GYAUNG: SU: 1
1
Sao Qhid' Lhang Gaug: Ra" Israel Byu Qenho: Byu Japhin:
1Israel byu qe Egutu mung" mae" to" lo" thao shid' zin ein: zin- lho" shid' khye' ein: khye' sao qhid' ba mae Asang wa Sina Din" Pyad' yo mae" yao" qhid' kheim: jamu mae Moshe re dao: jhau: ra". 2Yao: wa- nao we' Arun wa byumyu" kaung we' yham byu qere kho' yang: Israel byu qenho: byu japhin: re gaug: yu nae" ngad: ako". 3Gye mau" qo" vin ko" ra" yauggai qe shid' xe zin we' ai: tho' qi" ra" yauggai qe alhab' mo; mang jham re tung" xam" yu ge,. 4Ni" shid' tao re bao" thaug' byid: nae" qhid' mae" amyu" khao: ngo" mae" amyu" kaung au: jhaung dayaug yaug re mho' yu ge,. 5-16Cebam wa- ce: gye mau" qhid' mae" byuphung: mae" khyin: san: yu qhug' ko" ra" yao: bam: amyu" qere au: she nae" mo, ngad: ako".
Amyu" kaung au: jhaung | |
---|---|
Rubin | Shedura nho: yauggai zo: Elizu |
Simon | Zurishadai nho: yauggai zo: Shelumie |
Yuda | Amminadab nho: yauggai zo: Nashon |
Isakha | Zua nho: yauggai zo: Nethane |
Zebulun | Helon nho: yauggai zo: Eliab |
Ephrim | Ammihud nho: yauggai zo: Elishama |
Manashe | Pedazu nho: yauggai zo: Gamale |
Benyamin | Gidoni nho: yauggai zo: Abidan |
Dan | Amishadai nho: yauggai zo: Ahieze |
Ashe | Okhran nho: yauggai zo: Pagie |
Gad | Due nho: yauggai zo: Eliasab |
Nabhtali | Enan nho: yauggai zo: Ahira |
17-18Moshe we' Arun tao wa ce: yauggai daxe: shid' yaug: yang bao" thaug' byid' ru we' lho" shid' khye' ein: khye'- sao qhid' ba mae byu phung: geim" re khai: zhang" yu mung:- mo, byu alhab' mo, re amyu" kaung we' yham byu qere kho' yang: tung" xam" to" ako". Asang: yang amyin" byid' to" ru we' dakhyo: shid' xe zin byang" va" mo, we' aitho' qi" ra" yauggai alhab' mo; mang jham re nghe' mung: tung" xam" to" ako". 19Sina din"pyad' yo mae mo, byu qere mang gaug: yu: ra". 20-46Yaku nho: zoqhid' yauggai zo: ngad: ra" Rubin amyu" mae" qhid yang: gye mau" qo" vin: ra" yauggai shid' xe zin byang" mo, we' aitho' qi" ra" mo, yauggai alhab' mo; re amyu" kaung we' ug' khug' dinkhu: kho' yang: mang lao: yang: mang gaug: yu: ako". Alhab' geim" o mae tung" to" ru we' dakhyo: ngad: ako".
Amyu" | Aso: |
---|---|
Rubin | 46,500 |
Simon | 59,300 |
Gad | 45,650 |
Yuda | 74,600 |
Isakha | 54,400 |
Zebulun | 57,400 |
Ephrim | 40,500 |
Manashe | 32,200 |
Benyamin | 35,400 |
Dan | 62,700 |
Ashe | 41,500 |
Nabhtali | 53,400 |
Alhab' | 603,500 |
47Levi amyu" qe wa gatau: amyu" we' daga" mang gaug: yu: ru maqhug' ngad: ako". 48Pe"mung:ga"re Asang wa Moshe re- 49Gye mau" qo" vin: ra" yauggai qere nao mang japhin: gaug: yu: ra" au:- Levi amyu" qere daboke' wa,- 50Ai: atha"- Levi amyu" qere nga" qhid' kheim: jamu mae we' aimae" zai kug jham re qu" caung zaui: so: genae" qhid' mae" san: to: byid: wa,- yao: bam wa ai: jamu re we' yao" zai kug re dao mung:- aimae caung da" byid: mung:- ai: lhang" gam: mae yao: bam thang: na: ra" Zaung kad' genae" ngad: ra". 51Naonhaung" thang: na: ra" jamu mae" phao: qui: khao: ngo"- Levi amyu" qe wa ai: Zaung re phyo' mung:- thang: na nae" ra" jo, qo asag' khao: ngo" mae ai: Zaung re dam: tau: zhaug' genae" ngad: ra". Ai: jamu khyo te' li" ra" yaug gaje khag' ngadqere: se' pye' ru qhug' nae" ngad: ra". 52Dang: ra" Israel byu qe wa phung: we' phung: yaug khao: ngo" wa yao: yao" phung: we' daga" yao: yao" khyi qao: mae thang: na nae" jamu kad' genae" ngad: ra". 53Ngadqere: ai: jamu khyo khag' re: maqo" te' li" yang: Israel byumyu" phung: geim" re nga" nhag' yo" ru mazao" nhao nae" qhid' mae"- Levi byu qe wa aire gug: gam nae" ai: jamu lhang" gam: mae thang: na ca" genae" ngad: ra"- ga: ta" ra". 54Airumung: Israel byu qe wa Moshe re Asang: yang amyin" byid' to" ra" gu: ja: khao: ngo" re kad' ako".
Currently Selected:
GYAUNG: SU: 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009