1 Juan 4
4
Je̱'e̱ Dios y'Espíritu y je̱'e̱ espíritu mu̶dyiibu̶ je̱'e̱ Cristo mu̶dzip'ajtpu̶ñ
1“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ka'p miich nigoo ku̶xyu̶ mmu̶bu̶jkku̶xy pu̶njaty du'un mu̶naangu̶xpu̶ñ ko je̱'e̱ Dios y'ayuukkapxwa'kxpu̶ch ajku̶xy, jaywiin ok'ijxmajtzku̶x pu̶nu̶ jaanch je̱'e̱ Dios y'Espíritu mu̶dajtku̶xy o pu̶nu̶ ka'p. Je̱' ko may je̱'e̱ anu̶u̶'ajtpu̶du̶jk ya naaxwiiñ ajku̶xy, je̱'e̱ mu̶dyiibu̶ du'un mu̶naangu̶xpu̶ñ ko Dios y'ayuuknajtzkapxu̶u̶ybyu̶ch ajku̶xy. 2Y du'un miich mnejwu̶u̶ygyu̶xu̶ch pu̶n je̱'e̱ Dios y'Espíritu mu̶dajtku̶xpu̶ñ: ku̶xyu̶ pu̶n ku'ubu̶jkku̶xpu̶ñ ko je̱'e̱ Jesucristo ya naaxwiiñ mya'axung'ajty mu̶u̶d je̱'e̱ ñi'kx kyopt, je̱' je̱'e̱ Espíritu Santo mu̶dajtku̶xp. 3Pu̶n je̱'e̱ Jesús ka'aku'ubu̶jkku̶xpu̶ñ, ka'p je̱'e̱ Dios y'Espíritu mu̶dajtu̶ ajku̶xy; je̱'e̱ espíritu je̱'e̱ myu̶dajtku̶xypy mu̶dyiibu̶ je̱'e̱ Cristo mu̶dzip'ajtpu̶ñ. Miich tu̶ miich mmu̶doogu̶xy ko je̱'e̱ du'umbu̶ espíritu anu̶u̶'ajtpu̶ myinaangu̶xy: y tu̶ je̱'e̱ myiingu̶xy, ya naaxwiiñ je̱'e̱ cham ajku̶xyu̶ñ.
4“Mu̶gu'uktu̶jk mu̶dyiibu̶ u̶u̶ch du'un nju̶wu̶u̶by neby je̱'e̱ ung ana'ku̶ñ, miich Dios miich xyjya'ay'ajtku̶xp, y tu̶ miich je̱'e̱ anu̶u̶'ajtpu̶du̶jk mmu̶madaakku̶xy, mu̶dyiibu̶ du'un mu̶naangu̶xpu̶ñ ko Dios y'ayuukkapxwa'kxpu̶ch ajku̶xy, je̱' ko mu̶j je̱'e̱ Dios ni'igyu̶, mu̶dyiibu̶ ijtp mu̶u̶d miich ajku̶xy ni'igu̶ ka'p je̱'e̱ mu̶jku'u mu̶dyiibu̶ ijtp mu̶u̶d je̱'e̱ naaxwiiñjya'ay ajku̶xy. 5Ka'p je̱'e̱ Dios y'ayuuk tyu̶y'ajt mu̶bu̶jku̶ ajku̶xy y paady je̱'e̱ nigapx nimu̶dyaakku̶xy mu̶dyiibu̶ ya naaxwiiñ yajpaatpu̶ñ, wan je̱'e̱ kyapxy myu̶dya'agy y'amdo'ijtu̶gu̶xu̶ch, je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶jkku̶xyu̶ñ. 6Y u̶u̶ch Dios xyjya'ay'ajtp ajtu̶m ajku̶xy. Pu̶n je̱'e̱ Dios y'ayuuk tyu̶y'ajt mu̶bu̶jkku̶xpu̶ñ xy'amdo'ijtu̶yu̶py n'ayuuk je̱'e̱ ajtu̶m ajku̶xy, peru̶ je̱'e̱ mu̶dyiibu̶ je̱'e̱ Dios ka'p jya'ay'adyii ka'p je̱'e̱ n'ayuuk xy'amdo'ijtu̶ ajtu̶m ajku̶xy. Y adaaju̶tz je̱'e̱ du'un nyajnejwu̶u̶yu̶mu̶py ajku̶xy pu̶n je̱'e̱ tu̶y'ajt jaanch mu̶dajtpu̶ñ y pu̶n je̱'e̱ anu̶u̶ mu̶dya'agy mu̶dajtpu̶ñ.
