1 Tesalonicenses 3
3
1Je̱' ko ka'p u̶u̶ch je̱'e̱ taju̶u̶ mayu̶u̶ nmu̶madaaky, chi u̶u̶ch nwinmaaygyu̶xy nwu̶'u̶maangu̶xyu̶ch agu̶ u̶u̶ch jim Atenas, 2y ngue̱jxku̶xyu̶ch je̱'e̱ nmu̶gu'ug Timoteo ajku̶xy, je̱'e̱ mu̶dyiibu̶ je̱'e̱ Dios mu̶duumbu̶ñ ko je̱'e̱ Cristo je̱'e̱ oybyu̶ y'ayuuk tyu̶y'ajt kapxwa'kxu̶ je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. Paady u̶u̶ch je̱'e̱ ngue̱jxku̶xy wan nu̶kxy xykyu'ijx xymyu̶gápxku̶xy y ni'igapxpé̱du̶ch neby u̶u̶ch tu̶ nmu̶na'añu̶ñ, y xyjyootmu̶kmooygyu̶xu̶ch ma je̱'e̱ mmu̶bu̶jku̶ñ ajku̶xyu̶ñ, 3y ka'pu̶ ni pu̶n y'u̶xtu̶gu̶'u̶wa'agu̶ch mu̶u̶d adaa neby yam mjajt m'abe̱jtku̶xyu̶ñ. Miich mnejwu̶u̶ygyu̶xypy du'un ko ni'igu̶ nmu̶najx ngu'ubu̶jku̶mu̶py je̱'e̱ tzaachpyu̶ ayo'on ajku̶xy. 4Ko u̶u̶ch najty jim n'ityñu̶ ajku̶xy ma miich ajku̶xyu̶ñ, n'awaanu̶ du'un ajku̶xy ko u̶u̶ch je̱'e̱ ayo'on jootmáy najty nbadaangu̶xy n'ixaangu̶xy, y nbaat n'ijxu̶ch je̱'e̱ du'un ajku̶xy, du'un neby cham mnejwu̶u̶ygyu̶xyu̶ñ. 5Y paady ko u̶u̶ch je̱'e̱ taju̶u̶ mayu̶u̶ najty ka'p n'okmu̶mada'agaanu̶, paady u̶u̶ch je̱'e̱ Timoteo nguejxy ma miich ajku̶xyu̶ñ ko wan xyajtu̶u̶gu̶xu̶ch neby je̱'e̱ mmu̶bu̶jku̶ñ yajpaatku̶xyu̶ñ, je̱' ko tzu̶gu̶u̶ybyu̶ch najty ajku̶xy, tu̶ ndijy je̱'e̱ mu̶jku'u najty xymyu̶madaakku̶xy y tu̶ u̶u̶ch u̶xyu̶py je̱'e̱ nxu̶u̶ ntiempo du'un nigoo ñi'itu̶gooygyu̶xy ko u̶u̶ch je̱'e̱ ayuuk tu̶y'ajt oy ngapxwa'kxku̶xy ma miich ajku̶xyu̶ñ.
