1 Pedro 1
1
Je̱'e̱ yajpókxu̶ñ
1U̶u̶ch, Pedro, je̱'e̱ Jesucristo y'apóstol, cham u̶u̶ch je̱'e̱ naky nyajnigue̱jxku̶xy je̱'e̱ ja'ay mu̶dyiibu̶ tu̶ yajke̱e̱ku̶gu̶xy y tu̶ ñú̶kxku̶xy tzu̶naaybyu̶ wiing naaxjooty, ma je̱'e̱ Ponte naaxjooty, Galacia, Capadocia, Asia y Bitinia naaxjooty, 2je̱'e̱ mu̶dyiibu̶ je̱'e̱ Dios Teedy najty jékyu̶p tu̶ wyin'ijxu̶gu̶xyu̶ñ du'un neby najty tu̶ niwinmayu̶'u̶yu̶ñ. Espíritu Santo kyu̶xpu̶ je̱'e̱ mjoot mwinma'añ tu̶ xyajwaatzu̶ ajku̶xy neby du'un mgapxymyu̶doogu̶xu̶chu̶ñ y xyajwaatzu̶ je̱'e̱ mboky mgu̶dyeey ajku̶xy mu̶u̶d je̱'e̱ Jesucristo ñe'pty. Wan je̱'e̱ Dios oy'ajt may'ajt mu̶j ku̶je̱e̱ tuñ ma miich ajku̶xyu̶ñ y xyajjootkugu̶u̶ygyu̶xu̶ch.
Je̱'e̱ jugy'ajtu̶ñ wiinu̶u̶xu̶u̶bu̶ mu̶dyiibu̶ yajju̶jp'ijxpu̶ñ
3Tzuk je̱'e̱ Dios, je̱'e̱ Windzú̶n Jesucristo tyeedy, u̶u̶baat kapxpaattu̶ ajtu̶m ajku̶xy, je̱' ko mu̶u̶d je̱'e̱ myu̶jpa'a''ayoowu̶ñ je̱'e̱ njoot nwinma'añ tu̶ xyajwinje̱e̱mu̶ ajtu̶m ajku̶xy ko je̱'e̱ Jesucristo jyuugypyu̶jky. Y adaa du'un xi'ig xon xyajju̶jp'ijxu̶mb ajku̶xy ko je̱'e̱ aanu̶mu̶ ni'idzooku̶ñ nbadaanu̶m ajku̶xy, 4y nan xymyooygyu̶xu̶p mu̶dyiibu̶ je̱'e̱ Dios jiiby tzajpjooty ni'ixu̶'u̶ myu̶dajtypyu̶ñ, je̱'e̱ mu̶dyiibu̶ ka'p wyindu̶goyu̶ñ, je̱'e̱ mu̶dyiibu̶ ka'p jyu̶bu̶kku̶'u̶y y je̱'e̱ mu̶dyiibu̶ ka'p ñikxyu̶ñ. 5Mu̶u̶d je̱'e̱ mu̶bu̶jku̶ñ mu̶dyiibu̶ miich mmu̶dajtku̶xypyu̶ñ ma je̱'e̱ Diosu̶ñ, je̱' miich xykyweentu̶'ajtku̶xp mu̶u̶d je̱'e̱ myu̶k'ajtu̶ñ y wan je̱'e̱ aanu̶mu̶ ni'idzooku̶ñ mbaatku̶xu̶ch mu̶dyiibu̶ ni'ixu̶'u̶ myu̶dajtypy xymyo'owaangu̶xy, je̱'e̱ mu̶dyiibu̶ mu̶'it yajni'igu̶xu̶'u̶ge̱e̱mby ko naty je̱'e̱ xu̶u̶ tiempo kyu̶xaan tyu̶goyaanu̶.