Dios chojkypy jyu̶wu̶u̶by je̱'e̱ ja'ay
7“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, tzu̶k amíñ u̶xyu̶py nnaychojk nnayjyu̶wu̶u̶yu̶mu̶ ajku̶xy, je̱' ko jiiby je̱'e̱ du'umbu̶ tzojku̶ñ chooñ ma je̱'e̱ Diosu̶ñ. Ku̶xyu̶ pu̶n je̱'e̱ myu̶gu'ug tzojkp ju̶wu̶u̶by, myu̶bu̶jkypy Dios y'ayuuk je̱' y ung'ajtu̶p Dios je̱'. 8Pu̶n je̱'e̱ myu̶gu'ug ka'p tzoky ju̶wu̶'u̶y ka'p je̱'e̱ Dios mu̶bu̶kyñu̶, je̱' ko je̱' Dios chojkypy jyu̶wu̶u̶by je̱'e̱ ja'ay. 9Dios yajni'igu̶xu̶'k ma u̶u̶ch ajtu̶m ajku̶xyu̶ñ ko xychojk xyjyu̶wu̶u̶yu̶m ajku̶xy ko je̱'e̱ tu'kpajkpu̶ y'Ung ya naaxwiiñ kejxy neby je̱'e̱ jugy'ajt wiinu̶u̶xu̶u̶bu̶ du'un nbaattu̶mu̶ñ ajku̶xy mu̶u̶d je̱' gyu̶xpu̶. 10Adaaju̶tz je̱'e̱ jaanchpyu̶ tzojku̶ñ ju̶wu̶u̶yu̶ñ: ka'p je̱'e̱ Dios u̶u̶ch jayu̶jp tu̶ ndzojk tu̶ nju̶wu̶u̶yu̶m ajku̶xy, je̱' jayu̶jp tu̶ xychojk tu̶ xyjyu̶wu̶u̶yu̶m ajku̶xy y kejxy je̱'e̱ y'Ung ya naaxwiiñ ñayyojxu̶ du'un, neby je̱'e̱ windzu̶gu̶'u̶ñdyu̶ñ, neby je̱'e̱ nboky ngu̶dyeey du'un yajwinmé̱kxu̶mu̶chu̶ñ ajku̶xy.
11“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, pu̶nu̶ je̱'e̱ Dios du'un tu̶ xychojk xyjyu̶wu̶u̶yu̶m ajku̶xy, tzu̶k u̶u̶ch nandu'un amíñ u̶xyu̶py naychojk nayjyu̶wu̶u̶yu̶mu̶ ajku̶xy. 12Ka'p je̱'e̱ Dios ni pu̶n nimu̶naa ixyñu̶. Peru̶ pu̶nu̶ nnaychojk nnayjyu̶wu̶u̶yu̶p amíñ u̶xyu̶py ajtu̶m ajku̶xy, mu̶'it je̱'e̱ Dios yajpaady ma u̶u̶ch ajtu̶m ajku̶xyu̶ñ y mu̶'it du'un jaanch nnaychojk nnayjyu̶wu̶u̶yu̶mu̶ch ajku̶xy. 13Je̱'e̱ tu̶y'ajt ko je̱'e̱ Dios yajpaady ma u̶u̶ch ajtu̶m ajku̶xy y u̶u̶ch ajtu̶m ajku̶xy mu̶u̶d je̱', je̱' je̱' ko je̱'e̱ Espíritu Santo tu̶ xyaj'adu̶gu̶u̶y xyajjoottu̶gu̶u̶yu̶m ajku̶xy. 14Y u̶u̶ch ajku̶xy tu̶ u̶u̶ch je̱'e̱ Jesucristo ku̶'u̶m n'ijxku̶xy y nmu̶dajtku̶xypyu̶ch je̱'e̱ tu̶y'ajt ko je̱'e̱ Dios Teedy je̱'e̱ y'Ung ya naaxwiiñ tu̶ kexy neby je̱'e̱ naaxwiiñjya'ay yajni'idzo'ogu̶chu̶ñ. 15Wanpú̶nu̶ch pu̶n ku'ubu̶jkp ko je̱'e̱ Jesús Dios Ung je̱', je̱' yajpaatp mu̶u̶d je̱'e̱ Dios y je̱'e̱ Dios yajpaatp mu̶u̶d je̱'.
