ESTHA 1
1
Kho:kham Myhi" Vashti Wa Kho:kham Ahasuru Re Ngag: Thaug' Ra" Khyo
1-2Kho:kham Ahasuru wa- Persia vogaung: mo" Susa mae" kho:kham tao" mae na mung: India mung" mae" Kusha#ce: mung" wa ana" ba mae" ayo, mae Sudan mung" myo: lo bug we' Ethiopia mung" datam" ngad: ra".* Ethiopia mung" joe" sho' mung"dan: 127 lam: re eib: na: ra".
3Yao: kho:kham boe" ru sam zin ein: zin re yao: wa yao" mung" zug: qe we' zug: ade, qe alhab' re zo: shaug' da" mung: poe kad' byid' ra". Persia gyetab jham we' Media gyetab jham re: ai: mung" dau jham mae" mung" zug: ade, qe we' daga" aimae li" joe" na: bam: ako". 4Yao" nho: kho:kham vang" mae" jo,nho" jham we' qi" qhang: ru khig kham: rure- lho" khyaug' khye' qhu" byid' ra".
5Ai: thao kho:kham pho" wa Susa vogaung: mo" mae" jo,nho" qo" mo, we' myaung sho: mo, alhab' re dakhyo: za: zo: shaug' da" zho: poe kad' ra". Ai: zo: shaug' poe re kho:kham kho" mae" khyae mae dalaban geim" da" byid' ra". 6Ai: kho:kham vang" re mug: nyug pin: we' da-au pin: phyu- qe, kyo pin: lung: jham: yang lao" khao" to: mung: ai: pin: lung: jham re wa khalhae: bu" nyhug: pin: cug' taui" yang taui:- ngaui kheim" jham mae vhin" yang: laug phyu te' shaung: yhaung" to" ako". Laug phyu pye: jham- laug ne jham qhi qhi mung: ra" palhe" laqhoe: kaug' we' laug nyhug jham myhung" pye' ra" kho:kham vang" mae"- Qhang jaung: we' ngaui jaung: jham to" to: byid' ra". 7Shaug' ja: jham re qhang keim jham mae sheim mung: da" jhaug' ako". Keim dalam: we' dalam: re: majho" dau ngad: ako". Kho:kham pho" wa kho:kham qe shaug' ra" sabyi re magan: mago" da" jhaug' ra". 8Shaug' ja: re matu" losho' da" byid: mung: yaug khao: ngo" yao: yao: o: nho" zo: shaug' nae" qhid' mae" kho:kham kho" daui daui mo, re amyin" byid' to" ra".
9Ai: ayo, mae kho:kham myhi" Vashti wa kho:kham vang" khug mae" myiqe: qere zo: shaug' da" zho: mung: poe kad' na: ra".
10Poe kad' ru nhad' ba ein: ba re kho:kham pho" wa shaug' pyo: mung: yao: yao" daui daui mo, unug nhad' yaug ngad ko" ra" Mehuman- Biztha- Harbona- Bigtha- Abagtha- Zetha we' Khaka bam re khai: vhao" yu: ra". 11Yao: wa kho:kham myhi" Vashti re kho:kham myhi" ba maug: zhaung" pye' mung: jhui" li" nae" qhid' mae" yao: bam re amyin" byid' ra". Kho:kham myhi" wa yaung" ra" myiqe: dayaug ngad mung: yao: yaung" rure kho:kham pho" yang yao" mung" zug: qe we' bang" vo alhab' re qhu" byid: nug: ra". 12Ngadqere: daui daui lagyo: qeyang kho:kham myhi" Vashti re kho:kham pho" nho: amyin: ta" kyo: ko" re yao: ha: pye' ra". Ceru wa kho:kham pho" re nhag' jam: yo: nhao: ra".
13Tarha" we' nyang yo: ra" khyo mae jhao: ra" myid: qu" khyo ba: byid' ra" mo, re kho:kham pho" wa- dao: myid myid' ra" thung" li jo; ra". Aimung: kho:kham pho" wa yao: wa pe" kad' ca" rure ba: ra" pha,jhi" byid: byu qere khai: ra". 14Yao" yang pha,jhi" je: lhaung" mho' va" mo, wa- Khashena- Shetha- Admatha- Tarshi- Mere- Marsena we' Memukhan bam ngad: ako". Persia we' Media mung" mae" ce: zug: ade, nhad' zo: wa yao" mung"dan: mae" qi" thao" zug: mo" qe ngad: ako". 15Yao: wa ce: zug: mo" qere- ngo Ahasuru amyin" byid: mung: kho:kham myhi" Vashti re khai nhao: ke' ngadqere: kho:kham myhi" wa mho: dao: magyo: ngad: ra". Yao: re khoru: kad' ca" ga: tarha" mae ta" to" va" i? ga: myid' ra".
16Ailao" Memukhan wa kho:kham pho" we' zug: ade, qere ceru: ga: ta" shid' ra". Kho:kham myhi" Vashti wa kho:kham pho" re za: maphug' makhyad' kad' ru mangad:- yao" zug: ade, qere re: maphug' ru ngad: ra"- gaigai: yao: ga" re mung"dan: geim" mae" yauggai yaug khao: ngo" re maphug' ru ngad: ra". 17Mung"dan: mae" myiqe: yaug khao: ngo" wa kho:kham myhi" kad' rure the' gyo: lao" yao: yaug yao" yham sang pho" re qu" phoe: li" genae". Yao: bam wa kho:kham Ahasu yang kho:kham myhi" Vashti re khai: ke' au: yao: maye:- ga: ta" genae". 18Persia we' Media mung" mae" zug: ade, qenho: yham sang myhi" qe wa kho:kham myhi" nho: ave, re the' gyo: lao"- ba mavao shire yao: bam yao" yham sang pho" qere ta" kyo" li" genae". Khyi" khao: ngo" mae" myhi" zang qe wa yao: bam: yham sang pho" qere maphug' makhyad' kad' mung: yao: bam: yham sang pho" qe wa yao: bam: myhi" zang qere nhag' yo" li" genae". 19Asang kho:kham myid: ngaui: ngad: re- kho:kham qhid' kheim: khyo khonhae" re: Vashti maqo" thug' qhu" nae" qhid' mae" amyin" dalam: khyo" ke' wa,- Madam: gai: lhai: nae" Persia we' Media mung"dan: tarha" khyo" tung" nhao wa,. Ai: thao yao" jo, qo mae je: gai: ra" myiqe: dayaug re kho:kham myhi" tha" kad' nhao wa,. 20Ni" amyin" lau dao: re ceqhi" ra" mung"dan: geim" mae kyo" ke' lao" myiqe: yaug khao: ngo" wa yao: yao" yham sang pho" re jo,nho" qo" ngadqere: myaung sho: ngadqere: phug' myao: ang: ra" khyo" phug' li" genae"- ga: ta" ra".
21Kho:kham pho" we' yao" zug: ade, qe wa ce: akhyo: re gyo" ngaui mung: kho:kham pho" wa Memukhan pha,jhi" byid' ra" khyo" kad' ra". 22Yao: wa- mung"dan: khao: ngo" khyo ai: mung"dan: mae" myan" we' tung" ce' khyo" tung" nhao yang:- yham sang pho" yang khao: ngo" wa yao: yao" yham mae asang boe" mung: qi" thao" kheim: so' khyo" qo" ta" ca" nae" amyin" pyo: ke' ra".
Currently Selected:
ESTHA 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009