6Paady miich jootkujk m'ijtku̶xy, oy je̱'e̱ tzaachpyu̶ du'un tzojku̶ mu̶j may m'okja'apaat m'okja'a'ijxku̶xy. 7Je̱' ko du'un miich je̱'e̱ mmu̶bu̶jku̶ñ ajku̶xy neby je̱'e̱ ooru̶ju̶ñ. Je̱'e̱ ooru̶ yaj'ijxmajtzp je̱' mu̶u̶d je̱'e̱ ju̶u̶n pu̶nu̶ jaanch wya'adz ooru̶ju̶ch. Je̱'e̱ mu̶bu̶jku̶ñ mu̶dyiibu̶ je̱'e̱ tzaachpyu̶ ayo'on mu̶madaakp mu̶j je̱'e̱ ni'igyu̶ chobaady ni'igu̶ ka'p je̱'e̱ ooru̶ mu̶dyiibu̶ windu̶gooybyu̶ñ. Y du'unu̶tz miich je̱'e̱ mmu̶bu̶jku̶ñ ajku̶xy ko naty du'un tu̶ y'ok'yaj'ijxmach, winmajtzu̶gu̶xp je̱' mu̶j y'ídu̶ch ku'umáy y windzu̶gu̶'u̶y ko naty je̱'e̱ Jesucristo ya naaxwiiñ ja'adu'ook wyimbity.
8Miich ajku̶xy mdzojkku̶xypy mju̶wu̶u̶ygyu̶xypy je̱'e̱ Jesucristo, oy mga'a'ijxku̶xyñu̶. Y jada'a mmu̶bu̶jkku̶xypy je̱' oy mga'a'ijxku̶xyñu̶ y mxondaakku̶xy mu̶j mu̶u̶d je̱'e̱ ku'umaayu̶ñ, mu̶dyiibu̶ je̱'e̱ Dios yejkypyu̶ñ, y ka'p je̱'e̱ mgapxy mmu̶dya'agy mbaadku̶xy neby mnigápxku̶xu̶chu̶ñ ko mxondaakku̶xy, 9ko je̱'e̱ m'aanu̶mu̶ ni'idzooku̶ñ tu̶ mbaatku̶xy. Je̱' ko tu̶ je̱'e̱ mwinma'añ jim mbu̶daakku̶xy ko je̱'e̱ m'aanu̶mu̶ ni'idzooku̶ñ mbaadku̶xu̶ch mu̶u̶d je̱'e̱ mmu̶bu̶jku̶ñ mu̶dyiibu̶ mmu̶dajtku̶xypu̶ñ.
10Je̱'e̱ Dios y'ayuuk najtzkapxu̶u̶ybyu̶du̶jk kyu̶'u̶yo'oy tyekyyo'oygyu̶x adayaaba aanu̶mu̶ ni'idzooku̶ñ jékyu̶py ajku̶xy, y ñajtzkapxu̶u̶ygyu̶x mu̶dyiibu̶ je̱'e̱ Dios najty miich xymyo'owaangu̶xpu̶ñ mu̶u̶d je̱'e̱ myay'ajtu̶ñ. 11Je̱'e̱ Dios y'ayuuk najtzkapxu̶u̶ybyu̶du̶jk je̱'e̱ Espíritu Santo najty je̱'e̱ yajnejwu̶u̶yu̶p ajku̶xy neby je̱'e̱ Cristo tzaachpyu̶ najty mu̶nax ku'ubu̶ga'añu̶ñ y neby je̱'e̱ kyu'umaayu̶ñ u̶x'aam paadu̶chu̶ñ. Je̱' jya'anejwu̶'u̶waangu̶xypy je̱'e̱ najty pu̶n je̱'e̱ du'unu̶ñ, y je̱'e̱ xu̶u̶ tiempo mu̶dyiibu̶ je̱'e̱ Espíritu Santo du'un ñigapxypyu̶ñ je̱'e̱ mu̶dyiibu̶ najty yajpaatp ma je̱' ajku̶xyu̶ñ. 12Peru̶ je̱'e̱ Dios je̱'e̱ yajnejwu̶u̶yu̶gu̶x ko je̱'e̱ mu̶dyiibu̶ najty ñajtzkapxu̶u̶ygyu̶xypyu̶ñ ka'p najty je̱'e̱ padaan ixaangu̶xy, miich najty je̱'e̱ mbade̱e̱mby m'ixaangu̶xypy y ka'p jye̱'e̱ju̶ch ajku̶xy. Y je̱'e̱ju̶tz adaa du'un jada'achám je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, mu̶dyiibu̶ je̱' ku̶'u̶m tu̶ xyñajtzkapxu̶u̶yu̶ju̶ñ ajku̶xy mu̶u̶d je̱'e̱ Espíritu Santo myu̶k'ajtu̶ñ, mu̶dyiibu̶ jiiby tzajpjooty yajke̱jxu̶ñ. Du'un neby adaa ku̶xyu̶ tu̶ tyuñ tu̶ jyadyii jya'anejwu̶'u̶waangu̶xypy je̱'e̱ ángelestu̶jk oy wa'adz peru̶ ka'p mu̶winma'añbyaatku̶xy.
