HAGI 1
1
Caung:pa" Yham Dam: Zhaug' Nae" Asang: Amyin" Dao:
1Persia mung" mae Dari kho:kham do, thao shid' zin ein: zin lho" khyaug' khye' ein: khye' daba: ba mae lapa Hagi nhad' khyo" Asang dao: jhau: thug' li" ra". Ai: mungdao: wa Shealtie yao: zo: Yuda mung" mae" mung" zug: Zerubabela we' Yehozadag yao: zo: Khinjaung Yin" Yoshu shid' zo" qhid' mae" ngad: ra".
2Qam: so' bo: thao" Asang wa Hagi re ceru ta" ra". Ce byumyu" wa Caung:pa" Yham dam: zhaug' yo, majoe" shi: ga: ta" na: ako". 3Alao" Asang wa ce: mungdao: re lapa Hagi khyo" mung: ai: byumyu" re byid' ke' va". 4Ai wa- nga" byumyu" we"- nga" Caung:pa" Yham wa airu: byo: qeim: jo; re naonhaung" wa pe" mung: yham gai mae laung" na ko" i? 5Naonhaung" mae pe" boe" na: rure naonhaung" mamyao ko" i? 6Naonhaung" wa gaug zo gyai qho: gengadqere: dajhid' za: qo" she' yu: ako"- zo: shaug' qo" qere: magyi" zo: ngad: ako". sabyi qang: qo" qere: malaug: shaug' ngad: ako". Mai bau: qo" ngadqere: malam ngad: ako". Mau" zaui: zo: mo, wa kao so' daui na nae" qhid' mae" mathae: qo" ngad: ako". 7Ceru: pe" mung: boe" ru naonhaung" mamyao ko" i? 8Ana"- bug gaung jham khyo do, mung: sag' vo: ye: yu ge,. Amung: Caung:pa" Yham dam: zhaug' ge,. Ailao" ngo qu" ngaui mung: ngo man: qi" ru we' dakhyo: yao: bam wa ngo re caung:pa" li" genae".
9Naonhaung" wa gaug zo myo: sho' qo" she' yu nae" ga: myid: lam: to: qere: dajhid' za: boe" lo" ako". Amung: gaug zo: re naonhaung" yham khyo tai: lo: re ngo: yang mad: sin" pye' byid: va". Ngo pe" mung: airu: kad' i? Pe"mung:ga"re nga" Caung:pa" Yham byo; qeim: jo, au: naonhaung" yaug khao: ngo" wa yao: yao" yham kad' mung: mau" laug: na geyang: ngad: ra". 10Ce: mathao mae mug: maqu amung: qhovo: re: magai: yaug: ru ngad: ra". 11Ngo wa ai: mug: myid re qhovo: khoru: magai: yaug- khaung: yo jham- sabyi khyae jham we' zhanlun khyae jham mae myid gaung mae" yaug thug' ra" qhovo: ja: khao: ngo" byu we' gug'nyhug' alhab' dao mae nao qho" ra" ja: alhab' dao mae kyaug' ho nhao va".
Asang: Amyin" Dao: Re Ai: Byumyu" Qe Tae" Gyo: Ko" Ra" Khyo
12Ailao" Zerubabela we' Yoshu wa Babelon mae zaug ye: pyaung" nha: to" ru mae" dam: tug' lo: ra" mo, we' daga" yao: bam: Mao"So Asang yao: bam re ta" ru re kad' ako". Yao: bam wa gyaug mung: Asang: nho: lagyo: lapa Hagi dao: re tae" gyo" ako". 13Ailao" Hagi wa ai: byumyu" re Asang: nho: mungdao: byid' ru wa- ngo naonhaung" we' daga" na nae" ai wa nga" dao:so: ngad:- ga: ta" ru ngad: ra". 14Asang wa Yuda mung" mae" mung" zug: Zerubabela- Khinjaung Yin" Yoshu we' pyaung" nha: to" ru mae" dam: tug' lo ko" ra" mo,byu alhab' re Caung:pa" Yham dam: zhaug' nae" qhid' mae" nhag' lam: lhau: zhung: ke' ra". Yao: bam wa qam: bo: thao" ra" Asang yao: bam: Mao"So: Caung:pa" Yham re ceim" zhaug' qhid: ako". 15Ai wa Dari khosin" kho" zaung: ra" ayo, shid' zin ein: zin lho" khyaug' khye' shid' xe: byid ba: ba mae ngad: ra".
Currently Selected:
HAGI 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009