16Y du'un tu̶ nnejwu̶u̶yu̶m y tu̶ nmu̶bu̶jku̶m ajku̶xy ko je̱'e̱ Dios xychojku̶m xyjyu̶wu̶u̶yu̶m ajku̶xy. Dios chojkypy jyu̶wu̶u̶by je̱'e̱ ja'ay, y pu̶n je̱'e̱ myu̶gu'ug tzojkp ju̶wu̶u̶by, je̱' yajpaatp mu̶u̶d je̱'e̱ Dios y Dios yajpaatp mu̶u̶d je̱'. 17Ko je̱'e̱ oybyu̶ nguydyuunu̶m ajku̶xy mu̶'it du'un ñi'igu̶xu̶'u̶gy ko je̱'e̱ nmu̶gu'ug ndzojku̶m nju̶wu̶u̶yu̶m ajku̶xy y n'ijtu̶mu̶ch jootkujk ajku̶xy ko je̱'e̱ tu̶ydyuunu̶ñ naty paatnu̶; je̱' ko du'un u̶u̶ch ya naaxwiiñ ajtu̶m ajku̶xy neby je̱'e̱ Jesucrístoju̶ñ. 18Ka'p mu̶baad yajtzu̶gu̶'u̶y je̱'e̱ mu̶dyiibu̶ xychojku̶mb xyjyu̶wu̶u̶yu̶mb ajku̶xy. Je̱'e̱ oybyu̶ tzojku̶ñ mu̶dyiibu̶ je̱'e̱ Dios yejkypyu̶ñ, je̱' je̱'e̱ tzu̶gu̶'u̶ñ yajtu̶gooby; je̱' ko pu̶n tzu̶gu̶u̶by, je̱'e̱ tzaachpyu̶ je̱'e̱ chu̶gu̶u̶dzooby. Paady pu̶nu̶ jii pu̶n chu̶gu̶'u̶y, ka'p je̱'e̱ Dios amuumdu'ugjoot tzoky ju̶wu̶'u̶y.
19U̶u̶ch ndzojkypy nju̶wu̶u̶by je̱'e̱ Dios ajtu̶m ajku̶xy je̱' ko je̱' jayu̶jp tu̶ xychojk tu̶ xyjyu̶wu̶u̶yu̶m ajku̶xy. 20Pu̶nu̶ jii pu̶n myu̶na'añ: “U̶u̶ch ndzojkypyu̶ch je̱'e̱ Dios”, y myu̶'ixnaaby je̱'e̱ myu̶gu'ug y ka'p ixa'añ, anu̶u̶'ajtp je̱'e̱ du'un. Pu̶n je̱'e̱ myu̶gu'ug ka'p tzoky ju̶wu̶'u̶y, je̱'e̱ mu̶dyiibu̶ y'ijxypy, nan ka'p je̱'e̱ Dios tzoky ju̶wu̶'u̶y, je̱'e̱ mu̶dyiibu̶ ka'p ixyu̶ñ. 21Jesucristo adayaaba ane̱'e̱mu̶ñ tu̶ xymyooyu̶m ajku̶xy: ko pu̶n je̱'e̱ Dios tzojkp ju̶wu̶u̶by, wan je̱'e̱ myu̶gu'ug nandu'un tzoky ju̶wu̶'u̶y.
Currently Selected:
1 Juan 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005