Chojkypy je̱'e̱ Dios ko tu'uda'agy ndzu̶naay njugy'ajtu̶mu̶ch
13Paady ni'ixu̶'u̶ ijtku̶x ma je̱'e̱ mjoot mwinma'añ ajku̶xyu̶ñ y wijy kejy. Ju̶jp'ijxku̶x tu'ug'aa tu'ugjoot mu̶dyiibu̶ je̱'e̱ Windzú̶n Jesucristo mu̶u̶d je̱'e̱ y'oyjya'ay'ajtu̶ñ xymyo'owaangu̶xpu̶ñ ko naty ja'adu'ook myiñ. 14Yajmu̶gápxku̶x du'un neby je̱'e̱ ung ana'k mu̶dyiibu̶ yajmu̶gápxku̶xpu̶ñ, ka'p du'un m'oktzu̶naaygyu̶xnu̶ neby ijty jeky'ajty mdzu̶naaygyu̶xyu̶ñ, mnijoot'ajtku̶xy je̱'e̱ ju̶bu̶kjoot ju̶bu̶kwinma'añ ma je̱'e̱ Dios y'ayuuk tyu̶y'ajt najty ka'p mnejwu̶u̶ygyu̶xyñu̶ju̶ñ. 15Ni'igyu̶ miich oy wa'adz tzu̶naay juugy'ajtku̶x je̱' ko wa'adz je̱'e̱ Dios mu̶dyiibu̶ miich tu̶ xywyin'ijxku̶xyu̶ñ, 16je̱' ko du'un je̱'e̱ Dios ñaky myu̶na'añ: “Mu̶dajtku̶x je̱'e̱ mjoot mwinma'añ oy wa'adz du'un neby u̶u̶ch je̱'e̱ njoot nwinma'añ oy wa'adz nmu̶datyu̶ñ.”
17Pu̶nu̶ mnu̶maaygyu̶xypy “Teedy” je̱'e̱ Dios mu̶dyiibu̶ je̱'e̱ ja'ay ku̶xyu̶ tu̶ydyuumb neby naty tu̶ jya'ay'áty y ka'p win'ixy tyu̶ydyúñ, mwindzu̶gu̶u̶ygyu̶xu̶py je̱'e̱ wiinu̶u̶xu̶u̶ du'uñdyu̶ ya naaxwiiñ mdzu̶naay mjugy'ajtku̶xyu̶ñ. 18Je̱'e̱ Dios miich tu̶ xyajpokyñi'idzookku̶xy, neby ijty mdzu̶naay mjugy'ajtku̶xyu̶ñ, je̱'e̱ mu̶dyiibu̶ ka'p chobaadyu̶ñ neby je̱'e̱ mmu̶j'áp mmu̶jteedy chu̶naay jyugy'ajtku̶xyu̶ñ; y miich mnejwu̶u̶ygyu̶xypy oy yajxón ko adayaaba pokyñi'idzooku̶ñ ka'p je̱'e̱ meeñ'aam yajkujuuy, je̱'e̱ meeñ mu̶dyiibu̶ windu̶booybyu̶ñ neby je̱'e̱ ooru̶ o neby je̱'e̱ plátu̶ju̶ñ, 19je̱'e̱ ñe'pty je̱'e̱ Cristo mu̶u̶d xykyujuuyu̶m ajku̶xy, je̱'e̱ ñe'pty mu̶dyiibu̶ mu̶j tzobaadpu̶ñ, je̱'e̱ mu̶dyiibu̶ yaj'yojx neby windzu̶gu̶'u̶ñdyu̶ñ, du'un neby je̱'e̱ borreegu̶'úng ijty yaj'yóxy ma je̱'e̱ Diosu̶ñ je̱'e̱ mu̶dyiibu̶ ka'p pyu̶ma'ayu̶ch y ka'p chu̶chu̶'u̶wu̶chu̶ñ. 20Tu̶ najty je̱'e̱ Jesucristo je̱'e̱ Dios du'un jékyu̶p yajniwinmayu̶'u̶yii ko du'un jyat y'abé̱du̶ch maabu̶ je̱'e̱ naaxwiimbu̶ najty ka'p kyojyñu̶ju̶ñ, peru̶ jada'achám tu̶ je̱'e̱ du'un yajnejwu̶'u̶yii ma je̱'e̱ xu̶u̶ tiempo yam kyu̶x tyu̶goyaanu̶ju̶ñ mu̶u̶d miich kyu̶xpu̶ m'oy'ajtu̶ñ ajku̶xy, je̱'e̱ mu̶dyiibu̶ najty ka'p jékyu̶p yajnejwu̶'u̶y. 21Cristo kyu̶xpu̶ miich je̱'e̱ Dios mmu̶bu̶jkku̶xy, je̱'e̱ Cristo mu̶dyiibu̶ je̱'e̱ Dios yajjuugypyu̶jku̶ñ ko najty tu̶ y'o'ogy y mooy je̱'e̱ ku'umaayu̶ñ, y du'unu̶tz miich je̱'e̱ mmu̶bu̶jku̶ñ jim tu̶ mbu̶daakku̶xy y mju̶jp'ijxku̶xy je̱'e̱ Dios.
22Jada'achám miich ajku̶xy, ko je̱'e̱ tu̶y'ajtpu̶ ayuuk tu̶y'ajt mgapxymyu̶doogu̶xy, tu̶ je̱'e̱ mjoot mwinma'añ wyaatzku̶xnu̶ neby je̱'e̱ mmu̶gu'ugtu̶jk mu̶baad mdzojkku̶xy mju̶wu̶u̶ygyu̶xyu̶ñ mu̶u̶d je̱'e̱ oyjyoot oywyinma'añ. Y du'unu̶tz mnaychojk mnayjyu̶wu̶u̶yu̶gu̶xu̶p amíñ u̶xyu̶py mu̶u̶d je̱'e̱ oyjyoot oywyinma'añ y mu̶u̶d ku̶xyu̶ je̱'e̱ mmu̶k mmu̶jaa ajku̶xy. 23Tu̶ je̱'e̱ Dios mjoot mwinma'añ miich xyajwinje̱e̱mu̶ ajku̶xy, du'un neby nu̶wu̶'u̶y jadu'ook tu̶ mmiindu̶gajtzku̶xyu̶ñ. Peru̶ ka'p je̱' tu̶ xyajmiindu̶gajtzku̶xy je̱'e̱ naaxwiiñbyu̶ taj teedy, je̱'e̱ mu̶dyiibu̶ o'kp tu̶gooygyu̶xpu̶ñ, je̱'e̱ Dios y'ayuuk tyu̶y'ajt tu̶ xyajmiindu̶gajtzku̶xy ja'adu'ook, je̱'e̱ mu̶dyiibu̶ je̱'e̱ jugy'ajt ye̱jkpu̶ñ y je̱'e̱ mu̶dyiibu̶ wiinu̶u̶xu̶u̶ ijtu̶u̶bu̶ñ, y ka'p nimu̶naaxu̶u̶ kyu̶xy tyu̶goy. 24Je̱' ko du'un je̱'e̱ Dios ñaky myu̶na'añ:
“Ku̶xyu̶ je̱'e̱ ja'ay du'un je̱' neby je̱'e̱ ujtzu̶ñ,
y je̱'e̱ myu̶j'ajtu̶ñ du'un je̱' neby je̱'e̱ pu̶jyu̶ñ.
Je̱'e̱ ujtz tu̶u̶tz je̱' y je̱'e̱ pyu̶jy ka'anu̶py je̱'.
25Peru̶ je̱'e̱ Windzú̶n Dios y'ayuuk tyu̶y'ajt wiinu̶u̶xu̶u̶ je̱'e̱
y'ijtu̶y y ka'p nimu̶naaxu̶u̶ kyu̶xy tyu̶goy.”
Y adayaaba ayuuk tu̶y'ajt, je̱'e̱ ayuuk tu̶y'ajt adaa, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ miich tu̶ mmu̶doy'ajtku̶xyu̶ñ.
Currently Selected:
1 Pedro 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005