6Peru̶ jada'achám je̱'e̱ Timoteo tu̶ wyimbity, tu̶ chooñ jim Tesalónica ma jim miich ajku̶xyu̶ñ y tu̶ mu̶mech je̱'e̱ ayuuk du'un neby je̱'e̱ mmu̶bu̶jku̶ñ miich mmu̶dajtku̶xyu̶ñ, y neby amíñ u̶xyu̶py mnaychojk mnayjyu̶wu̶u̶yu̶gu̶xyu̶ñ. Xyñu̶maaygyu̶xyu̶ch ko u̶u̶ch miich je'emy xyjya'aymye̱jtzku̶xy mu̶u̶d je̱'e̱ tzojku̶ñ ju̶wu̶u̶yu̶ñ, y ko u̶u̶ch miich nandu'un xyjya'a'ixaangu̶xy du'un neby u̶u̶ch miich nandu'un nja'a'ixaangu̶xyu̶ñ. 7Paady mu̶gu'uktu̶jk ajku̶xy, oy u̶u̶ch yam du'un ku̶xy kubety njajt n'abe̱jtku̶xy, y nbaatku̶xy n'ijxku̶xyu̶ch je̱'e̱ ayo'on jootmáy. Y tu̶ u̶u̶ch du'un njootkugu̶u̶ygyu̶xy ko u̶u̶ch du'un tu̶ nnejwu̶u̶ygyu̶xy ko je̱'e̱ mmu̶bu̶jku̶ñ miich tu'ug'aa tu'ugjoot mmu̶dajtku̶xy. 8Ko u̶u̶ch du'un tu̶ nnejwu̶u̶ygyu̶xy ko miich je̱'e̱ Windzú̶n Dios tu'ug'aa tu'ugjoot mmu̶bu̶jkku̶xy, je̱' u̶u̶ch du'un xyajjootkugu̶u̶ygyu̶xp. 9¿Neby u̶u̶ch je̱'e̱ Dioskujuuyu̶p da'a mu̶baad ni'igyu̶ n'ok'yajnajxku̶xy ma u̶u̶ch je̱'e̱ nDios ajku̶xyu̶ñ mu̶u̶d miich kyu̶xpu̶ ajku̶xy, y mu̶u̶d je̱'e̱ mu̶jpu̶ jootkujk'ajtu̶ñ je̱'e̱ mu̶dyiibu̶ u̶u̶ch nmu̶dajtku̶xypyu̶ñ ma je̱'e̱ Dios winduuyu̶ñ mu̶u̶d miich kyu̶xpu̶ ajku̶xy? 10Xu̶u̶m tzum u̶u̶ch je̱'e̱ Dios nmu̶yujkwaangu̶xy wan yajmu̶baad'ádu̶ch n'ijxku̶xu̶ch ku̶'u̶m wiingú̶xp ju̶jpkú̶xp y njakyajka'pxu̶chu̶ch je̱'e̱ mmu̶bu̶jku̶ñ ajku̶xy, je̱'e̱ mu̶dyiibu̶ xyjyaktu̶goy'ajtu̶byu̶ñ ajku̶xy.
11Nju̶jp'ijxku̶xypyu̶ch ko je̱'e̱ nDios Teedy ku̶'u̶m y je̱'e̱ nWindzú̶n Jesús ajtu̶m ajku̶xy xypyubé̱du̶chu̶ch ajku̶xy, neby nu̶kxy mu̶baad ngu'ijxku̶xy nmu̶gápxku̶xyu̶ñ. 12Y wan je̱'e̱ Windzú̶n Jesús xyajmu̶j xyajmayu̶u̶yu̶ ajku̶xy y xyjyakmooygyu̶xy je̱'e̱ tzojk'ajtu̶ñ neby mu̶baad ni'igyu̶ amíñ u̶xyu̶py mnaychojk mnayjyu̶wu̶u̶yu̶gu̶xyu̶ñ y mdzógu̶ch mju̶wu̶'u̶wu̶ch ku̶xyu̶ ajku̶xy wanpú̶nu̶ch, du'un neby u̶u̶ch miich ndzojkku̶xy nju̶wu̶u̶ygyu̶xyu̶ñ. 13Wan je̱'e̱ Windzú̶n Jesús xypyube̱jt xypyudu̶gu̶u̶ygyu̶xy neby je̱'e̱ ayuuk tu̶y'ajt mu̶baad tu'ug'aa tu'ugjoot mmu̶bu̶jkku̶xyu̶ñ, neby mu̶baad wa'adz myajpaatku̶xyu̶ñ y jaybyokymyu̶u̶d ma je̱'e̱ Dios winduuyu̶ñ je̱'e̱ nDeedy ajtu̶m ajku̶xy ko naty je̱'e̱ nWindzú̶n Jesús wyimbijtu̶m ajku̶xy ya naaxwiiñ mu̶u̶d je̱'e̱ jya'ay nigu̶xyu̶ ajku̶xy. Jaanch adaa du'un.
Currently Selected:
1 Tesalonicenses 3: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005