̶x m'ijtku̶xu̶ch.
Currently Selected:
2 Corintios 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005